విషాదాంతాలు – బాలచందర్ సినిమాలు
“బాలచందర్ ” ఎందుకోగాని ఈ పేరు తల్చుకోగానే మనసు దిగులుగా అయిపోతుంది. నన్నేడిపించిన సినిమాలన్నీ ఫాస్ట్ ఫార్వర్డ్ లో కళ్ళముందు గింగిరాలు తిరుగుతాయి. సరిత, శ్రీదేవి , జయప్రద ,జయసుధ, సుహాసిని,మాధవి, జయలక్ష్మి ( ఫటాపట్) …చక్కనమ్మలందరూ , దిగాలుగా నాకేసి చూస్తారు. చిరంజీవి, కమల్ హాసన్, రజనీకాంత్, నారాయణరావు , ప్రకాష్ రాజ్ ఆయనే లేకపోతే మేం ఎక్కడా ? అని ప్రశ్నిస్తూ నిలదీస్తారు .బాలచందర్ సినిమాలు ఎన్ని చూసానో గుర్తులేదుకాని ….అన్ని సినిమాలూ ఏడుస్తూ చూసాను. చూసి ఏడ్చాను. ఇంకెప్పుడూ చూడకూడదనుకుంటునే , మళ్ళీ మళ్ళీ చూస్తాను, మళ్ళీ మళ్ళీ ఏడుస్తాను . కాకపోతే చిన్నప్పుడు ఏడ్చి, ఏడ్చి …..ముక్కూ మొఖం ఏకం చేసుకొని, అమ్మ చీర మొత్తం పాడుచేసేదాన్ని. ఇప్పుడు ఎంతైనా పెద్దైపోయాం కదా …..అందుకే కొంగు అడ్డం పెట్టుకుని , కళ్ళలో నీరు బయటపడకుండా బేలన్స్ చేసుకుంటూ …..ఇంకా వీలు కాకపోతే చానెల్ మార్చడమో, ఓయ్….వస్తున్నా అని ఎవరొ పిల్చినట్టు లేచి వెళ్ళిపోవటమో చేస్తాను.
అయినా ఈ డైరెట్రు ఎందుకింత ఏడిపిస్తాడు. ప్రపంచంలో ఎన్నో అందమైన అనుభవాలు ఉండగా ఈయన కష్టాలనీ, కన్నీళ్ళనీ ఎందుకు మనమీద గుమ్మరిస్తాడు , సినిమా చివర్లో హీరో, హీరోయిన్లని కలిపేసి …పెళ్ళిచేసేసి ఊటీ హానిమూన్ కి పంపేస్తే వాళ్ళు ఇంచక్కా అక్కడ కొండలమీద గుట్టలమీద ఎగురుకుంటూ,పాటపాడుకుంటూ ఒకరెనకాల ఒకరు పరిగెడుతుండగా ….,శుభం , కార్డు పడిపోతే , ఎంచక్కా అక్కడితో హాయిగా ఆ సినిమాని మర్చిపోవచ్చు. కానీ అలా జరగదు.
‘అకలిరాజ్యం ‘లో….. కమల్ హాసన్ ని ఢిల్లీకి కలెక్టర్ని చేసెయ్యొచ్చుకదా !
‘మరో చరిత్ర ‘ లో …. సరితకి కొత్తచీర కొనిచ్చి , కమల్ హాసన్ కి రెండు బేండేజీలు వేసి వాళ్ళిద్దరికి పెళ్ళి చేసెయ్యొచ్చుకదా!
‘అంతులేని కధ ‘లో గుర్రం మీద చిరంజీవి వచ్చి , జయప్రదని ఎత్తుకెళ్ళిపోవచ్చుకదా!
‘ఇది కధకాదు ‘ లొ…… చిరంజీవి మంచోడయిపోయి జయ సుధ ని ఇంటికి తీసుకెళ్ళిపోవచ్చుకదా!
‘కోకిలమ్మ ‘ ….. లో సరితని సినిమా హీరోయిన్ ని చేసెయ్యచ్చు కదా!
47 రోజులు సినిమాలో తనని ఇంటర్వూ చెయ్యటానికొచ్చిన సరిత తో “‘కావాలనుకుంటే మీ సినిమాలో నా పాత్రకి పెళ్ళి చేసెయ్యండి అంటుంది ‘ “ అది బాలచందర్ సినిమా కాకుంటే 47 రొజులు లో జయప్రదకి కూడ పెళ్ళి అయిపోయుండేది కదా! (అబ్బా.. ఏంటీ పెళ్ళి గోల , ఏం చేస్తాం! ప్రేమ… పెళ్ళి, పగ…. ప్రతీకారం …ఇంతకన్నా ఏం విషయముంటుంది సినిమాల్లో …..అలాంటి సినిమాలు చూసీ, చూసీ ఇలా అయిపోయాం. )
గుప్పెడుమనసు ‘……. లో సుజాతని ఒప్పించి , సరితకి శరత్ బాబుకీ పెళ్ళి చేసెయ్యొచ్చుకదా, ఆయనకిద్దరు వుంటే ఏంపోయింది. అనవసరంగా చంపెయ్యటం ఎందుకు!
ఎందుకేవిటీ ………అలా..అలా….శుభం కార్డు పడుంటే ఈపాటికి ఆ సినిమాలు ఎప్పుడో మనం మర్చిపోయి వుండేవాళ్ళం . ఇప్పటికీ బురదలో ఏపిల్ చూస్తే , ఆకలిరాజ్యం గుర్తొస్తుంది.తిండి విలువ తెలుస్తుంది. ఆకలి బాధ అనుభవంలోకి వస్తుంది . బీచ్ లో బండల్ని చూస్తే మరోచరిత్ర క్లైమేక్స్ గుర్తొస్తుంది. రోడ్డుమీద పిల్లలతో కష్టపడుతున్న పేద స్త్రీని చూస్తే కోకిలమ్మ గుర్తొస్తుంది. కొందరు అమ్మాయిలని చూస్తే ……..వీళ్ళ జీవితాలు అంతులేని కధ కాకూడదు అనిపిస్తుంది.
అనుక్షణం కళ్ళముందు కదలాడే జీవితాన్ని …..చూడలేనంటూ కళ్ళుమూసుకోవటం సాధ్యమేనా …అది ఎంత కలవరపెట్టేదైనా. అందుకేనేమో వద్దనుకుంటునే చూస్తాను . మళ్ళీ మళ్ళీ చూస్తాను.
ఇక పాటల విషయానికొస్తే……..
ఆకలిరాజ్యం లో……”సాపాటు ఎటూలేదు పాటైనా పాడుబ్రదర్……” ఎంత హిట్టో చెప్పక్కరలేదు
“కన్నె పిల్లవని కన్నులున్నవని ఎన్నెన్ని వగలు పోతున్నావే చిన్నారీ…….” రొటీన్ కి భిన్నంగా సాగే డ్యుయెట్ .
అంతులేని కధలో…..”.కళ్ళలో ఉన్నదేదో కన్నులకే తెలుసు …” పాట , కళ్ళలో నీళ్ళు తెప్పించక మానదు.
“దేవుడే ఇచ్చాడు వీధి ఒకటీ ………ఇక ఇల్లేల ఓ చెల్లెలా……,” వేదాంతం ద్వనించే పాట.
కోకిలమ్మ……”కొమ్మ మీద కోకిలమ్మ కుహు అన్నదీ…కుహు కుహు అన్నది…..”
ఇది కధకాదు …..”సరిగమలూ…గలగలలూ…..”
“జూనియర్..జూనియర్….ఇటు అటు కాని హృదయంతోటి ఎందుకురా ఈ తొందరనీకు……. “( మిమిక్రీ పాట)
రుద్రవీణ లో ……”చెప్పాలని వుంది గొంతువిప్పాలని ఉంది…..”
“చుట్టూ పక్కల చూడరా చిన్నవాడా….. ”
“తరలిరాద తనే వసంతం ….తనదరికి రాని వనాలకోసం …….” ఇవన్నీ ఎంత మంచి పాటలో.
బాలచదర్ సినిమాలకి ,ఎక్కువగా ఎం. ఎస్ .విస్వనాధన్ , ఇళయరాజా సంగీతం అందించారు .
గుప్పెడు మనసు సినిమాలో ….బాలమురళి కృష్ణ పాడిన పాట మౌనమె నీ భాష ఓ మూగ మనసా……. తలపులు ఎన్నెన్నొ కలలుగ కంటావు…….కల్లలు కాగానే కన్నీరౌతావు …….మనసుని అద్దంలో చూపించే ఈ పాట నాకెంతో ఇష్టమైనపాట,
మరో చరిత్రలో పాటలగురించి చెప్పాల్సిన పనేలేదు.
బాలచదర్ సినిమాల్లో పాత్రలెంత ఏడిపిస్తాయో…….పాటలు కూడా అంతే లోతుగా గాయం చేస్తాయి.
సహజత్వానికి దగ్గరగా ఉండేకధలు, కధలకు తగ్గ పాత్రలు ,పాత్రలకు ప్రాణం పోయగల నటీ నటులు , మనుషుల్లో ఉండే భావావేసాలు, మానవ సంబంధాల్లోని అనేక కోణాలూ……. మరచిపోలేని ముగింపు , ఇవే బాలచందర్ సినిమా ప్రత్యేకతలు . మనచుట్టూ ఉండే సమాజికాంసాలే ఇతివృత్తాలు .
బాలచందర్ బాణీకి కొంచెం భిన్నంగా ఉన్న సినిమాలు……డ్యుయెట్ , ఆడాళ్ళూ మీకు జోహార్లు, బొమ్మా బొరుసు, ఇవి కాస్త కామెడీ టచ్ ఉన్న కధలు.
చిత్రానికి ,కధకు నేషనల్ అవార్డ్ తెచ్చిపెట్టి, చిరంజీవి సినిమాల్లోకెల్లా బెస్ట్ గా నిలిచిన రుద్రవీణ కూడా బాలచదర్ సినిమాల్లో కాస్త ప్రత్యేకమైనదే ( ఇందులో కధకి ఆధారమైన బలమైన … స్త్రీ పాత్ర లేదు కదా!)
బాలచందర్ “గొప్ప దర్శకుడు “. మట్టిలోని మాణిక్యాన్ని గుర్తించి సాన పెట్టి మెరిపించగల నేర్పరి. నలుపు తెలుపుల్లోనే …జీవితంలోని అన్ని రంగుల్నీ చూపించి ప్రేక్షకుల్ని మై మరపింప చేసాడు . ఏడిపిస్తే ఏడిపించాడు కానీ….. ఒక్కో సినిమాలో ఒక్కో జీవితాన్ని చూపించాడు. మరపురాని బాధను మిగిల్చాడు
రచన: లలిత.దాట్ల -నా స్పందన
Filed Under: featured • lead • ప్రముఖులు • భారతీయ సినిమా • విశ్లేషణ • సినిమాలు-దర్శకులు
Nenu Balachandar abhimaanine. Aayana movies lo Anthuleni kadha, Aakali rajyam and Rudraveena naaku baaga nachutyi.
*Vasantha kokila director Balachandar kaadanukuntaa, Balu mahendra anukuntaanandi.
YES .. VASANTHA KOKILA IS BALU MAHENDRA FILM
విషాదాంతమే అయినా, ఆయన ప్రతి చిత్రం ఒక ఆణిముత్యం
lalitha garu mee rachana bagundi kaani oka chinna correction vasantha kokila director balachander kaadu aayana baalu mahendra
బాలచందర్ గారి చిత్రాల్లో నాకు నచ్చిన మరో చిత్రం “కల్కి”. ఇందులో ఓ స్త్రీ తనని తానే ఓ శిల్పాన్ని మలుస్తున్న శిల్పిలా ఎలా మలుచుకుంటుందో దానికోసం ఎన్ని ఉలి పోట్లను తట్టుకుంటుందో చూపించారు. రియల్లీ హాట్సాఫ్ టు హిమ్. ఇది ఓ విషాదాంత చిత్రంలా అనిపించినా ఎందుకో చివరి నిమిషంలో ఆలోచన మార్చుకున్నట్టు కథానాయికని తన ప్రేమికునితో కలిపేస్తారు.సినిమాలనగానే కథానాయకుడు అద్వితీయమైన బలశాలి, ఓ పది పదిహేనుమందిని ఇరగ్గొట్టి, అసలు జుట్టు కూడా చెరగకుండా వస్తాడు అనే స్టీరియోటైపులో కాకుండా,”కథ సుఖాంతం” అని అనకుండా జీవితం అంటే ఎప్పుడు సుఖాలే కాదు, అన్ని జీవితాలు కష్టాలనుండి అంత తేలికగా గట్టెక్కవు అని మనసుని తట్టి, ద్రవింపచేసే అతికొద్దిమంది దర్శకనిర్మాతలలో నా దృష్టిలో అగ్రగణ్యుడు బాలచందర్ గారు.
వెంకీగారన్నట్లు వసంతకోకిల బాలుమహేందర్ గారి చిత్రం, బాలచందర్ గారిది కాదు.
మరో చరిత్ర (ఏక్ దూజే కే లియే) ని విషాదాంతం చెయ్యటమ్మీద చాలా విమర్శలొచ్చాయి. జీవితంలో అపజయాలు ఎదురైన వాళ్లు ఆత్మహత్యలు చేసుకోటమే మార్గం అన్నట్లు ఆయన సినిమా ఉందని విమర్శ. దానికి సమాధానంగాగానో ఏమో, జీవితమ్మీద విరక్తి చెంది ఆత్మహత్య చేసుకోవాలనుకునే నలుగురు యువతీ యువకుల కథతో 1992లో ‘వానమే ఎల్లయ్’ తీశాడు బాలచందర్. చాలా మంచి సినిమా, అప్పట్లో పెద్ద హిట్. ‘అక్టోబర్ రెండు’ పేరుతో తెలుగులోకి అనువాదమయింది కానీ ఇక్కడ పెద్దగా నడవలేదు. ఈ సినిమాకి కీరవాణి స్వరపరచిన పాటలు కూదా చాలా పెద్ద హిట్. తప్పకుండా చూడాల్సిన సినిమా.
Nice writeup!
Corrections:
- Vasanta Kokila is by BaluMahendra.
- Rudraveena won the National Award, Chiranjeevi did not.
కథ విషాదాంతమైతే సినిమా థియేటర్లోనే మర్చిపోలేం. కొన్నాళ్లపాటు అలా వెంటాడుతుంది. అందునా బాల చందర్ సినిమాల్లో స్త్రీ పాత్రలు ప్రత్యేకంగా ఉంటాయి. ఆయన టివీ సీరియల్స్ తీసినా సరే! స్త్రీలంటే ఆయనకు ప్రత్యేక గౌరవం అనుకుంటాను.
వెంటాడి వేటాడే విధంగా ఆయన సినిమాల క్లైమాక్సులుంటాయి.
ఆయన సినిమాల్లో నాకు నచ్చనిదేదైనా ఉంది అంటే అది… కల్కి! అబ్బ, ఆ హీరోయిన్ ని భరించడం కష్టం! ఆవిడ చేసే త్యాగానికి అర్థమే ఉండదు ఇందులొ! ఎవరికో బుద్ధి చెప్పాలని, ఎవరికో న్యాయం చేయాలని ఏదేదో చేసి ఎవరితోనో బిడ్డను కని, ఇంకా తన కోసం ఎదురు చూస్తున్న హీరో ని కలుసుకుంటుంది.
కాస్త అతిగా ఉన్న బాల చందర్ హీరోయిన్ పాత్ర ఇదే అనిపిస్తుంది నాకైతే! తనను తాను మల్చుకోవడం అనేది టైటిల్స్ లో చూడ్డం వరకూ బాగానే ఉంటుంది కానీ, అందులో ఆమె తనను తాను “దేని”గా మల్చుకుందో అంతు పట్టదు. అందుకే ప్రేక్షకులు నిర్మొహమాటంగా తిరస్కరించారు.
లలితా, చాలా బాగా రాశారు. అభినందనలు!
కల్కి – యస్….. ఏమీటో…నాకర్థం కాదు ఏం చెప్పదల్చుకున్నారో అ సినిమా ద్వారా…
సుజాతగారూ,కల్కి ఒక సినిమాగా కన్విన్సింగ్ గా లేకపోయినా,conceptual గా చాలా ఉన్నతమైన కథ. బహుశా ఒక నవలగా బాగా రాణించేదేమో! ఆపాత్రని నటన సరిగ్గా చేతగాని శృతి పోషించడంకూడా ఆ సినిమాకు పెద్ద మైనస్.
అర్ధమవ్వటం అర్ధంకాకపోవటం అనేది పక్కనపెడితే, కల్కి పాత్ర తనని తాను నాశనం చేసుకుంటూ ప్రకాష్ రాజ్ ని మంచివాడిగా మారుస్తుంది. గీతకి ఓ పాపాయినిచ్చి ఆవిడని తల్లిని చేస్తుంది…. నాకు గుర్తున్నంతవరకు ప్రకాష్ రాజ్ కి 2 పెళ్ళాలు ఆ చిత్రంలో, (కల్కి మూడవ అవివాహ సంబంధం)
కానీ చివరికి కల్కి హీరో ని కలుసుకోవటం, హీరో ఆమెని స్వీకరించటం… పురుషాధిక్య సమాజంలో వీలవుతుందా? అనేది ప్రశ్న. ఇలాంటి సంగటనలు సమాజంలో లేవు అని కాదు; ఉన్నాయి, ఏదో రకంగా జీవితానికి దగ్గరగా ఉన్న కథలనే బాలచందర్ గారు చిత్రాలుగా మరిల్చారనిపిస్తుంది.
అక్టోబరు 2, చిత్రం కూడా నలుగురిలో ఒకరు చనిపోతారు కదూ కరెక్టుగా గుర్తురావట్లేదు సినిమా మొత్తం ఎప్పుడు చూడలేదు. శుభంకార్డు కి ముందనుకుంటా వికలాంగులని చూపిస్తారు, జీవితంలో కొందరు చిన్న చిన్న విషయాలకి ఆత్మహత్యలు చేసుకుంటారు. చావటం అనేది పిరికి పని కాదు, దానికెంతో ధైర్యం కావాలి, చావటానికి పనికొచ్చే ధైర్యం, బ్రతకటానికెందుకు వాడుకోకూడదు…మనకి బాధలొస్తే మనకంటే ఎక్కువ బాధలున్న వారిని చూసి గుండె నిబ్బరం పెంచుకోవాలని చెప్పిన తీరు నాకు నచ్చింది.సినిమా మొత్తంగా చూడకపోయినా సందేశం అందితే అంతే చాలు కదా?
సీరియల్సు కూడా, ప్రేమేదైవం, గుప్పెడుమనసు,… ఇవి రెండూ ఎంతగానో ఇష్టం, పాత్రలని భలే సృష్టిస్తారు బాలచందర్ గారు.”ఎర్ర వనజ” అనే పాత్ర అసలు చాలా గుర్తుండిపోయింది జనాలకి. “ప్చ్ ప్చ్ ప్చ్ ప్చ్” అనుకుంటు చేసే సౌండు, ఎలా రూపొందిస్తారా అనిపిస్తుంది.
గుప్పెడు మనసు అనే సీరియల్ని “మాతృదేవో భవ”(కే. అజయ్ కుమార్ గారి దర్శకత్వం, కే.ఎస్.రామారావు గారి నిర్మాణం)సినిమా మరో కోణంలో తెరదించితే ఎలా ఉంటుందా అని చూపించారు. కానీ ఆ సీరియలు ఎందుకో అర్ధాంతరంగా ముగించినట్లనిపించింది.
>> “అక్టోబరు 2, చిత్రం కూడా నలుగురిలో ఒకరు చనిపోతారు కదూ”
అలాంటి సీన్ సృష్టిస్తాడంతే. మిగిలినవాళ్ల కళ్లు తెరిపించటానికి అతనాడే నాటకం అది.
గుప్పెడు మనసు చాలా మంచి సీరియల్. హృద్యంగా ఉంటుందది. గీత నటన, ప్రకాష్ రాజ్ కారచ్తరైజేషన్ చాలా బాగుంటాయి. అందులోనేనా “పోరంబోకు” అంకుల్ ఉండేది?
టైటిల్ సాంగ్ కూడా బాగుంటుంది.
తరువాత “వదిన” అనే సీరియల్ తీసి భయపెట్టాడుగా…
వదిన టైటిల్ సాంగు కూడా బాగుంటుందండీ
ఇంద్రజ పాత్ర నాకు నచ్చింది…మొదట్లో చాలా ఉత్సాహంగా నైపించినా, తర్వాత విసిగుఏసిందనుకుంటా కదా? ఎంటో ఎప్పుడో చిన్నప్పటి కథలన్నీ గుర్తుచేసుకోవాల్సి వస్తోంది “వనజా పాపాయ్”
సతీష్ కుమార్,
మీకు సీరియల్స్ పేర్లు భలే గుర్తున్నాయి! కానీ ఆయన తీసిన “ఫ్రేమి” సీరియల్ చాలా బావుంటుంది. అందులో ప్రేమి గా రేణుక(కల్కిలో ప్రకాష్ రాజు రెండో భార్య)నటించింది. తండ్రి చనిపోయాక ఆయన మొదటి భార్య తాలూకు కుటుంబం బాధ్యతలు కూడా మీద పడ్డప్పుడు( ఈమె రెండో భార్య కూతురు. రెండో భార్యను, ఆమె కూతుర్ని మొదటి ఫామిలీ అంగీకరించదు చాలా రోజులు)వాళ్ళందర్నీ దార్లో పెట్టే కమాండర్ లాంటి పాత్ర!
మహేష్,
మీరు చెప్పింది కరక్ట్ కావొచ్చు! సినిమాలో దాన్ని కన్విన్సింగ్ గా చూపించలేకపోయాడు బాలచందర్!శ్రుతి కాకుండా ఇంకెవరైనా అయితే ఎలా ఉండేదో మరి!
అందరూ తూర్పు పడమర సినిమాని మర్చిపోయారు. ఆ మధ్య ఎవరొ ఇండియాలో ‘నిశ్శబ్డ్ సినిమా విషయంలో వివాదాలు వచ్చాయంటే, మేము ముప్ఫైయేళ్ల క్రితమే తూర్పుపడమర ‘ని ఆదరించామన్న విషయం గుర్తు చేసి, సరిగ్గా తీస్తే ఎలాంటి కధకైనా బ్రహ్మరధంపట్టే అలవాటున్నవాళ్లమని నిరూపించాను.
చంద్రమోహన్ సినిమా ‘ బొమ్మా-బొరుసు ‘ అని మంచి కామెడీ , అది కూడా బాలచందర్ సినిమానే అని గుర్తు, ఎవరికైనా తెలుసా.
బొమ్మా-బొరుసు అంటే చలం కూడా ఉన్న సినిమానేనా? భలే ఉంటుందది. అత్తా అల్లుళ్ళ మధ్య సన్నివేశాలు బాగా పేలాయందులో.
Article is good. KB has a weakness to deliberately bring in tragic end and Tamilians relish it. In “Antuleni Katha” ( inspired by Ritwik Ghatak’s “Meghe Dhaka Tara”. I have compared them in my TV program “Idee Asalu Katha”) heroine could have happily married her company MD Kamala Hasan and financially help the family. Why marry him off to her younger sister and why at all Kamal Hasan should agree?
@MBSగారు,
మీ TV ప్రోగ్రాంలు ఆన్లైన్లో ఎక్కడైనా దొరికే అవకాశం ఉందా. మీరు చెప్తుంటే ఆశక్తి పెరుగుతుంది, చూసే అవకాశం లేదనే నిరాశ ఫాలో అవుతుంది. ఇంతకుముందెప్పుడో మీరు అప్లోడ్ చెయ్యడంకోసం సలహా అడిగినట్టు గుర్తు. దయచేసి navatarangam@googlemail.com కు ఒక మెయిల్ పంపిస్తే వాటిని నెట్లో బ్రాడ్కాస్ట్ చేసేందుకు అవసరమైన సాంకేతిక విషయాలను తెలియజేయగలను.
బాలచందర్ సినిమాల గురించి గూగులమ్మని, వికీ మాతని అడిగితే చాలా పెద్ద లిస్టే వచ్చింది. దదాపు ఎనభై (అందులో కొన్ని డబ్బింగ్, రీమేకులు వున్నా 75 తక్కువ కాకుండా) చిత్రాలు తీసారు. తెలుగులో తీసిన చిత్రాలు -
బొమ్మా బొరుసా (1971), లోకం మారాలి(1973), కోటి విద్యలు కూటి కొరకే (1974), అంతులేని కథ (1976), మన్మధలీలలు (1976), ఒక తల్లి కథ (1977), మరో చరిత్ర (1978), ఇది కథ కాదు (1979), అందమైన అనుభవం (1979), గుప్పెడు మనసు (1979), తొలి కోడి కూసింది (1980), 47 రోజులు (1981), ఆడవాళ్ళు మీకు జోహార్లు (1981), ఆకలి రాజ్యం (1981), కోకిలమ్మ (1983), సింధు భైరవి (1985), రుద్రవీణ (1988), అక్టోబర్ 2 (1992), డ్యూయెట్ (1994), కల్కి (1996), పరవశం (2001), తూర్పు పడమర (?)
తూర్పు-పడమర చిత్రానికి దాసరి నారాయణరావు దర్శకుడు. తమిళంలో బాలచందర్ తీసిన సినిమాని తెలుగులో రీమేక్ చేసారు.
MBS gaaru
మనది పురుషాధిక్య సమాజం అంతులెని కథ లొ సరిత కుటుంబం చిన్నది కాదు ఆమె వాళ్ళ బాస్ ను పెళ్ళాడి కుటుంబానికి సహాయం చెయడం అంత సులభం కాదెమొ ఒక సారి ఆలొచించండి
అంతులేని కథలో సరిత కాదు. జయ ప్రద.
“Saritha” Jayaprada vesina paatra perandi
అవునా?
నాకు ఆయన సినిమాలలో రుద్రవీణ, డాన్స్ మాస్టర్, అక్టోబర్ 2(ప్రస్తుతానికి వేరేవి గుర్తు రావట్లేదు) ఇష్టం. కల్కి సినిమా కూడా బానే నచ్చింది నాకు. బాలచందర్ కొన్ని అనవసరమైన విషాదాంతాలు లాగా అనిపిస్తాయ్. ఆఖరికి ఈ మధ్య వచ్చిన అబద్దం (100 వ చిత్రం అని గుర్తు) కూడా ట్రాజెడీ చేసేశారు. Balachander is quite ahead of his time. అందుకే ఆయనకి ఇప్పటికి కూడా సినిమాలు తియ్యడం కష్టం కావట్లేదు అప్పటి జనరేషన్ లో మిగతా దర్శకులలా .
రుద్రవీణ గురించి అప్పట్లో మాదాల రంగారావు గొడవ చేశాడు – తన ‘ఎర్రమట్టి’ని కాపీ కొట్టాడని. నిజమెంతో? (నేను ఎర్రమట్టి చూడలేదు) రుద్రవీణ మాత్రం గొప్ప సినిమా. భావజాలాలూ, సందేశాలూ వదిలేసినా – కేవలం ఇళయరాజా పాటల కోసమన్నా చూడొచ్చు.
అరంగేట్రం తమిళ సినిమాని తెలుగులో జీవితరంగం పేరుతో తీసారు. తమిళంలో సూపర్ డూపర్ హిట్. తెలుగులో మరలా రీమేక్ చేసారు. అందులో ఎస్వీ రంగారావు, ప్రమీల నటించారు. తండ్రి బాధ్యతలు మర్చి పోయి కుటుంబాన్ని నిర్లక్ష్యం చేస్తే పెద్ద కూతురు సంసార బాధ్యత నెత్తినేసుకుంటుంది. చివరికి వేశ్యావృత్తి చేస్తూ సంసారాన్ని పోషిస్తుంది. చివర్లో ముగింపేమిటంటే తండ్రి నానా తిరుగుళ్ళూ తిరుగుతూ అమ్మాయి కోసం వేశ్యాగృహానికొస్తే కూతురే ఎదురవుతుంది. అది తట్టుకోలేక తండ్రి ఆత్మ హత్య చేసుకుంటాడు. అప్పట్లో ఈ సినిమాకి మంచి పేరే వచ్చింది. ప్రమీలకి తమిళంలో చేసినదానికి నేషనల్ అవార్డొచ్చినట్లు గుర్తు. పాపం ఆ అమ్మాయి కూడా శోభా, ఫటాఫట్ జయలక్ష్మిల్లాగ ఆత్మహత్య చేసుకొని చనిపోతుంది.
Ouch! It is the story of Ghatak’s subernarekha. It is the brother who comes to the sister in that film. Subernarekha is available at rajshri.com
MBS prasad గారు,
మీరు చేసిన ఈ ప్రోగ్రామ్ నేను చూసాను బావుంది. కాని ఇందులో త్యాగంపాలు మరీ ఎక్కువైందేమో అనిపించింది..
నిజమేనండోయ్……వసంతకోకిల డైరెక్టర్ బాలచందర్ కాదు. ఈ తప్పు కి ఒగ్గేయండి.
సతీష్ కుమార్ గారూ …..మీరు నొచ్చుకున్నా సరే , ‘ కల్కి ‘ కధ నాకు అస్సలు నచ్చలేదండి .
వేర్వేరు కారణాలతో ఆత్మహత్య చేసుకోవాలనుకున్న నలుగురు యువతీ యువకులు ‘ అక్టోబర్ రెండు ‘ తమ చావుకు ముహుర్తం పెట్టుకుంటారు . ఇందులో రమ్య కృష్ణ ఒక హీరోయిన్ గ చేసింది. ఇక డాన్స్ మాస్టర్ లో ఇద్దరు ప్రేమికులు ఆత్మహత్య చేసుకోవటంతో సినిమా మొదలవుతుంది. ప్రేయసి చనిపోతుంది. ప్రియుడు( కమల్ హాసన్) బ్రతికి బయటపడతాడు. అప్పుడు హీరోఇన్ పరిచయం అవుతుంది. ఇందులో కమల్ డ్యూయల్ రోల్ చేసినట్టు గుర్తు.
సీరియల్స్ లో గుప్పెడు మనసు కూడా గుండెల్ని పిండేసే కధతో నే వచ్చింది. ప్రకాషరాజ్ ని ఈ సీరియల్తోనే పరిచయం చేసినట్టున్నారు. ‘ దేవుడండీ మీరు ‘ డైలాగ్ బాగా పాపులర్ అయిందిలెండి . కానీ కధని బాగా సాగదీసి అర్ధాంతరంగా ముగించేసారు. వారానికి ఒక్కసారి వచ్చే ఈ సీరియల్ కోసం కళ్ళు కాయలు కాసేలా ఎదురుచూసేవాళ్ళం . ఈ మధ్య సిమ్రాన్ తో ఒక సీరియల్ తీసారు బాలచందర్ . నేను చూళ్ళేదు కాబట్టి ఎలావుందో తెలీదు.
సరస్సులో రాయి వేస్తే అలలు పుట్టినట్టూ…… నేను మర్చిపోయిన( అప్పుడు ఇంకా పెద్దవ్యాసం అయ్యేది ప్చ్….ప్చ్…ప్చ్..) ఎన్నో సినిమాల్ని గుర్తుచేసిన మీ అందరికీ ధన్యవాదాలు
బాలచందర్ సినిమాల గురించి చదువుతుంటే మళ్ళీ ఆ సినిమాలు చూసినప్పటి అనుభూతి కలిగింది. బాగా వ్రాసారు.