అరుంధతి(A) బాధితుల సంఘం
మీకు అరుంధతి సినీమా మాయాబజారు తరువాత అంతటి గొప్ప చిత్రం అనిపిస్తే మీరు దయచేసి ఈ టపా చదవద్దు. ఇది మీకు పరుషంగా అనిపించవచ్చు. చదివింతరువాత “మీ నవతరంగం ఇంతే, ఇక్కడ రచయితలు ఓర్వలేనితనంగా వ్రాస్తారు, ఈ రచయితని అది చేయండి ఇది చేయండి, ఇది రివ్యూ కాదు, సీరియస్ సైటులో వుండాల్సింది కాదు”, వంటి వ్యాఖ్యలు చేస్తే నాది కాదు పూచి. “ఎంత గొప్ప సినిమా అయినా అందులో మెఱుగులకు అవకాశం వుంటుంది, అసలే ఇదంత గొప్ప సినిమా కూడా కాదు”, అన్న విశాల దృక్పదం గలవారైతే చదవండి.
నిన్న మొత్తానికి అరుంధతి సినిమా చూడడం జరిగింది. అసలైతే మొన్నొక సారి పాతిక కి.మి వెళితే, ఆ హాలులో ఈ సినిమా ఆ ముందు రోజే తొలగిపోయిందని చెప్పారు. అప్పుడు బిల్లా చూసి వచ్చి, ఛీ పెంట సినిమా అనుకున్నా. కానీ ఆనాడు ఎంత అదృష్టమో ఈనాడు తెలిసివచ్చింది. కానీ ఏం చేస్తాం నిన్నరాత్రే ఘోరం జరిగిపోయింది. అరుంధతి గాత్రంపై జరగాల్సిన అత్యాచారం, నా మనస్సుపై జరిగిపోయింది.
నిన్న కష్టపడి నలుగురు పిల్లలతో అప్పుడే ఓటు హక్కు వినియోగించుకున్న ఆనందంలో ముగ్గురం పెద్దవాళ్ళం అరుంధతి సినిమాకి వెళ్ళాం. అవును. ఈ విషయమై మీరు నన్ను ఎంత తిట్టినా నేను ఒప్పుకుంటాను, ఓర్చుకుంటాను. మఱీ సిబిఎప్సి రేటింగు చూడకండానే సినిమాకి ఎలా వెళ్ళిపోతారు అని మీరు అడగవచ్చు. ఏం చేస్తాం, అందరూ సూపర్ సినిమా సూపర్ సినిమా అనడమే గాని, ఇది పెద్దలకు మాత్రమేనని ఎవరూ చెప్పలేకపోయిరి. పైపెచ్చు, పిల్లలందరూ తమ తమ సహాధ్యాయులు ఈ సినిమా చూసారని, తమకు కథ చెప్పియున్నారనీ, కథ ఎంతో నచ్చిందనీ అంటూవున్నారు. అప్పటికీ నేను మఱీచిన్న పిల్ల వుంటే దానికి వద్దన్నాను గానీ, మారాం చేస్తుందని ఎక్కించుకున్నారు. మన వెనకబడిన దేశంలో పిజి-10 లు పిజి-13 లు వుండవు కదా మరి. గమ్మత్తేంటంటే ఆ ఏడేళ్ళ పిల్ల కూడా నాకు కథ తెలుసు బస్సులో మా ప్రెండు రోజూ చెబుతుంది అంటూవుంది. మొత్తానికి థియేటర్ కి వెళ్ళాం. అది మావూరి డొక్కు థియేటరి – కేబుల్ టీవీ వచ్చాక, డొక్కు బారిపోయిన బాపతు. దాని లోపల గబ్బిలాలు కూడావున్నాయి. సినిమాలో గబ్బిలాలకు ఇవి మాంచి జతనిచ్చాయి. థియేటర్ కూడా ఏదో కంపు కొడుతూ వుంది. కానీ సినిమాతో పోల్చుకుంటే థియేటర్ స్వర్గమని తరువాత తేలింది.
కథలోనికి వద్దాం.
అందరూ చూసిన సినిమానే కాబట్టి. కథలోతుల్లోనికి వెళ్ళను (మా మేనఁగోడలి సహాధ్యాయిని బస్సులో చెప్పినన్ని వివరాలు ఇక్కడ వుండవు).ఎప్పుడో ఎనకటి కాలాన, ఇప్పటి తరానికి మూడుతరాలు వెనుక, అంటే నాలాంటి వాళ్ళ జేజమ్మల తరంలో ఒకానొక మహా సంస్థానంలో ఒక అమ్మాయి పుడుతుంది. ఆ అమ్మాయి పేరు అరుంధతి. ఈ పేరు పెట్టడానికి రెండు కారణాలు వున్నాయి. ఒకటి రాజసం వుట్టిపడే ఆడపేరు ఇది. ముని భార్య పేరు. రెండు, అటు ఫ్యామిలీ ప్రేక్షకులకూ, ఇటు మాస్ ప్రేక్షకులకూఁ సైతం సుపరిచయమైన పేరు. పెళ్ళిళ్ళలోనందరికీ అరుంధతీ నక్షత్రాన్ని చూపిస్తారు. అరుంధతి కంటే అహల్య అని పెడితే బాగుండేది, పెళ్ళిళ్ళకంటే అక్రమసంబంధాల గుఱించి ఎక్కువున్న సినిమా కాబట్టి.
కానీ అందరూ ఆ పిల్లని జేజమ్మ అని పిలుస్తూంటారు. దీనికీ రెండు కారణాలు వున్నాయి. మొదటిది, ఈవిడ చచ్చి మళ్ళీ పుడుతుంది, ఆ పిల్లకూ అరుంధతి అని పేరు పెడతారు, కాబట్టి సగటు మాస్ ప్రేక్షకుడు తికమక పడకుండా ఈవిడను పిలవడానికి ఒక పాత కాలపు పేరు ఎంచుకుంటే బాగుంటుంది. అలాంటి పేరులోఁ అమ్మా వుండాలిగా. ఇక ఆ పిల్లకీ ఈ బామ్మ గారికీ సంబంధం కూడా సగటు ఫ్యామిలీ ప్రేక్షకురాలు గ్రహించడానికి తేలికగానుండాలని జెప్పి, పిల్లకు జెజమ్మయిన బామ్మగారికి ‘జేజమ్మ’ అనే పేరునే పెట్టారు. డెట్ సబ్బుకు డెట్ అని పేరుపెట్టినట్టు. జేజమ్మ తఱచూ గ్రామ దేవతలకు గల పేరు కూడా కాబట్టి, ఆవిడ లాగా వుంటుంది అని వంక పెట్టి ఈ రెండవ పేరును బామ్మగారికి పెట్టుకోవచ్చని రచయితలు అభిప్రాయపడ్డారు. ఇలా సినిమా తీసినవారు పలు రకాలూ ఆలోచించి పేర్లు పెట్టడం జరిగింది.
జేజమ్మ (అరుంధతి అంటే సగటు నవతరంగం పాఠకులు తికమకపడతారని ఇలా పిలవడం జరుగుతుంది) జేజమ్మ అక్క మొగుడు వట్టి కిరాతకుడు. ఆడవారిని అనుభవించి చంపడం వాడికి సరదా. వీడి గుఱించి మా మేనఁగోడలి స్నేహితురాలు ముందే చెప్పియుండడం వల్ల, నా మేనఁగోడలు నాతో “మధ్యలో వాడు అమ్మాయిల్ని చెంపేస్తాడు, ఆ కొంత సేపు సినిమా బాగుండదు” అని చిలక్కి చెప్పినట్టు చెప్పిందది. అందుకే మాకు వాణ్ణి చూస్తున్నంత సేపు, మెక్డావెల్ మూర్తిని చూస్తున్నట్టనిపించిందంటే నమ్మండి. వాడిచేతిలో నిత్యం మెక్డావెల్ సీస వుండడం దీనికి ఎంతో తోడ్పడింది. వాడి పేరు పశుపతి, ఈ పేరుకు కూడా కొన్ని బలమైన కారణాలు వున్నాయి. వాడు వట్టి పశువువంటి వాడు అని సగటు-వడ్లగింతంత బుఱ్ఱ వున్న సగటు తెలుఁగు ప్రేక్షకురాలికి అర్థమవ్వాలని చెప్పి పేరులో పశువు వచ్చేడట్టు పెట్టాడు రచయిత. మహిషాసురుని తరువాత, దుర్యోధనుని తరువాత, దౌష్ట్యం ఉట్టిపడే ప్రతినాయకుని పేరు ఇదేనని రచయిత సంబరపడ్డాడని విశ్వసనీయ వర్గాల సమాచారం. కానీ ఆవగింజంత బుఱ్ఱవున్న రచయితకు అర్థంకాని విషయం – పశుపతి అద్వైత స్వరూపుడైన మాహాశివువి పేరు! ఆ పేరులో పశువు అంటే సకల జీవరాసులని అన్వయించుకోవాలని ఆ ఆవగింజలో వ్రాసిలేదేమో!
కథలోనికి తిఱిగి వస్తే,
జేజమ్మకి ఒక గురుణి వుంటుంది, ఆమె అంధురాలు అందఁగర్తె క్షత్రియనాట్య ప్రావీణురాలు, ఆవిడ నేర్పే విద్య నేర్చుకున్నవారి చేత పైటకొంగు సైతం వజ్రాయుధం. కానీ అంతటి ప్రవీణురాలు, మెట్టెల సవ్వడి వినపడకపోయిన, సీసానుండి మద్యం వాసన వస్తున్నా లోనికి వచ్చింది చిట్టి జేజమ్మే అనుకుంటుంది గానీ, పశుపతి అనుకోదు. అలా వచ్చినవాడు దుర్భాషలాడుతున్నా, ఆవిడ నిస్సహాయురాలవుతుందే గానీ, ఆవిడ చేతిలోనున్న కోకలతో నతనిని చంపుదామనుకోదు. గొప్ప విద్య నేర్చినా వట్టి బాదరాయణరాలు అన్నమట. ఆ గొప్ప విద్య గొప్పదనం మనకు ఎఱుకవడం కోసం తరువాత జేజమ్మ అదే పద్ధతిలో వాడిని చంపేయడం జరుగుతుంది. అప్పుడు మనకు జేజమ్మ అవతారస్త్రీ అని అర్థమవుతుంది. ఎందుకంటే ఆవిడి ఆమె గురుణి దగ్గర నుండి ఆ విద్య నేర్చుకోక ముందే పశుపతి ఆమెపై అత్యాచారం చేసిచంపేస్తాడు. (ఇక పై అతనిని సోనూ సూద్ అని వ్యవహరిద్దాం, పశుపతి అంటే బాగోలేదు.) సోనూ సూదుని నీచత్వం తట్టుకోలేని అతని భార్య ఆత్మహత్య చేసుకుంటుంది. అరుంధతికి కోపంవచ్చి, ఊప్స్ జేజమ్మకు కోపం వచ్చి అతనిని నలుగురి చేతా చావబదిస్తుంది. గుఱ్ఱానికి కట్టి ఈడ్చి లాగిస్తుంది. పదమూడేళ్ళ యువరాణికి నేటితరం తెలుఁగు దర్శకులకు మాత్రమే తట్టేంత కౄరమైన చిత్రహింసలు తట్టడం గమనార్హం. కానీ వాడు నేటితరం తెలుఁగు సినిమా ప్రతినాయకుడిలా బ్రతికి బట్టగడతాడు. వాడు కట్టే ‘బట్ట’ చాలా చిన్న బట్ట ఎందుంటే, వాడిని బ్రతికించింది అఘోరీలు కాబట్టి. ఎత్తుకు పోయి వాడికి వారు క్షుద్రవిద్యలు నేర్పుతారు.
{ఇక్కడ మనం తంత్ర విద్యలు గుఱించి కొంత మాట్లాడు కోవాలి. తంత్రం అంటేనే నేడు చాలా మందికి చెడు అభిప్రాయం వుంది. మీదగ్గరకు అంకెలు లెక్కించలేనివాడొకడొచ్చి సాపేక్ష సిద్ధాంతం తప్పు అంటే మీకు ఎలా అనిపిస్తుందో నాకు తెలియదు గానీ, నాకైతే పిచ్చ కోపం వస్తుంది. మన భారతీయ విద్యలను కించ పరచడానికి, మన ఆత్మగౌరవాన్ని దెబ్బతీయడానికీ, ఇతర మతాల ప్రచారకులూ, చదువుకున్న తెల్లవారు, వారి మానసాక్రమసంతానమైన మన దేశస్థులూ చాలా కృషి చేసి ఎన్నో విజయాలను సాధించారు. అలాంటి ప్రయత్నాలకు మన సహాయం అక్కరలేదు. అయినా మన సినిమా రచయితలు వారికి ఎంతో అద్భుతంగా తోడ్పడ్డారు. గుఱ్ఱమైనా గాడిదైనా రెండు పశుపతియొక్క పశువులేనని .. యఱ్ఱ్ శివుని యెక్క పశువులేనని భావించి – శవాలను సైతం పూజించేవారిని తప్పుడు కోణంలో చూపించడమెందుకు. వారి సిద్ధాంతాలను ప్రజలను భయపెట్టి సొమ్ముచేసుకోవడానికి వాడడమెందుకు? పరిశోధించని వాడు పరిశోధించనివానిలా వుండడం మానేసి.}
వెల్, మొత్తానికలా పరమకౄరునిగా మారిన సోనూ సూదుడు అరుంధతి ఉరఫ్ జేజమ్మ మీద కక్ష్య సాధించడానికి వస్తాడు. కానీ జేజమ్మని చూడగానే వాడికి కామ కోఱిక పుడుతుంది. ఇక్కడ దర్శకత్వాన్ని మెచ్చుకోవాలి. జేజమ్మ అందాన్ని సౌమ్యంగా కాకుండా పరమ మొఱటుగా ఆవిష్కరించినందుకు. ఏ అస్లీలత చూడాల్సివస్తుందోనని ఫ్యామిలీ ప్రేక్షకులు భయపడుతూ, ఏమి ‘లీలత ‘ చూపిస్తాడోనని మాసు ప్రేక్షకులు చూస్తుంటే, ఈ పరస్పర విరుద్ధ మనోభావాలను ఒకేసారి ఆవిష్కరించగలిగిన కూర్పునేర్పులకు జోహార్లు పలకాల్సిందే. అఘోరీ సన్యాసం పుచ్చుకున్న వాడికి ఒక్కసారిగా ఆపుకోలేని కోరికలు కలుగుతాయంట, అదీను ఆఱేండ్లగా దాహంతోనున్నాడంట – అంటే ఆఱేండ్లగా కోరికలు కలుగుతూనేవున్నాయంట. ఇలా సన్యాసానికి సైతం కొత్త నిర్వచనం ఇచ్చారు కథకులు.
కానీ అలా పశువై వచ్చిన సోనూ సూదుడు తన బట్టులు విప్పుతున్నా ఎం చేయదు జేజమ్మ, తండ్రిని చంపుతున్నా ఏం చేయదు. మనం అంతా అయిపోయిందనుకున్నప్పుడు. అవతార స్త్రీ అయిన జేజమ్మ, తన గురుణి తనకు ‘నేర్పకుండా చనిపోయిన‘ విద్య, తన గురిణి స్వయంగా నేర్చినా పెరుమాళ్ళకే తెలిసిన కారణం చేత సమయానికి ఉపయోగించని విద్యా వాడి ఆ దుష్టుడను చంపినంత పనీ చేస్తుంది, కోకలతోనే!
చంపేస్తే సినిమా అయిపోతుందని ఎఱిఁగిన సినీ ప్రేక్షక స్పృహ గలిగిన యొక వేదపండితుడైన బాపనాయన వచ్చి “వద్దమ్మ వీణ్ణి చంపవద్దు, సజీవసమాధి చేయి” అంటాడు. అలానే చేస్తుంది అరుంధతి యఱ్ఱ్ జేజమ్మ. పాపం బాపనాయనకు వేదజ్ఞానం అయితే వుంది గాని గురుణిలా వట్టి బాదరాయణుడు, రచయితలు చదువుకున్న వాడికంటే చాకలివాడు నయం అని ఎఱిఁగి అతనికి కామన్ సెన్స్ ఇవ్వలేదు. సమాధిలోపల సోనూసూదుడు మూడుదినముల తరువాత చనిపోవడం మనకు పరమ ఆశ్చర్యం కలిగిస్తుంది. “అఱె అన్నోదకాలు లేక రక్తం కారుతున్న గాయాలు గలవాడు మఱీ మూడురోజుల్లోనే చచ్చిపోవడం ఏంటి ముప్పైఏళ్ళుండక” అని. అతని ప్రేతాత్మ శ్రీ,బుద్ధాది చక్రాల వలన బయటకు రాలేకపోతుంది గాని, అతని శక్తులు మాత్రం బయటకు పనిచేస్తాయి. అతను బయట చూడగలడు సైతం. అలా శ్రీబుద్ధాది చక్రాల గొప్ప మహిమను మనకు తెలియజేస్తాడు రచయిత. మీ మేధస్సుపై జరిగిన ఈ దాడికి మేము చింతిస్తున్నాము.
అలా వాడి ఆత్మ సమాధి లోనించే గద్వాలులో (గద్వాలు జనులు నన్ను క్షమిస్తారని నమ్ముతున్నాను, నేను విమర్శకునిగా నా బాధ్యత నిర్వహిస్తున్నానంతే, గద్వాలు బదులు రాజమండ్రి అంటే మరీ పాఠకులు తికమకపడతారని లేకుంటే మావూరి పేరే నేను వాడేవాడిని) గద్వాలులో తీవ్ర కరువు, దారుణ మైన కలి, వ్యాధి వ్యాపింపఁజేస్తుంది ప్రేతాత్మ. కానీ గద్వాలు జేజమ్మ ఆశీస్సులవలననుకుంట, వేంటనే కోలుకుంటుంది. వారు మనకు నేటి గద్వాలు చూపిస్తారు, అది నిక్షేపంగానుంటుంది. అంత దారుణంమైన వ్యాధులు వ్యాపిస్తే వూరు రూపుమాసిపోవాలిగానీ, ఇలా ఇంత తొందరగా కోలుకొని తిరిగి పట్టణంగా ఎలా మారిందా అఱవై ఏళ్ళలోనని మనం ముందు ఆశ్చర్యపోయినా తరువాత అది జేజమ్మ గొప్పతనం అని మనం గ్రహిస్తాం. గ్రహించని వారు ఇప్పుడు గ్రహించగలరు.
ఇక అరుంధతి మీద పగతో వాడి ప్రేతాత్మ అలానే బ్రతికి వుంటుంది. వాడి ప్రేతాత్మ ఉనికి నిరర్ధకం చేయడానికి అరుంధతి (జేజమ్మ) లేకపోతే సరిపోతుంది. జేజమ్మ కూడా ఎక్కడో దూకి చస్తే సరిపోయేది. కానీ సినీస్పృహతోనలా చేయదు. దానికి బదులు మహాయోగుల వేట పేరిటఁ వివిధ గొప్ప దేవాలయాల వాల్ పోస్టర్ల ముందు నించుని మనకు దర్శనమిస్తుంది. (ఇక్కడ గ్రీన్ స్క్రీను వాడి నిర్మాత డబ్బు ఆదా చేసుకొన్నాడు). తంత్ర శక్తులకంటే యోగశక్తి గొప్పదంటారు, ఎలాంటి ‘దుష్టతాంత్రికుడ’నైనా హరినామంతో హరించవచ్చంటారు. కానీ మన మహా యోగిగారు అలా తేలికపాటి పద్ధతులెందుకని చెప్పి. దధీచి వెన్ను నుండి వజ్రాయుధం తయారు చేసిన మాదిరి మనం కూడా ఎముకల నుండి ఒక కత్తి తయారు చేద్దామని ఉచితసలహా పారేస్తాడు. వెల్, ఈ అంశం మీద ఎంత తక్కువ చెప్పుకుంటే అంత మంచిది. పాఠకులు అనవసరమైన కోడిగుడ్ల మీద అనవసరమైన ఈకలు పీకుతున్నానని పిర్యాదు చేయవచ్చుఁ.
మొత్తానికలా అరుంధతి చచ్చిమళ్ళాపుడుతుంది. ఇప్పటివఱకూ మనం చెప్పుకున్న కథలో రెండే రెండు పాత్రలు వున్నాయని గమనించగలరు. బాదరాయణ పాత్రతో సహా నాలుగు. రెండో జన్మలో కథ చాలా సంక్లిష్టమయిపోతుంది. ఎందరో కొత్త పాత్రలు, అందులోనొక ముసలమ్మ, ఆవిడకు జేజమ్మ కథ మొత్తం తెలుసుఁ, జేజమ్మకు తనకూ మాత్రమే తెలిసిన అతిరహస్యాలు కూడా వున్నాయి, నేననుకోవడం ఈవిడ సోనూ సూదుని భార్య అయిన జేజమ్మ అక్క రెండో జనమో, లేదా గురుణి రెండో జనమో అయివుండాలి. కానీ అలా కూడా కుదరదు, వాళ్ళు చచ్చింతరువాతి కథ కూడా ఈమెకు తెలుసు. మొత్తానికి ఆ ముసలిది అప్పటినుండీ ఇప్పటి వఱకూ బ్రతికే వుంది, సుమారుగా ఒక ౫౦౦ ఏండ్లు. ఇంకా ఒక పకీరు వుంటాడు. ఒక బాయ్ప్రెండ్ వుంటాడు. ఒక కుటుంబం వుంటుంది. ఒక పెద్ద తాత వుంటాడు, ఇతను దెయ్యమయిపోతాడు. ఎందుకో ఎవరికీ తేలియదు, నా వుద్దేశం ఇంతటి తలాతోకా లేని కథలో పాత్రగా బ్రతికినందుకుగాను ఆత్మశాంతి లేక అతనలా దేయ్యం అయివుంటాడు. ఇక పరమ విడ్డూరం ఎంటంటే, ఏజెంట్ స్మిత్ కూడా వుంటాడు ఈ సినిమాలో. నిజ్జం!
ఇక రెండో జనమ గుఱించి చెప్పే ఓపిక నాకు లేదు.
వ్రాసేదీ చదివేది ఎలాగూ బాధితులం కాబట్టి, అంత అవసరమూ మనకి లేదు. రవ్వట్టులో వున్నన్ని చిల్లులున్నాయీ సినిమాలో! నేను చెప్పేది మళ్ళీ జన్మలూ, తాంత్రిక శక్తుల గుఱించి కాదు. కథవ్రాసేటప్పుడు పాటించాల్సిన కనీస నియమాల గుఱించి. ఉదాహరణకు కొన్ని చెప్పుకుందాం.
౧) మానవాతీత శక్తుల గుఱించి కథ చెప్పేటప్పుడు చాలా నియమాలకు లోబడి కథ చెప్పాల్సివుంటుంది. ఎవరి శక్తుల నైజం ఎటువంటిది. ఎవరు ఎవరిని చంపగలరు అని ముందే ఏర్పరచుకోవాలి. మహా అఘోరి సాధువయితే, అతని శక్తుల ఎలా ఎప్పుడు ఉపయోగించవచ్చు, అతను తన వైపు వస్తున్న చాండిలియర్ గాలిలో ఆపగలగలేకపోవడమేమిటి అని సందేహాలు మనకు వస్తాయి. పోల్చి చెప్పాలంటే – పతి సేవలో వుండడం వలన భీక్షమేయడం ఆలస్యమయిన ఇల్లాలి మీద భిక్షం గోరి వచ్చిన కౌశిక ముని ఆగ్రహం తో శపిస్తాడు, కానీ శాపం ఆమె మిదఁ పనిచేయదు. ఆమె ధర్మపాలనలో ఆమె వున్నది కాబట్టి. ఇలా మీరు ఎంత మానవాతీతంగా వెళితే అన్ని నియమాలు పెరుగుతాయి, తగ్గవు. నేను హ్యారీ పోటరు చదవలేదు గానీ, దానికి గుఱించి కొత్తపాళీగారు చెబుతూ, ఆ కథలు నిర్దిష్టమైన నియమాలననుసరించి వ్రాయబడినవి అని చెప్పియున్నారు. అలాంటి నియమాల గుఱించే నేను మాట్లాడుతున్నాను – రాబర్ట్ మెక్కీ తన స్టోరీ పుస్తకంలో దీనిఁ గుఱించి ప్రత్యేకంగా చెప్పారు.
౨) శాండీరియర్ విషయమై, వెనకటి కాలంలో జనాల వేష భాషలు సరిగా ప్రతిబింబించలేదనే చెప్పాలి. ఈ విషయంలో రెడి సినిమాలో చిట్టినాయని పాత్ర ఎంతో వుచితంగానుంటుంది.
౩) “గ్రాఫిక్స్ చాలా బాగున్నాయి, పలానా రెడ్డి గారు గ్రాఫిక్స్ నిర్మాతగా పేరుతెచ్చుకున్నారు, అంతర్జాతీయ స్థాయిలో వున్నాయి” అని విని వెళ్ళాను. హ్యారీ పోటరు వంటి సినిమాలతో పోల్చుకుంటే ఇందులో గ్రాఫిక్సు పరమ అధోస్థాయిలోనున్నాయని మనం వేరే చెప్పుకోనక్కరలేదు. ఆ కోట నల్ల బడడం వంటివి అస్సలు నప్పలేదు. ఈ గ్రాఫిక్సులేకుండానే దీని తాతలాంటి పౌరాణికాలు ౫౦లలోనే మనవారు తీసియున్నారు. కాబట్టి బడ్జెట్టు వంకలు కూడా వినిపించవద్దు. టెక్నాలజీ ఒక పరికరం మాత్రమే, సృజనాత్మకతకు బదులు కాదు, కాలేదు.
౪) మిగిలిన సాంకేతిక పరికరాలు – ఆధునిక కూర్పు పద్ధతులు, నాన్ లీనియర్ నేరెటివ్, సరౌండ్ సౌండు వంటివి వాడడం, కోతి చేతన కొబ్బిరి చిప్ప చందంలోనుంది. ఇక కోతేనయమేమో, ఆడపడచు నెత్తిమీద వేసి కొట్టదు కొబ్బరి టెంకను. సినిమా మొత్తం ఎక్కడా నిశ్శబ్దంగా లేదు. మీ దృశ్యశ్రవణేంద్రియాల మీద ఎవరో యుద్ధం ప్రకటించినట్లుగా నుంటుంది ఎంతసేపూను. హారర్ సినిమాల్లో శబ్దం ఎంత అవసరమో నిశ్శబ్దం కూడా అంతే అవసరం. అప్పుడే వాటి మధ్యనున్న అంతరంలోనుండి ప్రేక్షకులకు ఉలిక్కిపాటు పుడుతుంది. ఈ సినిమాలో అలా ఒక్కసారే జరిగింది, అదీ దర్శకుల ప్రమేయంలేకుండానే.
౫) అన్నిటికంటే ముఖ్యమైనది, “రేంటింగు చూడని మేనమాఁవ బాధిత చిన్నారుల” సంఘం తరుఫున. దయచేసి దయచేసి ఇలాంటి సినిమాలను పిల్లలకు చూపించడం మానండి. అలాంటి సినిమాలు వారు చూసారనగానే వారిని కథ చెప్పమనడం మానేసి వారిని అలాంటి సినిమాలు చూడకుండా నిరుత్సాహపఱచండి. మన సెన్సారు వాడు కూడా వారు తింటున్న జీతానికి అనుగుణంగా పని చేసి, యాభై ఏళ్ళనాటి పద్ధతులను సవరించాల్సివుంది. ఏదో నామమాత్రానికి U, A అని రెండు వర్గాలు కాకుండా ఇంకా విస్తరించాల్సిన అవసరం ఎంతైనా వుంది. అలా ఇచ్చిన రేటింగులను థియేటర్ యాజమాన్యం పాటించేడట్టు చూడాల్సిన అవసరం కూడా ఎంతైనా వుంది.
ఇక సినిమా క్లైమాక్సుకు వచ్చేసరికి నేను సెల్లు తీసి అందులో పామాట ఆడడం మొదలుపెట్టాను, కొంత సేపటికి యింద్రియాలపై దాడి తీవ్రాస్థాయికి చేరుకున్నాక, చెవులూ కళ్ళూ మూసుకుని కూర్చోవలసివచ్చింది. మస్కా, బిల్లా, శశిరేఖ పరిణయం, వంటి చెత్తసినిమాలు సైతం నచ్చుతున్న నేటి పిల్లలే ప్రపంచ సినిమా పరిచయం వున్న నాలాంటి దురదృష్టవంతునికంటే ఈ సినిమాలని ధైర్యంగా చూసి ‘ఆస్వాదిస్తున్నారని’ చెప్పాలి. అది నేటి తరం! అంతెందుకు లెండి నవతరంగంలోనే దీనికి మంచి సమీక్షనిచ్చారు (1, 2).
చివరిగా రెండుమాటలు,
౧) నాలాంటి వారెవరైనా – ఈలాంటి సినిమాలకు స్ఫూపు తీసి సినీపీడితసమాజానికి విరుగుడువేయ దలచితే, వారికి నా యావదాస్తి (వేలం వేస్తే ఒక లక్షరుపాయలు రావచ్చు) దారపోసి, ఆ సినిమాకొఱకై ఉచితంగా పనిచేస్తానని మాటిస్తున్నాను.
౨) పరమేశ్వర పూజ – నాయనా చంద్ర శేఖర కమ్ములా, ఆనందపశుపతి, గోదావరీతట త్రయంబకేశ్వర, హ్యాపీదినకరా, తియ్యవయ్యా ఇంకో సినిమా సెన్సిబిలిటీసహితంగా. కావాలంటే నీకు కూడా నా యావదాస్తీ దారవోసి, ఆ సినిమాకొఱకై ఉచితంగా పనిచేస్తాను.
—————————-
త.క – ఇప్పుడే భూమిక లో డా. స్వరూప గారి వ్యాసం చదివాను. ఆవిడ సంఘంపై ఈ సినిమా యొక్క దుష్ప్రభావాన్ని ఎత్తి చూపారు. తప్పక చదవి వారి పోరాటానికి తమ మద్దతు ప్రకటించగలరు. ఈ రోజుల్లో సంఘానికి మంచి చేసే సినిమాలేమున్నాయిలే అని నేను ఆ విషయం ప్రస్తావించలేదు. మొత్తం వ్యాసం చదివి అరుంధతి కథని మళ్ళీ వినే ధైర్యం లేకపోతే, చివరి పారా ఒక్కటి తప్పక చదవగలరు.
Filed Under: featured • lead • భారతీయ సినిమా • విశ్లేషణ
I did not see the movie..so cant comment much.
Superb…
Just one thing. I dont think even (please note all are She instead of Se) Shekar Kammula’s films are entirely sensible. The only character which stays honest in Godavari is the police (Kamal kama raju!).
చిన్నప్పుడు నేను కూడా హారర్ సినిమాలు చూసేవాడిని. వాటి వల్ల ఎంటర్టెయిన్మెంట్ రాదు, భయం మాత్రమే వస్తుంది. హారర్ సినిమాలు ఎంటర్టెయిన్మెంట్ కోసం అని వాటిని సమర్థించేవాళ్ళ వాదన. వాళ్ళు పేడ (పెండ) తినడమే కాకుండా అది టేస్టీగా ఉంటుందని ఇతరుల్ని నమ్మించడానికి ప్రయత్నిస్తారు.
చద్వినంతసేపూ నవ్వలేక చచ్చాననుకో!
ఇప్పుడర్జంటుగా ఈ సినిమా పట్టుకోవాలి!!
నాగమురళి గారికి, కొత్తపాళీ గారికి, సౌమ్య గారికి నవ్వు వచ్చింది ఎందుకంటే మీరు సినిమా చూడలేదు కబట్టి ఈ వ్యాసంలో ఘోష కాకుండ హాస్యం కనబడుతుంది. మీరు అదృష్టవంతులు. పరిచయం వున్న మిత్రులుగా మీ మేల్గోరి చెబుతున్నాను, ఈ సినిమా చూడవద్దు. హాస్యం కోసం వ్రాయలేదు ఈ వ్యాసం.
నిన్ననే చూశాను సినిమా. నాకు నచ్చింది. వుట్టినే కాదు, బాగా నచ్చింది అనికూడా అనుకోవచ్చు
“హారర్ సినిమాల్లో శబ్దం ఎంత అవసరమో నిశ్శబ్దం కూడా అంతే అవసరం.”
SO TRUE!!
జేజమ్మ పశుపతిని చంపిన దగ్గర్నించీ నేనసలు సినిమాని చూడటం మానేసి ‘మాస్టరమ్మ ఆ అమోఘమైన చీరల విద్య నేర్పకుండానే చచ్చిపోయిందిగా, ఈమెట్లా నేర్చుకుందీ! నేనొప్పుకోను” అనుకుంటూ మూగగా ఆక్రోశించడమే సరిపోయింది.. ఇలా తికమకపడి బుర్ర గోక్కునే సీన్లకు అసలు కొదవలేదు!
I’m a huge fan of horror movies and Arundhati has disappointed me big time
@ నిశిగంధ,
ఇది నాకు హారర్ మూవి అని ఎక్కడా అనిపించలేదు. అసలు కథలో ప్రేక్షకుణ్ణి నిమఘ్నం చేసేడట్టు లేవు కథనం, నేపధ్య సంగీతం మొదలైనవి. ఇది ఒక నాసిరకం, నాణ్యత లోపించిన సినిమా. అంతే! ఏదో మన ఇంద్రీయాల మీద దృశ్యశబ్దాల వరద గుప్పించారు అంతే. ill-directed resources.
ఇరగదీశారు… అసలు అరుంధతి సినిమా తీసినందువల్లే కదా మీరీ రివ్యూ రాయగలిగింది. కాబట్టి ఆ సినిమా తీసినోడికి నేను థాంక్స్ చెప్పుకుంటున్నా. (నేను తెలుగు సినిమాలు ఎలాగా చూడను కాబట్టి దీని బార్న పడే బెంగ లేదు.)
@జేజమ్మ పశుపతిని చంపిన దగ్గర్నించీ నేనసలు సినిమాని చూడటం మానేసి ‘మాస్టరమ్మ ఆ అమోఘమైన చీరల విద్య నేర్పకుండానే చచ్చిపోయిందిగా, ఈమెట్లా నేర్చుకుందీ! నేనొప్పుకోను” అనుకుంటూ మూగగా ఆక్రోశించడమే సరిపోయింది.. ఇలా తికమకపడి బుర్ర గోక్కునే సీన్లకు అసలు కొదవలేదు!
editing lo cut ayi untadi …lite theesko baasu..
రాకేశ్వరులవారూ
నా కర్మ కాలి ఈ మధ్యకాలంలో నేను థియేటర్కి వెళ్లి మరీ చూసిన సినిమా ఇది!
“అరుంధతి కంటే అహల్య అని పెడితే బాగుండేది” … ఠాఠ్ నేనొప్పుకోను. అహల్య మహాపతివ్రత. ఆవిడగురించి ఇలా చెప్పడం చాలా అన్యాయం. అహల్యని పుట్టించినప్పుడు బ్రహ్మగారు మొదట ఇంద్రుడికి ఇచ్చి పెండ్లి చేద్దామనుకున్నారట.
తర్వాత విరమించుకుని ఎవరైతే భూలోకాన్ని మొదట చుట్టి వస్తారో వారికి అహల్యని ఇస్తానని వరపరీక్ష పెట్టారుట. ఈ పరీక్ష ఉందని ఆయనకి తెలియకుండానే గౌతముడు ఆ వరపరీక్షలో నెగ్గాడుట (ఆవుచుట్టూ ప్రదక్షిణం చేసి). అందువల్ల, అహల్యకి ఇంద్రుడిమీద వ్యామోహం చావక వచ్చినవాడు ఇంద్రుడు అని తెలిసినా రమించింది అని. కానీ ఈ సంఘటన తర్వాత అహల్య చాలా తపస్సు చేసి ఇంద్రియనిగ్రహం సంపాదించింది, ఆ తపస్సుకి సహకరించేలానే గౌతముడు శపించాడని చెప్తారు.
ఈ సినీమా చూస్తూన్నంతసేపూ ఎందుకో మనవాళ్లు మహిషాసురమర్దిని వంటి సినీమాలు తీయచ్చు కదా అనిపించింది. ముందు తీయం… ఎంతైనా లౌకికవాదపు భారతీయులం కదా. పోనీ తీసినా కచ్చితంగా హిట్టుకాదు. ఎందుకంటే అందులో చాలా పాత్రలు పవిత్రమైనవి కాబట్టి. కనీసం ఒక పెంట పాట ఐనా ముఖ్యపాత్రధారితో లేనిదే హిట్టు కాదు కాబట్టి. సన్నాసిగాళ్లు నానా బూతులూ కలిపి నటన చేతకాని వెధవలతో తీసి పాటలు చంపేసి అర్థాలు మార్చేసి తీస్తేనే చూస్తాం కాబట్టి. చూసిందే చూసి హిట్టు చేస్తాం కాబట్టి. నాకు మంట… సినిమాలు చూడడం మానేసాను అందుకే. పైగా చిత్రాలకి పేర్లు కూడా పెట్టడం చేతకాని వెధవలూ సన్నాసులూ మనకి దర్శకులూ వ్రాతగాళ్లూను. సానికొంపలలో తిరిగే వెధవల మధ్యలో మంగలాడే మహా పండితుడు అన్నట్టుగా ఉంది ఇప్పటి పరిస్థితి. ఎందుకొచ్చిన గొడవ సినిమాల గురించి ఎంత తక్కువ మాట్లాడుకుంటే అంత మంచిది. (ఎవరినీ కించపరచాలని కాదు కానీ నా బాధ ఇంతకంటే సున్నితంగా వెళ్లగక్కాలనిపించక).
@ రాఘవ,
అహల్య కథనే ఒక సినిమాగా తీస్తే ఎంతో బాగుంటుంది. 
అహల్య కథ చెప్పి పుణ్యం కట్టుకున్నారు. ఆమె గుఱించి పూర్తిగా తెలియకుండా తప్పుగా వ్రాసి, సినిమా వారు అఘోరీల విషయంలో చేసిన తప్పే నేను చేశాను
నేనూ మీ క్లబ్బే నేనూ మీ క్లబ్బే.. చెత్తన్నర చెత్త సినిమా. కానీ మిగతా చెత్తకి దీనికీ తేడా ఏంటీ అంటే హిట్టవుతున్న మిగతా చెత్తంతా జనసామాన్యంలో చెత్తగానే treat చేయబడటం, ఇది మాత్రం క్లాసిక్గా treat చేయబడటం, తెలుగుసినీప్రేక్షకజనోద్ధరణకి వచ్చిన సినిమాగా కీర్తింపబడటం, ఆఖరికి నవతరంగంలో కూడా అదే అభిప్రాయంతో ఉన్న రెండు సమీక్షలు రావటం, కామెంట్లలో కూడా పెద్దగా ఎవరికీ భిన్నాభిప్రాయం లేకపోవటం, నాకు చాలా హాశ్చర్యంగా అనిపించింది. చెత్తన్నరచెత్తన్నర చెత్తంటే ఉన్న చిరాకు కన్నా హైప్ చేయబడుతున్న mediocre చెత్త అంటే పరమచిరాకు.
నాకు ఈమధ్య చాలా ఆశ్చర్యంగా బాధగా అనిపిస్తున్న ట్రెండు భయంకరాతిభయంకరమైన హింస అశ్లీలత ఉన్న సినిమాలకి తలితండ్రులు ఏమాత్రం ఆలోచించకుండా పిల్లల్ని తీసుకెళ్ళటం.. “హారర్ ఎంటర్టైన్మెంటా కాదా” అనేది ఎవరి డెఫినిషన్ వాళ్ళకుంటుంది.. కాని పిల్లలు.. వాళ్ళ బుర్రలు.. ఒకరకంగా desensitize అయిపోరూ? వాళ్ళ పట్ల most concernతో ఉండాల్సిన తల్లితండ్రులే అంత అశ్రద్ధగా, సెల్ఫిష్గా ఉంటే ఇంక ఎవర్నడిగేదీ? పిల్లలు అవే ఆటలు, అవే పాటలు, అవే డాన్సులు చేస్తుంటే తప్పని చెప్పకపోవటం అటుంచి, పెద్దవాళ్ళు మురిసిపోవటం, సరదాపడిపోవటం, అవే పోటీలు కూడా. అన్నిటికీ “ఈ జెనరేషన్ ఆఫ్ కిడ్స్” అని అంటుంటారు గానీ అసలు “this generation of parents are the most careless, selfish generation” అనిపిస్తుంది నాకైతే.
అసలు సినిమా విషయం నుంచి పక్కకి వెళ్ళిపోతున్నాగానీ, నేను అనేది అది అనమాట. ఎందుకు ఇలా చెత్త సినిమాలని నెత్తికి ఎత్తుకుంటున్నాం అనేది పెద్ద ప్రశ్నే ఐనా, పిల్లల పట్ల వాళ్ళ బుర్రల పట్ల చాలా అశ్రద్ధగా ఉంటున్నామేమో అని ఇంకా ఎక్కువ బాధ.
హమ్మయ్యా!! ఇప్పటికి అరుందతి బాధితులు కనపడ్డారు. అందరూ ఓ బాగుంది అంటే చూద్దామా అనుకున్నా. మళ్లీ రిస్క్ ఎందుకు అని ఊరుకున్నా. సిడిలో మాత్రం క్లైమాక్స్ చూసి యాక్ ఇదా సినిమా. అనుకున్నా. ధాంక్స్ రాకేశ్…
పిల్లలు భయపడ్డారో లేదో తెలియదు గానీ పెద్దవాళ్ళు మాత్రం భయపడ్డారు.రొటీన్ గా ఉండే హీరొ, హీరొయిన్ కాకుండా ప్రధాన పాత్రలు హీరొయిన్ మరియు విలను. ఐనా అమాయకత్వం కాకపొతే ఇప్పటి తెలుగు సినెమాల్లో వాస్తవికత, కధ ఎవరన్నా వెతుకుతారా? కమ్ముల గార్ని గట్టిగా నిలదీయండి ఇంకో “ఆనంద్” ను స్రిష్టించమని.
రాకేశా, అదిరింది! చిన్నపిల్లలకు ఈ సినిమా నిషిద్ధం అనే అభిప్రాయంతో (మాత్రమే) ఏకీభవిస్తాను. మిగతా విషయాలలో, I have my own reservations.
“ఇక సినిమా క్లైమాక్సుకు వచ్చేసరికి నేను సెల్లు తీసి అందులో పామాట ఆడడం మొదలుపెట్టాను,”
భారద్దేశంలో అమ్మే నోకియా సెల్లుల్లో ఈ పామాట తెలుగు సినిమా బాధితులకి ఒక గొప్ప వరం. హైద్రాబాదు శాంతీ థియెటర్లో “వర్షం” సినిమా చూడ్డానికెళ్ళాం నలుగురు స్నేహితులం. వారిలొ ఒకడు ప్రకటనలు ముగిసి సినిమా మొదలైన దగ్గరినించీ చివ్వరి దాకా కంటిన్యువస్ గా పామాట ఆడుతూనే ఉన్నాడు.
రాకేశ్వరా!
బోలెడు చప్పట్లు.
ప్రసాదం
అయ్యా! ఎంత పని చేశారు? నేను కూడా దీనిమీదే రాద్దామనుకున్నాను. నాకు కామెంట్లు రాకుండా మీరు అడ్డుకున్నారు. ఇదన్నాయం.
కానీ ఒకరనా ధైర్యం చేసి రాజుగారి కొత్తబట్టల గురించి చెప్పటం…. కేక. (తేజ ప్రతాపునది కాదు. కనుక నన్నపార్థం చేసుకోరాదు). ఒకసారి తమ దర్శన భాగ్యం కలిగితే మీరు చెప్పిన నిధికి నేనూ, కొలది మొత్తమునివ్వగలను. మీకు వేలం వేసేందుకు కొంత ఆస్తి అన్నా ఉంది. ఇపుడిపుడే జీవితం మొదలెడుతున్నా పిల్లగాడిని నేను. అయినా… నేను సైతం…
ఇంత వరకూ మీరు ఆసెం అనుకున్నా Hats-off. ఇది మాత్రం ఆసెం కాదు.
But I still try to write. Because my style and idea are entirely from yours.
@ గీతా చార్య
entirely *different* from yours అనుకుంట మీ ఉద్ధేశం. తప్పకుండా వ్రాయండి. నేను ఈ సినిమా కథ పరంగానే విశ్లేషించాను. ఈ వ్యాసాన్ని పది భాగాలుగా వ్రాయచ్చు పది కోణాలనుండి చూస్తూ. భూమిక వారు వ్రాసింది ఒక కోణం. మీరింకో కోణం ఆవిష్కరించండి. వ్యాసం కోసం ఎదురుచూస్తుంటాము.
మాష్టారూ
బాగా చెప్పారు. ఇలాంటివి చదివైనా మన సినిమా వాళ్ళు నిజాలు తెల్సుకుంటే మంచిది.
Be sensible to others man. I remember once Narayanamurthy said “India is not a country of ‘doers’”. I think you guys are proving it.
@ Jagananna
మీరు చెప్పింది ముమ్మాటికీ నిజం,
ఒక సారి బెంగుళూరిలో అచ్చం మీరు చెప్పినట్లే జరిగింది. ఒకడు ఒక ముసలావిడ పర్సు కొట్టేసి పారిపోతుంటే. అందరూ వాడిని తిట్టారే గాని. వాdo do చేసిన పనిని ఎవరూ sensible గా మెచ్చుకోలేదు. ఆ రోజే అనుకున్నాను “అవును నారాయణ మూర్తి చెప్పింది నిజం, మన దేశం లో doers కి చోటు లేదు” అని.
>>>ఇలాంటివి చదివైనా మన సినిమా వాళ్ళు నిజాలు తెల్సుకుంటే మంచిది.>>>
పెంట తినడమే కాకుండా పెంట రుచిగా ఉంటుందని నమ్మించడానికి ప్రయత్నిస్తారు అని అందుకే అన్నాను. చిన్నప్పుడు అన్వేషిత సీరియల్ చూసిన తరువాత హారర్ సినిమాలు, సీరియళ్ళు చూడడం మానేశాను.
ఇక పరమ విడ్డూరం ఎంటంటే, ఏజెంట్ స్మిత్ కూడా వుంటాడు ఈ సినిమాలో. నిజ్జం!
అదరగొట్టేసారు….
చాలా మంది లాగా అరుంధతి బాధితులలో నేనూ ఒకడ్ని.
నవతరంగం ఒక స్టాండర్డ్ అనుకొని ఇక్కడ రివ్యూ చదివి సినిమా చూసా!! కానీ విషయం తక్కువ హైప్ ఎక్కువ అని తెలిసింది.
మీ లాగ భావ వ్యక్తీకరణ చేతకాని సగటు ప్రేక్షకుడ్ని కాబట్టి మనసులోనే కుమిలి పొయ్యా.
అన్ని సైట్స్ లో అన్ని రకాల రివ్యూస్ చదివి ఇంక వుండబట్టలేక కామెంటెట్టాల్సి వచ్చింది. మీ ఘోషను నేను అర్థం చేసుకోగలిగాను. ఎందుకంటే నాది కూడా సిమిలర్ ఘోషనే!
అనుష్క ని డిఫరెంట్ గా ప్రెసెంట్ చేసారు అని ఇక్కడి పూర్వ వ్యాసాలల్లో చదివి ఏదో వూహించుకుని వెళ్ళా కానీ అక్కడేం లేదు. అఘోరా సోనుసూద్ అరుంధతి పెళ్ళి కి వచ్చినప్పుడు భయమో ఏడుపో కోపమో పగో ఆశ్చర్యమో ఏదీ తెలియని ఒక రకమైన ఎక్ష్ప్రెషన్ అరుంధతి/ అనుష్క ఫేస్ లో చూసి పండుగాడి దెబ్బ తర్వాత మళ్ళోసారి మైండ్ బ్లాక్ ఐపోయింది. అసలు సినిమా అంతా అర్థం కాని అదోరకమైన ఎక్ష్ప్రెషనే గొప్ప నటన అనుకునే అమాయకత్వంలో నవతరంగం ప్రేక్షకులు/వీక్షకులు/పాఠకులు వున్నారని నేను మటుకు అనుకోను. దానికంటే మునుపు సినిమాలల్లో కవ్వించే టైప్ పాత్రల్లోనే కనీసం ఒకరకం ప్రేక్షకులకు అందాల్సిన (భావం)నటన అందిందేమో. గ్రా”ఫిక్సు” పర్లేదు. నచ్చింది రవిశంకర్ డబ్బింగ్ మాత్రమే కానీ సోనుసూద్ నటనేంలేదు అక్కడ.
మాగ్నమోపస్, వెండితెర అద్భుతం, పకడ్బంది స్క్రీన్ ప్లే, అమోఘమైన నటన, నరాలు తెగే వుత్కంఠ ఇలాంటివి చదివి సినిమా చూసిన వారికి ఒకింత అసహనం సదరు రాసిన వారిపై కలగడం లో కుడా తప్పేం లేదు అనుకుంటున్నా.
పకడ్బంది మార్కెటింగ్, అద్భుతమైన హైప్, అమాయక ప్రేక్షకులు వెరసి అరుంధతి హిట్. అంతకు మించి ఏమీ చెప్పుకోనవసరం లేని ఒకానొక సాధారణ సినిమా.
వంద రెండొందల రూపాయల ధనం మూడునాలుగు గంటల సమయం వెచ్చించినపుడు దానికి తగిన ప్రతిఫలం పావల కూడ లేకపోతే అక్కసు వెళ్ళబోసుకోవడం కూడ తప్పేనా?? ఆ మాత్రానికే నాట్ డూయర్స్, సెన్సిబిలిటి లాంటి పెద్ద పెద్ద పదాలు వాడాల్సి రావడం అసందర్భోచితం. పాతిక రూపాయలు పెట్టి చీప్ లిక్కర్ కొనేవాడు కూడా దానికి తగిన కిక్ ఎక్కాలనే కోరుకుంటాడు కదా. ఆమాత్రం హక్కు కూడా సగటు సినీ ప్రేక్షకుడికి లేదా?
రవి
ఫుల్ కామెడి సినిమా గురించి ఇంత చర్చా??
ప్రతీ సినిమా ఒక రకానికి చెందుతుంది. ఒక హారర్ సినిమాని తీసుకొని మరొకలాగ వుండాలనకూడదు. ముఖ్యమైన సమస్య – పెద్దలకు మాత్రమే అనకపోవడము, పెద్దలు ఇటువంటి సినిమాలకు పిల్లలను తీసుకువెల్లడము. మరొక విషయము – ఈకాలం పిల్లలు చాలా తెలివైనవాళ్ళు, ఒక్క సినిమాతోనే అన్నీ నిర్ణయాలు తీసుకుంటారనుకోకూడదు. ఇలాగైతే ఇంటెర్నెట్ మీద మరింత ఘోరాలు వుంటాయి. మన పొలిటిక్సు మరింత ఘూరం. ఆవి మరింత దారుణంగా పిల్లలను పాడుచేస్తున్నాయి – వాటికేమంటారు?
పిల్లలకు నేర్పించాల్సింది విచక్షణాజ్ణానం, జ్ణానం. చెడుని చూపించకుండా ఎన్నాళ్ళు కాపాడగలరు? ఈ ఓక్క సినిమా గురించి అనడంలేదు (ఇది మాత్రం పిల్లలు చూడదగినది కాదు). అలాగే ఈసినిమా లాటి సబ్జెక్టు గురించి చర్చించడం మంచిది. జ్ణానానికి, మించిన మందు లేదు
మనం చెత్త పారపోస్తాం. మనం ఆచెత్త ని చీదరించుకుంటూ తిరుగుతాము. కాని ఆ చెత్త ని ఎగబడి ఏరుకునేవారున్నారు. ఏరుకునే కంపెనీ లున్నాయి. అంటే చెప్పవచ్చేదేమిటంటే చెత్త కొందరికయినా పనికిరావచ్చు. గోదావరి నచ్చని వారున్నారు ఆనంద్ అసహ్యంగా ఉందన్నవారు ఉన్నారు. అరుంధతి చెత్తలో మాణిక్యం కాదంటారా. టెక్నికల్ మాష్టర్ పీస్ కాదా (తెలుగులో). అనుష్క , సోనూ, సాయాజీ ల నటన, ఫొటోగ్రఫీ, టెక్నికల్ అడ్వాన్స్ మెంట్ గమనించండి. కద విషయం పక్కన పెట్టండి. ఓ సూపర్ కన్నా, సిద్దూ ఫ్రం శ్రీకాకుళం కన్నా వందరెట్లయినా బాగా లేదా!!
@ నీలవేణి గారు,
ఏ వయస్సులో చెప్పాల్సినవి ఆ వయస్సులో చెప్పాలి. ఐదేళ్ళ పిల్లలకు రేప్ గుఱించి సవివరంగా వివరిస్తామా? కనీసం సెక్స్ గురించైనా చెప్పమే, అలాంటప్పుడు అలాంటి సినిమాలైనా ఎందుకు చూపిస్తాం? చూడు బాబు దేశంలో ఇలాంటి రౌడీ వెధవలు వున్నారంటూ ప్రతి సినిమాలో అత్యాచారపు సీన్లు పెడితే, వారికి సంఘంపై ఏర్పాడే అభిప్రాయం ఏంటంట?, వారు గాంధీగారు ఊహించినట్లు ధైర్యవంతులు ఎలా అవుతారు? నేను అమెరికా నుండి తిరిగి వచ్చినప్పుడు, అక్కడి మనవాళ్ళు మన దేశం గుఱించి చాలా దారుణంగా ఉంటుందని ఊహించుకుంటారని గమనించాను, నేనే భయపడేవాణ్ణి. భారతం అమెరికా కంటే కూడా safe అని తరువాత తెలిసింది నాకు. కానీ అక్కడి మన వాళ్ళు, అక్కడున్నప్పుడు నేను సైతం, మన పోకిరి వంటి సినిమాలు చూసి, హైదరాబాదు నిండా రౌడీ వెధవలు వుంటారేమో అని subconscious గా అనుకునేవారం.
ఈ కాలపు పిల్లలు చాలా తెలివైన వారనడం ఉత్త అమాయకత్వం. దేవుడు ఒక్క తరం తోనే, సరే ఇక రాబోయే తరాలు చాలా తెలివగా వుంటాయి అనుకున్నాడా ఏం. Kids are losing their innocence much earlier, and we are mistaking it for తెలివితేటలు. మన రాజకీయం ఘేరమంటున్నారు, రాజకీయాల్లో బహిరంగంగా ఏం జరగవుగా, దాపరికంగానే జరుగుతాయి అంతా. మొత్తానికి ఇలా child psychology ని పట్టించుకోని మన జాతి, యాసిడ్ దాడుల రూపంలో ఘోరాపరాధం చెల్లించాల్సి వుంటుంది.
@వేంకట ఉప్పలూరి,
నవతరంగం మూల సిద్ధాంతం – మాస్టర్ పీసు అంటే మాస్టర్ పీసే. తెలుఁగులో మాస్టర్ పీసు కానీ ప్రపంచ స్థాయిలో కాదు అనే వాదన మాకు అర్థంకాదు. శంకరాభరణం మాస్టర్ పీస్. అంతే! తెలుఁగు సినిమాతో పోల్చుకుంటే మాస్టర్ పీస్, ప్రపంచ సినిమా స్థాయిలో కాదు అన్న వాదన, ఈ సైటులో కుందేటి కొమ్ము. కనీస స్టోరీ టెల్లింగ్ నియమాలు పాటించని సినిమా మాస్టర్ పీసా, బీరకాయ పీచు కాదు. దీన్ని గొప్ప సినిమా అని చెప్పి మన ఆణిముత్యాలను కించపరచుకోవడం ఎందుకు.
నిన్ననే మంచి మనసులు సినిమా చూసాను. అరుంధతి చూసి తెచ్చుకున్న మైండ్ బ్లాక్ తొలగిపోయింది. అవండి నటనలు – ఎస్వి రంగారావు, సావిత్రి, షావుకారు జానకి, నాగేశ్వర రావు వారు మంచి నటులు. వరుసగా మన భాషలో మన నుడికారంలో నాలుగు మాటలాడలేనివారిని పట్టుకొని గొప్ప నటులు అంటే ఎంటీయార్ అభిమానిగా, చిరంజీవి అభిమానిగా, భాషాభిమానిగా నాకు చాలా చిరాకు వస్తుంది.
ఇక సూపర్ లాంటి సినిమాతో పోల్చి, బాగుందనడం నవతరంగంలో మాకు చేతఁగాదు.
—
ఇన్ని మాటలెందుకులే, ఒక రోజు నేనే(మేమే) సినిమా తీసి చూపిస్తాను(ము), ఆ రోజు మీరు నా(మా) మీదనిలాంటి వ్యాసమొకటి భారి ఎత్తున వ్రాయండి, నేను(మేము) కూడా వచ్చి వ్యాఖ్యానిస్తాను(ము).
నేను ఈ చిత్రం ఒక ఆణిముత్యం అని అనలేదు. లేదా మరే ఆణిముత్యాలతోను పోల్చలేదు. ఈ మధ్య లేక ఈ సంవత్సరం లో వచ్చిన సినిమాలలో చిత్రరాజమే. మీరు ఒప్పుకున్నా లేకపోయినా ఆంధ్రా జనం మటుకు జేజేలు పలుకుతున్నారు. మల్లెమాల సుందరరామిరెడ్డి, శ్యామ సుందర రెడ్డి ఎన్నో మంచి చిత్రాలు తీశారు. ఇది వారి తలపాగ లో ఒక కలికితురాయిగానే మిగిలిపోయింది. ….. భాష రానంతమాత్రాన నటులు కాలేరంటారా…… ఇక నవతరంగం హంస పాలు తాగి నీరు వదిలినట్లు ఒక సినిమాలో ఉన్న మంచి ని గ్రహిస్తుందని ఆశిస్తున్నాను. మనలో ఓ మాట అంజి గురించి మీ అభిప్రాయం తెలుసుకోవాలని ఉంది. మరో విషయం… ఆపిల్ ని ఆపిల్ తో పోలిస్తే బాగుంటుంది గాని ఆరెంజ్ తో కాదు గదా. అటువంటప్పుడు అరుంధతిని మంచి మనసులతో పోల్చలేము.
ఆఖరి మాట మీ సినిమా గురించి ఎదురు చూస్తాను..దాని మీద నేనెటువంటి వ్యాఖ్యలు చెయ్యను.. ప్రామిస్
మాష్టర్ పీస్ కు నాకు తెల్సిన అర్ధాలు ఇవే
Work of Art
Masterwork
Magnum Opus
Work of genius
Tour de force
Stunning success
నేను కేవలం ఈ సినిమా గురించి స్పెసిఫిక్ గా వ్రాయదలచుకోలేదు. ఎందుకంటే నేను చిన్నప్పుడే హారర్ సినిమాలు, సీరియళ్ళు చూడడం మానేశాను. భయం కలిగించే ఈ సినిమాలు కొంత మంది ఎలా చూస్తున్నారా అనేదే నా డౌట్. ఒక సన్నాసేమో భయంలో కూడా థ్రిల్ ఉంటుందన్నాడు. భయం పెరిగితే బి.పి. పెరుగుతుంది, గుండే కొట్టుకునే వేగం పెరుగుతుంది, మెదడులో విద్యుత్ ప్రసరణ కూడా పెరుగుతుంది, కానీ ఏ రకైమైన ఆనందం మాత్రం కలగదు.
ఇది ఖచ్చితంగా చిన్న పిల్లలు చూడ తగిన సినిమా కాదు. కాస్తయినా గ్రాఫిక్స్ సెన్స్ ఉన్న నిర్మాత అది ప్రదర్శించడానికి ఉచితానుచితాలు ఆలోచించకుండా ఇటువంటి కధావస్తువు ఎన్నుకోడం బాధపడాల్సిన విషయం. ఇక సెన్సార్ వారు A ఇచ్చినా మన ధియేటర్సు లో ఆ నియమాలు అమలు పరచరు కనుక పిల్లలు ఈ సినిమా భారిన పడటం అనివార్యం.. ఇదే విషయమై టీవీ లలో పత్రికలలో కొందరు విడుదల అయిన దగ్గర నుండి మొత్తుకుంటున్నారు కాని సినిమా పబ్లిసిటీ హోరు లో వాళ్ళ మొత్తుకోళ్ళు అరణ్య రోదనే అయింది ఎవరూ పట్టించుకోలేదు.
ఇక మీరు చెప్పిన చిల్లుల విషయానికి వస్తే…
“అవతార స్త్రీ అయిన జేజమ్మ, తన గురుణి తనకు ‘నేర్పకుండా చనిపోయిన‘ విద్య, తన గురిణి స్వయంగా నేర్చినా పెరుమాళ్ళకే తెలిసిన కారణం చేత సమయానికి ఉపయోగించని విద్యా వాడి ఆ దుష్టుడను చంపినంత పనీ చేస్తుంది, కోకలతోనే!”
ఆ పదమూడేళ్ళ వయసు లోనే జేజెమ్మ ఆ విద్య ఉపయోగించినట్లు చూపిస్తే మీరు ఈ మాట అనవచ్చు… కానీ వాడికి శిక్ష వేసి పంపేసిన తర్వాత మెల్లగా ఈవిడ ఈ విద్య వేరే గురువు వద్ద నేర్చుకుని ఉండచ్చు కదా… అది కూడా చూపిస్తే సినిమా నిడివి ఆరు గంటలుగా పెంచాల్సి వస్తుంది. అలానే గురువిణి కి ఆ విద్య ప్రదర్శించే అవకాశం లేదు ఎందుకంటే ముందే కత్తి తో పొడిచేస్తాడు కదా…
ఇక షాండ్లియర్ విషయానికి వస్తే, తన నాట్యంతో విలన్ ని మైమరపింప చేసి, గాజుపెంకు తో అతని నాలుకని కదలకుండా చేసిన తర్వాతే షాండ్లియర్ అతని మీద పడేలా చేసి భందిస్తుంది. మంత్రగాడికి నాలుక ముఖ్యమైనది కనుక అతని మంత్ర శక్తుల తో షాండ్లియర్ ని ఆప లేక పోయాడు అని అనుకోవచ్చేమో… అటువంటప్పుడు ఆత్మ అయ్యాక మంత్ర శక్తులు ఎలా పని చేసాయి అంటే నా దగ్గర జవాబు లేదు…
అలానే ఆత్మ జేజెమ్మ తో మాట్లాడినపుడు నేను చనిపోయి మూడు రోజులు అయింది అని చెపుతాడు కానీ ఆ సంఘటన జరిగిన మూడు రోజుల వరకూ తాను బతికి ఉన్నట్లు గా చెప్పినట్లు నాకు గుర్తు లేదు…
“వాడి ప్రేతాత్మ ఉనికి నిరర్ధకం చేయడానికి అరుంధతి (జేజమ్మ) లేకపోతే సరిపోతుంది. జేజమ్మ కూడా ఎక్కడో దూకి చస్తే సరిపోయేది.” ఇది ఈ సినిమా తీయాల్సిన అవసరం ఏమిటీ అనే ఆలోచన లో ఉన్నాం కనుక సరే అనిపిస్తుంది. కానీ ఇలా చేస్తే ఇక కధ ఏముంది.. గద్వాలు ను వాడి ఆత్మ భారి నుండి ఎవరు కాపాడతారు… జేజెమ్మ వాడి ప్రభావం తో ఊరు నాశనం కాకుండా కొన్ని సంవత్సారాలు కాపాడడానికి ఏమైనా చేసినట్లో లేకా అరుంధతి వాడి ఆత్మని నాశనం చెసే వరకూ ఊరు కష్టాలలో ఉన్నట్లో చూపిస్తే సరిపోయేది.
అన్నట్లు ఆనంద్, గోదావరి విషయం లో ఒప్పుకుంటాను కానీ హ్యాపీడేస్ విషయం లో మాత్రం శేఖర్ సెన్సిబిలిటీ కన్నా సేలబిలిటీ కి ప్రాముఖ్యతని ఇచ్చాడనిపించింది… చూద్దాం తరువాతి సినిమా లో దేనికి ప్రాముఖ్యతని ఇస్తాడో…
@ ఉప్పలురి వారు,
సినిమా తీసినపుడు మమ్మల్ని తప్పకుండా విమర్శించగలరు. విమర్శ లేకపోతే, తప్పులు ఎలా దిద్దుకోగలము.
@ వేణు శ్రీకాంత్,
గురువిణి విషయమై,
మొన్నొక మిత్రుడు గురుణి తప్పనుకుంట అన్నాడు. గురువిణి సరైనది అనకుంట. నెనర్లు.
ఆమె తరువాత విద్య నేర్చుకుందేమో అంటున్నారు. అలా ప్రేక్షకులు అనుకోవాలంటే కథనం వేరేలావుండాలి. సోనీ వేరే గురువిణిని (సంగీతం గురువు అనుకుందాం) చంపేసిన తరువాత, ఈమె దగ్గర నృత్యం నేర్చుకుంటున్నట్టు చూపాలి. శేఖర్ కమ్మల ఒక సారి ఇంటర్వూలో అన్నట్టు, “మధ్యలో ప్రేక్షకునికి ఇలాంటి సందేహాలు రాకూడదు, వచ్చిందంటే, నేను విఫలమయినట్టే” నని. కనీసం ఆయనకు ఆ స్పృహ వుంది. అబ్బే ఆవిడ తరువాత వేరే వారి దగ్గర నేర్చుకుంది అని దబాయించడు.
డాలర్ డ్రీమ్స్ నాకు చాలా బాగానచ్చింది. అచ్చం మీరు అన్నట్టు ఆయన వరుసగా కథలోని ఔచిత్యాన్ని తగ్గిస్తూ, వాణిజ్యతని పెంచుకుంటూవచ్చారు. అయినా సరే, ఆయనొక్కడికే, తనేమిచేస్తున్నడో తెలుసుననిపిస్తుంది. మిగిలిన వారందరూ మన ఇంద్రియాలతో యుద్ధం చేసేవారు.
పోకిరి వంటి సినిమాల్లోని హింసాఖాండ,
అరుంధతి వంటి విజుయల్లు, అలానే
ఒక వంద మంది కమెడియన్లు లేకండా మంచి సినిమా తీయగల సత్తావుంది.
ఈ మధ్య ఇలాంటి వాళ్ళు ఇంకా రావడం ఆనంద కరంగా వుంది. అష్టా చమ్మా, గమ్యం వంటి సినిమాలు ఎంతో ఆశనిచ్చాయి, శ్రీను వైట్ల రెడి కూడా నాకు బాగా నచ్చింది. అవి మూడూ చూసిన తరువాత తెలుఁగు సినిమా మీదన మంచి అభిప్రాయం ఏర్పడి ఎక్కువ చూడడం మొదలు పెట్టాను. శశిరేఖా పరిణయం, కొత్త బంగారు లోకం, మస్కా, బిల్లా వంటి పెంట సినిమాల వలలో పడిపోయాను. ఇప్పుడు అరుంధతి. ఇప్పుడప్పుడే తెలుఁగు సినిమా చూసే ధైర్యం లేదు.
- రా.రా.
అరుంధతి సినిమా మీద ఇంత చర్చ ఎందుకో అర్థం కావడంలేదు. సినిమా నచ్చింతే చూడాలి, లేకపోతే మానెయ్యాలి. అయినా సినిమాలు వినోదం కోసమే కానీ సమాజాన్ని బాగుచేయడం కోసం ఎవరు తీస్తున్నారు. అది ఈ కాలంలో అయినా మరే కాలం అయినా సరే. కొందకచో కొన్ని మంచి చిత్రాలు వచ్చాయి అన్నది నిర్వివాదాంశం అయినప్పటికీ, ఆ మంచి సినిమాలు రావాలంటే ఇలాంటి చెత్త సినిమాలు (కొంతమంది అభిప్రాయం ప్రకారం) అవసరం ఎంతైనా వుంది. తీపి విలువ చేదు తిన్న తర్వాత బాగా తెలుస్తుంది మరి. ఇక ఆచేదుకూడా ఒక రుచే అనుకొని షడ్రుచులూ తినేవారికి అది కూడా అవసరమే.
ఇక సినిమాలో వున్న హింస, మూఢనమ్మకాలగురించి అంటారా? అది కేవల్ సినిమా. అసలు ఆంగ్లములో సినిమాలతో పోలిస్తే, ఇది ఏపాటి. మనుషులను ముక్కలు ముక్కలుగా నరికే చిత్రాలదగ్గరనుండి, అత్యంత హేయమైన సినిమాల వరకూ అన్నీ వుంటాయి. కాకపోతే అక్కడ జనాలు వారికి నచ్చినవి మాత్రమే చూసి, మిగిలిన వాటిని చూడడం మానేస్తారనుకుంట. మమ్మీ సినిమా చూడండి. అందులోనూ మంత్రాలూ తంత్రాలూ వుంటాయి. చచ్చినవాల్లు బతికి రావడాలు, క్షుద్ర విద్యలూ అన్నీ వుంటాయి. కానీ దాన్ని ఎవరూ అంత సీరియస్ తీసుకోలేదు. ఎందుకంటె సినిమాలు దేనికో వారికి తెలుసుకాబట్టి అనుకోవాలేమో?
అయినా సినిమాలన్నీ పాతాలభైరవిలానో, గోదావరి, హ్యాపీ దేస్ లానో వుండాలంటే ఎలా? ఒకవేల అలా తిసినా కొన్ని రోజులకే జనాలకు మొహం మొత్తి, సినిమా ఇండుస్త్రీ ఉనికికే ప్రమాదం ఏర్పడుతుంది.
మరి, ఇలాంతి చెత్త చిత్రాలు చూసి పిల్లలు చెడిపోవలసిందేనా అంటారా? కేవలం సినిమాలవల్ల పిల్లలు చేదిపోతారు అనే దాన్ని నేను నమ్మను. పిల్ల ప్రవర్థనపై వారి తల్లిదండ్రుల ప్రభావమే ఎక్కువ, ఆతర్వాతే ఈ సినిమాలూ, సీరియల్లు. పిల్లలకు చక్కని విలువలను నేర్పించాలి. సినిమాలు కేవలం వినోదంకోసమే కానీ అవినిజమని కాదని విడమరిచి చెప్పాలి.
మహేష్ గారు చెప్పినదానితో నేనూ ఏకీభవిస్తున్నాను. అంతేకాదు, ఇంగ్లీషు సినిమాల లాగ అన్ని రకాల సినిమాలు తీసేలా వుండాలి అన్నది నా అభిప్రాయం. అప్పుడు కుటుంబ కథా చిత్రాలలో కేవలం కుటుంబ విలువలే వుండేలా సినిమాలు వస్తాయి. హింస, సృగారంలాంటి వాటిని కుటుంబ కథా చిత్రాలలో చొప్పించి అమ్ముకోవాల్సిన అవరసం వుండదు. సినిమా రేటింగ్ కూడా, ఇప్పుడున్న దాన్ని వదిలేసి, ఇంగ్లీషు చిత్రాలకున్నాట్లు ఎం.పి.పి.ఏ రేటింగ్ లాంటివి వుండాలి. పెద్దల సినిమాలకు చిన్న పిల్లలను అనుమతించ కుండా థియేటరు యాజమాన్యం ష్రద్ద తీసుకోవాలి. నిమాలను ఉల్లంఘించిన థియేటర్ల పైన, వాటి యజమానులపైనా కఠిన చర్యలు తీసుకోవాలి.
@ మార్థాండ
మీకు సినిమా నచ్చకపోతే అది మీ వ్యక్తిగత విషయం. అంతే కానీ, ఇలా ఆసినిమాలు చూసే వారందరినీ కించ పరచడం అవసరమా? మీరు కూడా మావో ఇజమని, స్టాలినిజమని, రక రకాల ఇజాలతో స్త్రీయే పురుషుడ్ని రేప్ చేయాలని చెప్పడమే కాక, కొంతమందిని తమ వ్యాఖ్యాలలో ప్రోత్సహించారు కూడాను!! మరి ఈ విచిత్రమైన (ఒక రకంగా, చండాలమైన) అభిప్రాయలను వ్యక్త పరచిన మీకు, ఆ … తినే, సామెత వర్తించదా మహాశయా?
నవతరంగం ప్రేక్షకుడి భావనల్ని పంచుకునే వేదిక. కాబట్టి ఇక్కడ భిన్నస్వరాలూ, భిన్నధృక్పధాలూ వినిపించడం సహజం. ఇలాంటి భిన్నత్వం లేకపోతే మనసినిమాల్లాగా నవతరంగం చప్పబడిపోదూ!
అరుంధతి గొప్ప చిత్రం కాదు.అత్యుత్తమ చిత్రం అసలు కాదు.కానీ, ఈ సంవత్సరం వచ్చిన సినిమాల్లో కెల్లా అరుదైన చిత్రం. కథలో తర్కం తన్నుండొచ్చు. కానీ, ఎస్కేపిజానికి దగ్గరగా కథ ఉంటేనేదాన్ని ఫ్యాంటసీ అంటారుకాబట్టి, తర్కాన్ని బుట్టలో పెట్టాల్సిందే. అనుష్క నటన సావిత్రిని తలిపించకపోవచ్చు. కానీ, పాత్రకు తగ్గట్లు ప్రయత్నించింది అన్న సహనంతో ఈ సినిమాని భరించడం జరుగుతోంది. నవతరంగంలో వచ్చిన మొదటి సమీక్ష (నేను రాసిందే) లో కూడా ఇదే చెప్పడం జరిగింది.
@ఆకాశరామన్న
నేనెన్నడూ స్త్రీలని కించపరిచే వ్రాతలు వ్రాయలేదు. చలం గారి సాహిత్యం గురించి వ్రాస్తేనే అది బూతు అని విమర్శించారు. మహేషు ఇంతకు ముందు కూడా నిజం బూతుని సమర్థిస్తూ వ్రాతలు వ్రాశాడు.
http://telugu-blog.pkmct.net/2009/04/blog-post_13.html
@ ఆకాశ రామన్న గారు,
ఇంత చర్చ ఎందుకో అర్థంకాదు అంటునే మీరు చర్చకి ఆజ్యం పోసారు.
నేను Pirates of the Caribbean కి వీరాభిమానిని, Capt. Jack Sparrow నా దేవుడు.
ఇక భారత రామాయణాలైతే చెప్పనక్కర లేదు. అలాంటి Fantasy అభిమానికి ఇలాంటి సినిమాలు చూపిస్తే జుగుప్సే కలుగుతుంది. నేను పది సార్లు నొక్కి మఱీ చెప్పాను. కథా రచయితలకు మానవాతీత శక్తులతో కథ వ్రాసేటప్పుడు ఎలాంటి నియమాలు పాటించాలో తెలియదని. మీకు ఆ పాయింటు అస్సులు అర్థం కాలేదని నాకు అర్థమయ్యింది. మనిద్దరం ఒకే వేదిక పైన లేము కాబట్టి, మన మధ్యన చర్చ అసంభవం.
- హాస్తా లా వీస్తా ఆలా బిల్లా.
@మార్తాండ: చర్చ అరుంధతి సినిమా గురించి.దానిలోని కథాకథనంతో సహా ఇతర సాంకేతిక విషయాల గురించి. సెన్సారు A సర్టిఫికేట్ ఇచ్చిన్నా పెద్దలు పిల్లలకు చూపిస్తున్న తీరు గురించి. మధ్యలో మీరు అశ్లీలం, చలం అంటూ ఏవేవో మాటలు మాట్లాడేస్తున్నారు.
సినిమా ఒకరికి నచ్చకపోవచ్చు మరొకరికి నచ్చొచ్చు. వారివారి నేపధ్యాలను బట్టి వివిధరకాలుగా విశ్లేషించొచ్చు. వారికున్న సినిమా పరిజ్ఞానాన్ని బట్టి సమీక్షించొచ్చు. దాన్నొక అభిప్రాయంగా point of view గా తీసుకోకుండా, దాన్నుంచీ నైతిక విలువల ఛాంధసవాదాన్ని ప్రేరేపించి మిగతా అభిప్రాయాలను aberrations (పెంటతినడం) అనడం వ్యక్తుల్ని కించపరచడం అవుతుంది. అది మీకు అలవాటైన ప్రక్రియే అయినా ఇక్కడ అది చెయ్యకపొవడం మంచిదని గ్రహించగలరు.
abba.. super discussins..continue….
నేను అరు౦ధతి సినిమా సూడలేదుగాన౦డి, మీరు (కామె౦ట్లు రాసినోళ్ళ౦దరు) మాత్ర౦ మా౦చి సూపర్ హిట్ సినిమా సూపి౦చార౦డి. ఆయ్! జోకులు, కేకలు, బోలెడన్ని ఫైట్లు అబ్బో….బెమ్మా౦డ౦!! ఇ౦తకీ క్లైమాక్స్ ఎప్పుడో ?!(అదేన౦డి ఆఖరి కామె౦టు)!
రాకేశ్వర గారు మీరు చెప్పింది నిజమే కాని శేఖర్ చెప్పిన విధం గా సినిమా తీయడమనేది బౌండ్ స్క్రిప్ట్ తో సెట్స్ మీదకి వెళ్ళి యధా తధంగా సినిమా తీసే వాళ్ళ విషయం లో సాధ్యమేమో కానీ.. మా నిర్మాత కి నచ్చ లేదు, నటీనటులకి నచ్చ లేదు మేకప్ మెన్ కి నచ్చ లేదు అని మూడొంతుల సినిమా రీషూట్ చేసాము అని గొప్పగా గర్వంగా చెప్పుకునే వారి విషయం లో అసాధ్యం.
శేఖర్ విషయం లో మీరు చెప్పింది నిజమే ఈ రోజులలో వచ్చే సినిమా ల్లో అతని సినిమా ఒక్కటే ధైర్యం గా చూడచ్చు.
అన్నట్లు ఆకాశమంత సినిమా చూసారా.. ఈ మధ్య వచ్చిన వాటిలో కాస్త అక్కడక్కడా కాస్త ఓవర్ యాక్షన్ ని మినహాయిస్తే ఈ సినిమా నాకు బాగా నచ్చింది… తమిళ వాసనలు కాస్త ఉన్నా, దర్శకుడు హాయిగా ఓ పార్కు లో కూర్చో బెట్టి సునిశితమైన హాస్యాన్ని రంగరించి చక్కని కధ చెప్పాడు. ఒక వేళ చూసి ఉండక పోతే చూడండి.
ఆబ్బో…. మా అనుష్కా డ్యాన్సు మటుకు కేక.,., కాళ్ళకి ఏదో అడ్డుపడినట్టు.,,. చెప్పు తెగిపోయినట్టు,.,. ధభీ ధభీ గెంతులు,., కుంచం డ్యాన్సు వచ్చిన అమ్మాయిని పెట్టి ఉంటే బాగుండేది.,,.
http://newjings.blogspot.com/2009/02/blog-post_11.html
అరుంధతి సినిమా శ్రీకాకుళంలో అరవై రోజులు పైగా ఆడింది. థియేటర్ కి వెళ్ళి చూశాను. అక్కడ జనం మరీ అంత ఎక్కువగా లేరు కానీ సినిమాకి పబ్లిసిటీ ఎక్కువ ఇచ్చిన తరువాత అన్ని రోజులు వెయ్యకపోతే బాగుండదు అనుకుని అన్ని రోజులు ఆడించినట్టు ఉన్నారు.
నేను ఈ సినిమా చూడలేక పోయానని ఉండే కొద్ది పాటి దిగులు వట్టిదేనని ఊరట కలిగింది
బిజినెస్ పనులు మానుకుని అనవసరంగా థియేటర్ కి వెళ్ళానని నాకు కూడా అనిపించింది.
I don’t want to be repeating myself but I just wanted arundhathi comments I posted ealier elsewhere on blogosphere to be in one place for me to backtrack. They don’t have anything that hasn’t been already said in Rakes’s post or some of the comments by Ravi et al.
Comment No. 2: అసలింతకీ సినిమా మెయిన్ కాన్సెప్టు, అఘొరా తాలూకు విలనిజాన్ని అడ్డుకోవటానికి సజీవసమాధి చేయటం, రక్షలు, యంత్రాలు etc తో కట్టడి చేయటం, ఆఖర్లో వాడు బయటకి వస్తే ఏదో మహా ప్రళయం సృష్టించాలనుకోవటం. కానీ నాకు అర్థంకానిది ఏంటంటే, సమాధి కట్టి ఎలా కట్టడి చేయగలిగారూ (ఎవర్నో అమ్మాయిని మాయం చేస్తాడు, పెళ్ళి హడావిడి పాటలో హైదరాబాద్ దాక వచ్చి హీరోయిన్ని చూపుల్తో ఆస్వాదిస్తుంటాడూ, వాళ్ళ తాత నడ్డి విరగకొడతాడూ, హీరోయిన్కి ఫోన్స్ చేస్తుంటాడూ, అసలు జేజమ్మ ఉన్న కాలంలోనే కరువుకాటకాలకి కారణం అవుతాడూ etc, etc), బయటకి వచ్చి లోపలున్నప్పటికన్నా ఘోరమైన పనులు ఏమి చేసాడు, ముసలి బొమ్మాళిని చంపడం, హీరోయిన్ ఫ్యామిలీని కిడ్నాప్ చేయటం తప్ప? గ్రాఫిక్స్ అయితే చాలా లేకిగా అనిపించాయి. సోనూ సూద్ ఇరగదీసేసాడూ, చాలా పెద్ద క్యారెక్టర్ ఇచ్చారు అని ఎక్కడ చూసిన ఊదరగొట్టేస్తున్నారు. ఇచ్చింది సోనూ సూద్కా, డబ్బింగ్ చెప్పినతనకా? విలన్ గొంతు మాత్రం సినిమా అంతా అరుస్తుంటుంది, బొమ్మాళీ నిన్ను వదల అని కానీ, సోనూ సూద్ స్క్రీన్టైం ఎంత, ఫ్లాష్బ్యాక్లొ అండ్ క్లైమాక్స్లో కలిపి, 15 mins?
Comment No. 1 నేను నిన్న అరుంధతి చూసాను. చూడనివాళ్ళు కంగారేం పడక్కర్లేదు, చూడనంతమాత్రాన పెద్దగా ఏం miss అవటం లేదు. జనాలు అంతలా hype ఎందుకిస్తున్నారో అర్థం కావటంలేదు perfectionist, passionate producer etc అని. Producer మాత్రమే కాదు director కూడా శ్యాంప్రసాద్ రెడ్డే, కోడి రామకృష్ణ పేరు మాత్రం వేసారు అని నా doubt. కథకి సంబంధం లేని comedy tracks, extra songs లేవనేగానీ, పెద్దగా ఏం లేదు సినిమాలో. Just any other regular telugu movie with all its inconsistancies, immature direction, non-performing hero/heroine/villain. graphics అని ఊదరగొట్టేస్తున్నారు కాని మన చిన్నప్పట్నుంచి చూస్తున్నవాటికన్నా పెద్దగా గొప్పగా ఏం అనిపించలేదు నాకు. ఇంక తెలుగు ఖూని గురించి చెప్పక్కర్లేదు. ఇప్పటి సినిమాల్లో 4,5,6,7,8,9,10 చోట్ల తప్పులతడకల తెలుగు ఉన్నా కూడా పర్వాలేదు అనుకుందాం. కాని సినిమా అంతా ఇంచుమించు నాకలాగే అనిపించింది మరి. వెన్నముక్క నుంచి ఆయుధం తెలుసా.. వెన్నముక్క నెయ్యిముక్క ఏంటి అని అడగకూడదు, అది వెన్నెముక. మురుగ సీర మాసం (మృగశిర), ధుర్మరనం (దుర్మరణం), కులత (కులత ఏంటీ కొలత లాగ అనుకొవద్దు, అది కులట), సమస్తానాం (సంస్థానం) తెలుసా? ఇలా ఎన్నో, సినిమా అంతా. మన సినిమాలు అంతే, గొంగట్లొ కూర్చుని వెంట్రుకలు ఏరుకోకూడదు అంటారా. అవును మామూలు సినిమాల్లో ఉంటే “ఎహె అన్ని ఒకటే గోల” అనుకోవచ్చూ, కళ్ళూ, చెవులూ మూసుకుని సినిమా చూసేయ్యొచ్చు ఎప్పట్లాగే. కాని మరి perfectionist, most passionate abt telugu cinema అని తెలుగు సినిమాని, చూస్తున్న జనాలని ఉద్ధరిస్తున్నట్టు ఊరంతా, టీవీల్లో, రేడియోల్లో టంకు వేయించుకుంటున్నపుడు ఇలా imperfectగా, inconsistantగా, lacklusterగా ఎలా తీసాడు మరి?.. మేమింతే, ఇలాగే తీస్తాం/తీయగలం, వీటిల్లోనే better/best ఏరుకోండి అన్నప్పుడు మరి ఆ పిస్తా పోజూ, హైపూ ఇవ్వకూడదు.
- అసలు మనోరమ పాత్ర ఫ్లాషు బ్యాకు లో ఎక్కడా కనిపించదు. కానీ మనోరమ, తను జేజమ్మకి ఆంతరంగికురాలినన్నట్టు కోసేస్తూ ఉంటుంది.
- నెత్తి మీద కొబ్బరికాయలు పగులగొట్టే
ఆ సినిమా పోస్టర్ మీద అతి పెద్ద డాన్స్ షో అని వ్రాసారు కానీ డాన్స్ కూడా తొక్క లాగ ఉంది.
THE POST IS VERY GOOD…BYE
@ చేతన గారు,
మీరు కేమరా చేతన గారా? నేనిప్పుడే గమనించాను. మీరు నిజ్జంగా మళ్ళీ పోటోలు తీయడం మొదలు పెట్టాలని నా కోరిక. మీ కమెంటులు చాలా బాగున్నాయి. ఇది నిజంగా బాధితుల సంఘంగానే అవతరించింది. అన్నట్టు కొన్ని చోట్ల పనిమనుషుల మాటల్లో తద్భవాలు వాడడం పెద్ద తప్పు కాదనుకుంటాను.
@श्रीनिवास गारु
మీ కమెంటు సగమే పడినట్టుంది. ఆంతరంగికురాలు అనే పదం బాగుంది. మీ జీమెయిల్ ఐడి కూడా బాగుంది.
I think navatarangam should encourage better authors with some maturity around movies. There will be thousand types of movies out there. Every movie cannot be watched from the same glasses. When director is trying to tell a story to audience, he will only concentrate on how to maximize the user experience, but the values, tokkaa, tosaaanam. If the author of this article is too much worried about all those things rather than a story in moving frames, he better watch TV serials.
ఆరు౦ధతి సినిమా నిన్న చూసాను. ఇటీవల వచ్చిన మిగతా సినిమాలతో పోలిస్తే ఇది ఫర్వాలేదు. కాని Magnum opus అన్న పద౦ ఈ సినిమాకి వాడడ౦ అ౦త బాగాలేదు. రొటీన్ కి భిన్న౦గా సినిమా తీసిన శ్యామ్ ప్రసాద్ ని మెచ్చుకోవచ్చు, అయితే ఇది మాస్టర్ పీస్ అన౦టే మన తెలుగు సినిమాని తక్కువ చేసినట్టే అవుతు౦ది. రాకేశ్వరరావు గారు చెప్పినట్టు సినిమాలో లాజిక్ అస్సలు కుదరలేదు.
మాగ్నం ఓపస్ కి పలు అర్దాలున్నాయి. అర్ధాల భావాలు ఒకటే అయినప్పటికి ఈ విషయానికి తగిన అర్ధం స్టన్నింగ్ సక్సెస్
@ వె౦కట్ ఉప్పలూరి
విజయ౦ సాధి౦చిన తరువాత Magnum opus అ౦టే Stunning success అనుకోవచ్చు. కాని విడుదలయిన మరుసటి రోజే ఆ పదాన్ని వాడారు మన మీడియా వారు. అ౦టే దానర్థ౦ Great work of art అని వస్తు౦ది.
ప్రముఖ రచయత దంపతులు “వసుంధర” ఈ చిత్రం పైన వ్రాసిన కబుర్లు:
http://edulent.net/Vasundhara/telugufilms/arundhati.pdf
పవన్ గారి కామెంట్ మాత్రం వెర్రి కేక (పాజిటివ్ అర్ధం లోనే సుమండీ) – అనుష్క నాట్యం గురించి ఎంత తక్కువ చెప్పుకుంటే అంత మంచిది. మీ హాస్య చతురత కి జోహారు (అనుష్క కి థాంక్స్ చెప్పాలి మిమ్మల్ని inspire చేసినందుకు
).
Quick Reference: “ఆబ్బో…. మా అనుష్కా డ్యాన్సు మటుకు కేక.,., కాళ్ళకి ఏదో అడ్డుపడినట్టు.,,. చెప్పు తెగిపోయినట్టు,.,. ధభీ ధభీ గెంతులు,., కుంచం డ్యాన్సు వచ్చిన అమ్మాయిని పెట్టి ఉంటే బాగుండేది.,,.”
@ విజయవర్ధన్ గారు,
వసుంధర గార్లకు ఈ సినిమా నాకులాగా అస్సలు నచ్చివుండదు. కానీ అందరూ రాజుగారి బట్టలను మెచ్చుకుంటుంటే, వీరు మాత్రం బట్టలు లేవనే సాహసం చేయలేక, ఇలాంటి రివ్యూ వ్రాసారనిపించింది. Euphemize చేసి వ్రాసినట్టుంది రివ్వూ
@ రామ,
సినిమాలో లాజిక్కుతో పోల్చుకుంటే నాట్యం చాలా బాగుందనాలి
@రాకేస్వర్రావు: “సమీక్ష, విమర్శ, పరిశీలన, వ్యాఖ్య.. ఈపదాలన్నిటికీ సూక్ష్మంగా పరిశీలిస్తే తేడాలు వుండొచ్చు. సమీక్ష అంటే సమ్యక్ ఈక్షతి అంటే చక్కగా పరిశీలించినది అని కొడవళ్ల హనుమంతరావుగారు ఈమాట.కాంలో వేలూరి నా పుస్తకంమీద చేసిన సమీక్ష మీద వ్యాఖ్యానించారు. (జనవరి 2009). కానీ స్థూలంగా వాడుకలో స్థిరపడిన అర్థాలు నాకు తెలిసినంతవరకూ – సమీక్ష అంటే కథలో ఏముందో సూక్ష్మంగా చెప్పడంతో సరిపోతుంది. సమీక్ష ధ్యేయం పాఠకులలో ఆ కథో పుస్తకమో చదవాలన్నఆసక్తి కలిగించడమే. విమర్శ తులనాత్మకంగా – అందులో గుణదోషాలు – ఎత్తి చూపుతుంది. కదాచితుగా విమర్శకుడు మరొక మెట్టు పైకి వెళ్లి, ఆ దోషాలు తొలగించే మార్గాలు కూడా సూచించవచ్చు.”
పూర్తి పాఠం కోసం….http://poddu.net/?p=2690
@jyothi and all.. !! నేను, నా పేరు చైతన్య , నవతరంగం వెబ్ సైట్ మొత్తం ఇవాలె చూసాను మరియు చదివాను. నాకు అర్దమయింది ఎందుకు ఇండియా ఇంకా ఇక్కడే ఉంది అని.. ఒక తప్పు గురించి వంద మంది మట్లాడతారు.. వంద మంచి పనులను గురించి ఒక్కడు మట్లాడతాడు. ఎందుకు అంటె ఈ వెబ్ సైటే చూసిన ప్రతి ఒక్కరు ఎదొ ఒక తప్పు గురించి చెప్పడం చూసాను.. మీకు నచ్చిన విషయం ఒకిటి కూడ లెదా ? సినెమాలు మారడం కాదు మీరు మారండి మీతొ కూడ సినెమాలు మారుతాయి.. సినెమాలతొ కొంచం అన్నా ఇండీయ మారుతుంది.. ! !! Everybody thinks of changing humanity…… n nobody thinks of changing himself !!
adedo kaanee baane unnattundi.
D
ammayya chala mande unnaru …nakem nachala ee movie ( pirated copy choosaa kada…ippudu godava cheyyocho ledo telidu ) …… technical ga anni defects unnayi …chetana garu , telugu padalu meeru cheppinavi appati bhashalo alane anali ..konni konni…poorthiga mistakes kavu avi ….
nenu ee movie hit kavadaniki karanam, anushka ni baga exploit chesaru …. anni vargalavariki kavalsina vidham ga aameni choopincharu …anduke hit anukontunnanu …
ok not bad that much take it easy
very good and sensible review
but u missed one point…
the reason for naming it arundhati… i heard…they want a name starting with letter “A” as per producer n banner’s sentiment…
anyway i wish u earn crores of money (than the one lakh u have now) and be a good producer
చాలా బాగుంది ఆర్టికల్. చెత్త సినిమాల గురించి ఇటువంటి ఆర్టికల్స్ రావడం దేశానికి చలా అవసరం. జై హింద్!
అఘోరాలు అంటే క్షుద్రపూజలు చేసేవారుఅని చూపారు. వాళ్ళ గొప్పతనం ఈ సినిమా రచయితలాకు తెలీదా? లేక పశుపతినే విలన్ గా చూపిన వాళ్ళకి ఇది పెద్ద కష్టమా అనుకోవాలి. అఘోరాలు కాపలికులు అనే శివాది షన్మతాలలొ ఒకరు.
nenu ee post chadavaledhu..kaani cinema choosaanu…..chetta cinemaaa…arundati,kotha bangaru lokam…ilaanti cinemaalu hit ante kadupu kaaluthundhi….
ee cheeralatho champadam, oka chinese picture ki anukarana.
aithey aa cinema lo heroin nijamga baga chesindhi.
Anushka arundhathi lo kante Billa lo correct ga suit ayyindhi. janmathaha vachina roudy moham kada mari…….
I would like to send this link to the producer of Arundhati. Anyone has his email address.
This is a no.1 waste movie. Inaddition the producer is trying to remake this movie in hindi.