ష్…ఇది చాలా మంచి ఊరు-సినిమా సమీక్ష
లేత వయసుల ప్రేమలు-వాటిని సమర్ధించే మతిలేని మాటలు, నాలుగు సుమోలు ఒక్కుదుటన ఇరవై అడుగులు పైకి లేచి ఒక దానితో ఒకటి ఢీ కొట్టుకుని పచ్చడైపోయినా-సుమోల్లో ఉన్న జనాలంతా హాయిగా దిగడం, కధకి ఏకోశానా సంబంధంలేని సన్నివేశాలను, వెకిలి హాస్యాలను – చూసి విసిగి పోయారా? అయితే ‘ష్’ చూడండి!
‘హైదరాబాద్ బ్లూస్’ నగేష్ కుకునూరి, ‘ఆనంద్’ శేఖర్ కమ్ముల, ‘గమ్యం’ క్రిష్ — వీరంతా యన్నారైలు. సినిమా మీద పిచ్చి ప్రేమతో వెనక్కొచ్చి మనకు మంచి చిత్రాలను అందించాలని ప్రయత్నిస్తున్న నవయువ దర్శకులు. హరిచరణ ప్రసాద్ వీరి సరసన సగర్వంగా చేర్చదగ్గ దర్శకుడు!
ఒక నంది అవార్ద్, ఉత్తమ ప్రాంతీయ చిత్రంగా జాతీయ అవార్డ్ లను గెలుచుకున్న ‘కమ్లీ’ చిత్రం హరిచరణ ప్రసాద్, సుకన్య – ‘అపూర్వ చిత్ర’ బేనర్ మీద కథకు ప్రాధాన్యతనిస్తూ నిర్మించిన మొదటి చిత్రం. ‘ష్…’ ఇది చాలా మంచి ఊరు నిర్మాతలుగా వారి ద్వితీయ ప్రయత్నం!
ఒక అందమైన యువతి, బంగారు కలలు కనే అమ్మాయి – ఇద్దరబ్బాయిల అక్రుత్యానికి బలైపోతుంది. చేసిన నేరాన్ని తండ్రుల సహకారంతో కప్పెట్టి, అందరూ కలిసి అమ్మాయి చెడ్డదని ప్రచారం చేస్తారు. అయితే ఆ చనిపోయిన అమ్మాయి, తన మీద వేసిన మచ్చను ఎలా తొలగించుకుంటుంది అన్న కథాంశాన్ని చెప్పడానికి అవసరమైన పాత్రలతో, సన్నివేశాలతో మాత్రమే అల్లిన సినిమా ‘ష్’.
ఒక కుర్ర డాక్టరు ఆనంద్, భార్య సునీత , కూతురు అప్పు లతో ఒక పల్లెటూర్లో అడుగు పెట్టి, ఊరి పెద్ద చూపించిన ఇంట్లో కాపురానికి దిగడంతో సినిమా మొదలౌతుంది.
దేవుడి మీద, అతీంద్రియ శక్తుల మీద నమ్మకంలేని డాక్టర్ – తనకు తారసపడే వరుస అనుభవాలను ఎలా అర్థం చేసుకోవాలో, దేనికి అన్వయించుకోవాలో తేల్చుకోలేక సతమతమౌతాడు. అతడికి జరగ బోయే విషయాలు ముందే తెలుస్తుంటాయి. కలత నిద్రలో కనిపించే దృశ్యాలు అతన్ని కలవర పరుస్తాయి. అతడి ప్రవర్తనను ఎలా అర్థం చేసుకోవాలో తెలియక, సునీత భర్తకు బ్రైన్ స్కానింగ్ కూడా చేయిస్తుంది. న్యూరోసర్జన్ అంతా సవ్యంగానే ఉందని చెబుతాడు.
డాక్టర్ కూతురు అప్పూకూడా ఇంట్లో ఎవరికీ తెలియని, పరిచయం లేని సీత తో మాట్లాడుతూ ఉంటుంది!
ముక్కలు ముక్కలుగా కనిపించిన దృశ్యాలను ఎలా కలుపుకుని పజిల్ ని ఛేదించాడు? చనిపోయిన అమ్మాయి మీద పడ్డ మచ్చ ఎలా తొలగి పోయింది అన్నది తెర మీద చూడాల్సిందే!
ఈ చిత్రంలో రెండు పాటలున్నాయి. సాహిత్యపరంగా, సంగీత పరంగా ఉన్నతంగా ఉన్నాయి. సందర్భానికి అతికినట్లు ఉండడం ఈ పాటల్లో మరో సొగసు!
‘ఎవరో… ఎవరో’ పాట ధియేటర్ నుంచీ బయటకొచ్చినా, మన చుట్టూ అల్లుకుని తిరుగుతూంటుంది. చిత్రీకరణ చాలా ఆహ్లాదకరంగా ఉంది. ‘ఊహల పల్లకీలో’ పాట వినడానికి బాగున్నా, చిత్రీకరణలో కెమెరా కదలికలు ఎక్కువయినట్లు అనిపించింది.
ఏ సినిమాకైనా సినిమాటోగ్రఫీ శరీరమైతే, నేపధ్య సంగీతం ఆత్మ లాంటిది. మిస్టరీ సినిమాలు ప్రేక్షకుడికిచ్చే అనుభూతి సాంద్రత ఈ రెండు కళల మేలవింపు మీదే ఎక్కువ ఆధారపడి ఉంటుంది
‘ష్…’లో మురళీమోహన్ రెడ్డి సినిమాటోగ్రఫీ బాగుంది, శ్రీవసంత్ అందించిన నేపధ్య సంగీతం బాగుంది. పైన చెప్పినట్లు పాటలకందించిన బాణీలు చాలా బాగున్నాయి. . సినిమాటోగ్రాఫర్ , సంగీత దర్శకులకు కూడా ఇది తొలి చిత్రం. అభినందనలు అందుకునే స్థాయిలో ఉన్న వీరి ప్రతిభ ముందు ముందు మరిన్ని మెరుగులు దిద్దుకుంటుందని ఆశిస్తున్నాను.
కథకు సంబంధం వున్న సన్నివేశాల సమాహారాన్నే సినిమాగా సమర్పించడం – ఈ సినిమాలో నాకు బాగా నచ్చిన విశేషం! ప్రేమ సినిమాలొకవైపు, యాక్శన్ సినిమాలు ఇంకో వైపు – రెంటినీ భిన్న పాళ్ళలో కలుపుకున్న మూడో రకం సినిమాలింకొక వైపు ప్రేక్షకుల మీద ముప్పేట దాడి కొనసాగిస్తున్న రోజుల్లో విభిన్న కథాంశంతో ఈ సినిమా నిర్మించిన నిర్మాతల ధైర్యాన్ని అభినందించాలి. నిర్మాతే దర్శకుడైతే చాలా విషయాల్లో రాజీ పడాల్సిన అవసరం పడదు.
భర్త, కూతురు ప్రవర్తనలను అర్థం చేసుకోలేక సతమతమయ్యే సునీత పాత్రకు మిధున న్యాయం చేసారు.
ఆనంద్ గా షఫీ ఫరవాలేదనిపించాడు.
సీతగా మాధవీలత సరిపోయింది. మాధవీలత నటించిన మొదటి సినిమా ఇది. దీని తర్వాత ‘నచ్చావులే’ సినిమాలో హీరోయిన్ గా నటించిందీమె!
‘అనుభవం కానిదంతా అసత్య’మనుకోవద్దనే పాత్రకు రూపాదేవి సరిపోయారు.
అప్పుగా వేసిన పాప నటన ప్రశంసనీయంగా ఉంది.
అక్కడక్కడ చిన్నచిన్న లోపాలు కనిపించినా, అవి కథనాన్ని, సినిమా ప్రయోజన్నాన్ని దెబ్బతీయలేదు. ఒక ఔత్సాహిక దర్శకుని తొలి ప్రయత్నాన్ని సమాదరించి ప్రోత్సహిస్తే, ముందు ముందు వీరింకా మంచి మంచి సినిమాలను మనకందిస్తారని ఆశించడం అత్యాశ కాదేమో!
- శ్రీచక్ర
Filed Under: featured • lead • తెలుగు • భారతీయ సినిమా • సమీక్ష
కేవలం అమ్ముకోవడానికి సినిమాలు తీసే చాలామంది మధ్యన నమ్మి సినిమా తీస్తేనే “లాభం” అని ఈ సంవత్సరం ప్రారంభంలో అరుంధతితో శ్యాంప్రసాద్ రెడ్డి నిరూపిస్తే, ఈ సినిమా రెండో ఉదాహరణలా అనిపిస్తోంది. ఏదిఏమైనా, సినిమా చూసి మళ్ళీ ఈ నిర్ణయానికే నేనొస్తే మాత్రం ష్… చిత్రం యూనిట్ అభినందన పాత్రులే.
సస్పెన్స్ విప్పకుండా సమీక్ష బాగా రాశారు.
సమీక్ష చదవగానే సినిమా ఏ థియేటర్ లో ఉందో ఎంక్వయిరీ మొదలుపెట్టా.. చక్కని సమీక్ష.. సినిమా కూడా నిరాశ పరచదనే అనుకుంటున్నా..
సినిమా పబ్లిగ్గా రిలీజయిందా?
వెంకట్ గారూ,
ఇది మీ కథేనా?
సమీక్ష బాగా రాసారు. విభిన్న కధాంశాలు తెలుగు ప్రేక్షకుడికి దగ్గర చేయాలనే తపనతో సినిమాలు తీస్తున్న హరిచరణ్ లాంటి కొత్త దర్శకుల ప్రయత్నాన్ని, ధైర్యాన్ని తప్పకుండా అభినందించాలి.
“లేత వయసుల ప్రేమలు-వాటిని సమర్ధించే మతిలేని మాటలు, నాలుగు సుమోలు ఒక్కుదుటన ఇరవై అడుగులు పైకి లేచి ఒక దానితో ఒకటి ఢీ కొట్టుకుని పచ్చడైపోయినా-సుమోల్లో ఉన్న జనాలంతా హాయిగా దిగడం, కధకి ఏకోశానా సంబంధంలేని సన్నివేశాలను, వెకిలి హాస్యాలను – చూసి విసిగి పోయారా?”
ఇవి లేవు అన్నసంగతి తెలిస్తే చాలు.. ఎలాంటి సినిమా అయినా చూడడానికి రెడీ!! మంచి సినిమాను అందించే ప్రయత్నం చేసిన హరిచరణ ప్రసాద్ గారు అభినందనీయులు.
చక్కని సమీక్ష మరి మొత్తం పొగిడేసారు కదా! అంత నచ్చిందా? అసలు సినిమా దేనికి చూడాలని మీ అభిప్రాయం? ఒక ప్రయోజనం కోసం? ఆనందం కోసం? సమయం గడపడం కోసం? దేన్ని ఆధారం గా తీసుకొని ఈ సమీక్ష చేసారు, మీరు? అది కూడా తెలిస్తే నా వరకు ఇంకా బాగుండేది అనుకుంటున్నాను. ఏదైనా కానివ్వండి, routine చెత్త కంటే కొంత మార్పు మంచిదే. ఆహ్వానించదగ్గదే. ఇలాంటి ప్రయత్నాలను కనీసం సినీప్రియులమైన మనమైనా ప్రొత్సహించకపోతే ఈయన కూడా తరువాత సినిమా ఫ్యాక్షనో, యాక్షనో, ఐదోతరగతి లవ్వో, మళయాళపు కొవ్వో ఒంటపట్టించుకున్నారంటే, హతవిధీ!
@రామేశబాబు,
వరసగా చూస్తున్న సినిమాలకు భిన్నంగా ఉందీ సిన్మా. చెప్పాను కదా-లేత వయసు ప్రేమ [తలాతోకా లేని] సినిమాలు, పోటీలు పడి సుమోలను ఎగరేసే సినిమాలు, వెకిలి హాస్యాలు,సందర్భం లేని సన్నివేశాలు …వీటన్నిటి బారినపడి ఏమిటీ చిత్రహింస అని ఆలోచిస్తున్నప్పుడు తారస పడిన సినిమా ఇది! నాకు నచ్చింది – కొన్ని లోపాలున్నా, ఇంకా మెరుగ్గా తీసుండొచ్చనిపించినా.
మీకు సినిమా చూసే వీలుండి, చూస్తే మీ అభిప్రాయాలు (పొగడ్తలైనా, తెగడ్తలైనా) మాతో పంచుకోవచ్చు.
శ్రీచక్ర
@శ్రీచక్ర,
మరే ఏవో కొన్ని లోపాలున్నా ఘోరమైన పాపాలు లేకపోతే పరవాలేదు సర్దుకుంటాము. మీ ఆహ్వానానికి కృతజ్నతలు (నెనర్లు)
కధ ‘భూత్ ‘ లా ఉంది.
రివ్యూ ‘ఆనంద్ ‘ లా నాజూగ్గా ఉంది.
శ్రీ వసంత్ ,కీ.శే. సత్యం (ప్రసిద్ద సంగీత దర్శకులు) గారి మనవడు.ఎవరో పాట చాలా బాగుంది.
వసంత్ కి ఆల్ ద బెస్ట్.మొన్న ఎప్పుడో వన్ (వడ్డే నవీన్) అని ఒక సినిమా వచ్చింది.దానికి కూడా వసంతే. కెరీర్ మొదట్లో అలాంటి దిక్కుమాలిన సినిమా లని ఎంచుకో వద్దని వసంత్ కి మనవి, ఎందుకంటే మంచి భవిష్యత్తు వుంది
హరిచరణ్ గోఅహెడ్…కొత్తగా ఏదైనా చెయ్.. మేం మీవెంటే ఉంటాం.. మీ జాతి వైజ్ఞానిక పక్షుల్ని ఓ దరి చేర్చి..,కలిసి.. జనాల్లో పరివర్తన తెచ్చే ప్రయోగం చెయ్..మీవెంటే ఉంటాం. సరికొత్త సృజనాత్మకతకు జైహింద్…. శివాజీ(ఆంధ్రజ్యోతి)
@శివాజీ
మీరు ఆంధ్రజ్యోతిలో పనిచేస్తున్నారా?
గత ఆదివారం రహ్మాన్ మీద ఒక వ్యాసం వచ్చింది. అనంత్ అనే ఆయన రాశారు.
ఆయనెవరో, ఏంచేస్తుంటారో చెప్పగలరా?
మీ అందరి అభిమానం నన్ను మరింత ఉత్సాహ పరుస్తూంది. సినిమా ప్రేమికులంతా ష్..చూసి స్పందిస్తే అపూర్వ చిత్ర తదుపరి ప్రయత్నాలకు ఉపయోగపడుతుంది. అమెరికా, కెనడా ఎక్కడైన చూపించాలి అనుకుంటె రామన్ సంచుల, ఆడ్ లాబ్స్ ను సంప్రదించండి. ఇండియా లొ ఐతే నన్ను సంప్రదించండి. ష్.. మీది మీ అభిప్రాయాలు అపూర్వ చిత్ర కు అమూల్యం అని మరువకండి.
అప్పుడెప్పుడో నేను తిరుపతి లో ఇంజినీరింగ్ చదివేటప్పుడు షఫి తో పరిచయం. అప్పుడు షఫి కృష్ణవంశీ దగ్గర అసిస్టెంట్. మా కాలేజీ వాళ్ళు ఒక కల్చరల్ ఫెస్టివల్ కి ప్రోగ్రాం చేసిపెట్టమని షఫి ని పిలిపిస్తే (షఫి ది తిరుపతి పక్కనే వున్న చంద్రగిరి) నేను రాసిన ఒక స్కిట్ కి ఆయన డైరెక్షన్ చేసాడు…కల్చరల్ ఫెస్టివల్ అయిపోయిన తర్వాత కూడా చాలా రోజుల పాటు ఇద్దరం కూర్చొని ..కొన్ని సినిమా కథలు కూడా వండాము…తర్వాత ఎవరి లైఫ్ లో వాళ్ళు పడిపోయాము..షఫి కి ఇంకొంచెం మంచి బ్రేక్ వస్తే బాగుణ్ణు…
all the best to Hari charan and shafi..
ఇది థ హిందు లొ వచ్చిన రివ్వూ
http://www.hindu.com/2009/01/27/stories/2009012751150200.htm
హరి చరణ ప్రసాద్ గారు, ఇపుడే హిందులో చూసాను. ఒక dance number అనవసరం అని చెప్పారు అక్కడ. సినిమా చూడకపోయినా నాకు కూడా అలాగే అనిపించింది. ఈ కాలము కూడా సినిమాల్లో పాటలు అవసరమా? ప్రేక్షకులను కట్టి పడవేసే కథనం ఉండాలి, అలా ఉన్నపుడు పాట(లు) పెట్టడం ప్రేక్షకుల ఆసక్తిని తగ్గించడమే కదా? నీకు ఇప్పటికీ అర్థం కాదు పాటల సంగతి!!