కృష్ణవంశీ మార్కు (శశిరేఖా) పరిణయం
బాలివుడ్ లో ‘రాజశ్రీ’ సంస్థ తీసే సినిమాలకి ‘పెళ్లి వీడియో’ లని పేరు. తెలుగు సినిమాలలో అలాంటి పేరు తెచ్చుకునే దిశగా కృష్ణవంశీ కృషి చేస్తున్నాడనిపించింది ‘శశిరేఖాపరిణయం’ చూశాక. విడుదలైన రెండు వారాలకి ఈ సినిమా చూసే అవకాశం దొరికింది. పాటలను, ముఖ్యం గా పెళ్లి పాటలను చిత్రీకరించడంలో తనదైన శైలిని ఏర్పరుచుకున్న కృష్ణవంశీ ‘పెళ్లి’ నేపధ్యం గా తీసిన సినిమా అనగానే ఎలా ఉంటుందో ఊహించగలిగా. నా అంచనాలకు భిన్నంగా లేనప్పటికీ, పాటలు నిరాశ పరిచాయి. కాకినాడ లో చదువుకుంటున్న అమలాపురం అమ్మాయి శశిరేఖ (జెనిలియా) ని ఆమె పిన్ని బాబాయ్ ఓ అర్ధరాత్రి నిద్రలేపి అమలాపురం ప్రయాణం చేస్తారు. ఇంటిముందు ఉన్నా పందిరి చూసి ఎవరిదో పెళ్లి అనుకున్నశశిరేఖ జరుగుతున్నది తన పెళ్ళే అని తెలుసుకుని షాక్ అవుతుంది. పెళ్లి వద్దని ఇంట్లో వాళ్ళని ఒప్పించలేక ఇంటినుంచి పారిపోతుంది. ప్రయాణంలో ఆమెకి ఆనంద్ (తరుణ్) అనే అబ్బాయి పరిచయం అవుతాడు. హైదరాబాద్ పారిపోదామనుకున్న శశిరేఖ తన నగలు పోగొట్టుకోవడం తో విజయవాడ లో ఆగాల్సి వస్తుంది. ఈ ప్రయాణం లో ఆనంద్ తో ఆమె పరిచయం ప్రేమగా మారుతుంది. ఆనంద్ మరెవరో కాదు, శశిరేఖ తప్పించుకున్న పెళ్లి వరుడు అభిమన్యు అని ప్రేక్షకులకి తెలియడం తో కథ విశ్రాంతి కి వస్తుంది. ఆ నిజం శశిరేఖ కి తెలియడం, వాళ్ళిద్దరి పెళ్లి జరగడం తో ‘శుభం’ కార్డు (కాదు కాదు ‘కృష్ణవంశీ’ కార్డు) పడుతుంది.
మొదటి సగం లో హుషారుగా సాగిన కథ, రెండో సగం లో బోర్ కొట్టడం మొదలెడుతుంది. ఈ సినిమా ని నిలబెట్టిన ఒకే ఒక్క అంశం జెనిలియా నటన. మొత్తం సినిమాని తన భుజాలపై మోసిందీ అమ్మాయి. అక్కడక్కడ ‘బొమ్మరిల్లు’ హాసిని ఛాయలు కనబడ్డా మొత్తం మీద మంచి నటనని ప్రదర్శించింది. కథానాయిక పాత్ర బలమైనది కావడం, కథ మొత్తం ఆ పాత్ర చుట్టూ తిరగడం ఆమెకి కలిసొచ్చిన అంశాలు. తన పెళ్లి గురించి తెలుసుకుని శశిరేఖ షాక్ కి గురయ్యే సీన్, తల్లితో ఫోన్ లో మాట్లాడే సీన్, పెళ్లి పీటల మీద నుంచి తానూ ఎందుకు పారిపోవలసి వచ్చిందో ఆనంద్ కి (తాగిన మైకంలో) వివరించే సీన్ లలో జెనిలియా నటన గుర్తుండిపోతుంది. శశిరేఖ తండ్రిగా ఆహుతి ప్రసాద్ ది రొటీన్ పాత్ర. కథానాయిక తో పోల్చినపుడు నాయకుడి పాత్ర పరిధి తక్కువే. కొన్ని కొన్ని సన్నివేశాలలో తరుణ్ పరిణతి చెందిన నటన ప్రదర్శించాడు. హీరో తండ్రి గా పరుచూరి గోపాలకృష్ణ ది నెగిటివ్ షేడ్స్ ఉన్న పాత్ర. మిగిలిన పాత్రల గురించి పెద్దగా చెప్పుకోడానికి ఏమి లేదు.
ప్రతి ఫ్రేమ్ నిండా కిటకిటలాడుతూ ఆర్టిస్టులు, సంప్రదాయం ఉట్టిపడే లోగిళ్ళు, ఆప్యాయతలు, అనురాగాలు, పాతకాలపు ఆభరణాలు, ఫర్నిచర్…అంతా కృష్ణవంశీ మార్కు చిత్రీకరణ. కామెడి ట్రాక్ అంటు ప్రత్యేకంగా ఏమి పెట్టకుండా, సన్నివేశాల నుంచే హాస్యం పిండే ప్రయత్నం కొన్నిసార్లు ఫలించలేదు. పాటలు ఈ సినిమాకి పెద్ద మైనస్. చిత్రీకరణ కూడా సో సో. సంగీతం అందించింది మణి శర్మేనా? అనిపించింది. సినిమాలో మధ్య మధ్యలో వచ్చే నేపధ్య గీతం మాత్రం బయటకు వచ్చాక కాసేపు వెంటాడుతుంది.
కథను నడపడం లోను, పాత్రల రూపకల్పనలోనూ దర్శకుడి (రచయిత కూడా) తడబాట్లు చాలాచోట్ల స్పష్టంగా కనిపిస్తూ ఉంటాయి. తనకి పెళ్లి అని తెలియగానే, ‘నాకు అప్పుడే పెళ్ళేమిటి, ఇంకా చదువు పూర్తీ కాలేదు’ అంటుంది శశిరేఖ. ఐతే, క్లైమాక్స్ కి వచ్చేసరికి చదువు విషయం మర్చిపోతుంది. కట్న కానుకలన్న, భార్య భర్తకి ఒదిగి ఉండే సంప్రదాయం అన్నా ఇష్టపడని స్వతంత్ర వ్యక్తిత్వం ఈ అమ్మాయిది. ఐతే చివరిలో అభిమన్యు ‘నాకు జీతం బాగా వస్తుంది, నువ్వు ఉద్యోగం కూడా చేయక్కర్లేదు’ అనగానే అందంగా సిగ్గుపడుతుందే తప్ప తనుకూడా చదువు పూర్తి చేసి తన కాళ్ళ మీద తను నిలబడతాను అనదు. హీరో ఈ అమ్మాయిని కొట్టినపుడు, ఈమె తిరిగి కొట్టడం మాత్రం నాకు బాగా నచ్చింది.
ఇక కథానాయకుడు.. ఓ పెళ్లి వీడియో లో శశిరేఖ ను చూసి ఇష్టపడి, ఆమె వివరాలు తన తండ్రికి పంపి పెళ్లి సెటిల్ చేయమని అడుగుతాడు. కాబోయే మామగారితో కూడా మాట్లాడతాడు. అంతే తప్ప చేసుకోబోయే అమ్మాయితో మాట్లాడే ప్రయత్నం చేయడు (ఇతను ఓ వీడియో పంపిస్తాడనుకోండి, అది ఆ అమ్మాయి చూడదు..). తండ్రి కి కట్న కానుకల మీద ఆశ ఉందని తెలిసీ, అది పెళ్ళికి సమస్య కాకుండా జాగ్రత్తలు తీసుకోడు. కథానాయిక తండ్రి పల్లెటూరి వాడు కాబట్టి తన కూతురికి మనసు ఉంటుందని, ఇష్టాలు ఉంటాయని తెలుసుకోలేడు (?). కథానాయకుడి తండ్రిదీ అదే తంతు, తన కొడుకు ఆ అమ్మాయిని తప్ప మరెవర్ని పెళ్లి చేసుకోదని తెలిసీ వియ్యాలవారితో గొడవ పెట్టుకుంటాడు, కట్నం కోసం. పెళ్లి తప్పిపోయక కొడుకు ఏమైపోయాడో కూడా పట్టించుకోకుండా, వియ్యాలవారి మీద కేసులు పెడుతూ ఉంటాడు, బిజీగా. విజయవాడ లో పోలీస్ కమిషనరేట్ ఉన్నప్పటికీ పాత్రలన్నీ విజయవాడ ఎస్పీ అంటూ ఉంటాయి. అలాగే విజయవాడ గొప్పదనం చెప్పే డైలాగు లో కూడా హీరో ‘గోరా ఆయన కూతురు హేమంత లవణం’ అంటాడు. నిజానికి హేమలత లవణం గోరా కోడలు. (అసలు ఈ డైలాగే బలవంతంగా చొప్పించినట్టు ఉంటుంది, ‘చందమామ’ లో ఆయుర్వేదం డైలాగ్ లా..). విజయవాడ లో అభిమన్యు శశిరేఖ కి ఓ ప్యాకెట్ ఇస్తాడు, హైదరాబాద్ వెళ్ళాక చూడమంటూ. అందులో ఏముందో చూసే అవకాశం ప్రేక్షకులకి దొరకలేదు, శశిరేఖ ఆ ప్యాకెట్ సంగతే మర్చిపోయింది.
సంగీతం, పాటల చిత్రీకరణ, వాటి ప్లేస్మెంట్ తో పాటు రెండో సగం చిత్రీకరణ, ఎడిటింగ్ లో లో మరిన్ని జాగ్రత్తలు తీసుకుని ఉంటే ‘శశిరేఖా పరిణయం’ ఓ మంచి సినిమా అయి ఉండేది. ఓ పక్క సినిమా ఐపోయాక ఓ పాట పెట్టడం ఏమిటో అర్ధం కాదు. ‘శుభం’ కార్డు కి బదులుగా ‘కృష్ణవంశీ’ అని పడుతుంది. (‘అందుకే వచ్చాం బాబు’ అని వెనుక సీట్ లో ఓ ప్రేక్షకుడి కామెంట్).
-మురళి
Filed Under: featured • lead • తెలుగు • భారతీయ సినిమా • సమీక్ష
కృష్ణవంశీ ఇంత బోరింగ్ సినిమా తీస్తాడనుకోలేదు. అసలు చందమామలొనే కధానాయిక ప్రవర్తనకి ఒక అర్ధం లేకుండా చేసాడు. ఏదో కలిసొచ్చి ఆ సినిమా హిట్ అవ్వడంతో ఆ కిక్తో తీసినట్టుందే కానీ అంత గొప్పగా చెప్పుకోవడానికి ఏముందని ఈ సినిమాలో. అందరూ క్రియేటివ్ డైరెక్టర్ అని పొగిడేస్తూ ఉంటే ఆ ముసుగులో బాలీవుడ్ సినిమాల్ని తెలివిగా ఫ్రీమేక్ చేసేస్తున్నాడు.. జబ్ వి మెట్ నుండి చాలా సన్నివేశాల నకలు రూపాలు కనిపిస్తాయి ఈ శశిరేఖాపరిణయంలో. ముఖ్యంగా జెనీలియా పోన్ చేసి ఆహుతి ప్రసాద్ని తిట్టడంలాంటివి. జెనిలియా కూడా హాసిని పాత్రనుండి త్వరగా బయతపడకపోతే ప్రేఖ్షకులే బయటకు పంపిస్తారు. అదే తరహా పాత్రల్లో చూసి బోరుకొడుతుంది.
ఏదో ఒకట్రెండు సినిమాలయితే సరే.. ఇలా ప్రతిసారి గుంపులు గుంపులు జనాల గోల, అక్కడక్కడా ఓవర్ యాక్షన్ పాత్రలు అంటే భరించడం కష్టమే. హాసిని (లాంటి) పాత్ర ఒకసారి అయితే పర్లేదు కానీ, మళ్ళీ మళ్ళీ అవే తింగరి చేష్టలు చూడడం టార్చరే!
>> “ఈ సినిమా ని నిలబెట్టిన ఒకే ఒక్క అంశం జెనిలియా నటన”
పెదాలు కదపకుండా మాట్లాడటం, ముఖంలో భావాలకీ చేతుల కదలికలకీ పొంతన లేకపోవటం, ఎప్పుడూ తలొంచి వంకరగా చూట్టం .. ఇదే జెనీలియాకొచ్చిన నటన. ఈ అమ్మాయికన్నా ఛార్మి, అనూష్క లాంటి వాళ్లు మెరుగు.
జెనీలియా నటన విషయంలో తప్ప మిగతా అన్నిట్లోనూ మీరు చెప్పినదానితో నూరుశాతం ఏకీభవిస్తాను. బాగా రాశారు. మధ్యలో విజయవాడ గురించి తరుణ్తో చెప్పించిన అనర్ఘళ డవిలాగు ఎంత సిల్లీగా ఉందో.
సమీక్ష బాగుంది.
))
చివరలో మీరు చెప్పిన ప్రేక్షకుడి డైలాగ్ కూడా
కృష్ణ వంశీ కూడా safe bet ఆడుతున్నారన్న మాట
అవును మరి !
తెలుగు వాళ్ళ మనసెప్పుడు ఏమి చెపుతుందో
తెలుసుకోవటం ఎవరికైనా కష్టమే సుమీ
అప్పట్లో స్వాతిలో పెళ్ళి కొడుకు లేచిపోయాడు అని ఒక సీరియల్ వచ్చింది.ఈ సినిమా అదే.కానీ పెళ్ళికొడుకు,పెళ్ళికూతురు ఇద్దరూ ఈ పెళ్ళొద్దంటూ పారిపోతారు.దారిలో కలుసుకుంటారు.ఇద్దరికీ తెలియదు వాళ్ళు చేసుకోవాల్సింది వాళ్ళనే అని.ఇద్దరూ ప్రేమలో పడిపోతారు.కానీ అక్కడ రెండు కుటుంబాల మధ్యా గొడవలైపోతుంటాయి.ఇంకో పక్క ఇరు కుటుంబాల మనుషులు వెతుకుతూ వుంటారు.చివరికి కధ సినిమాలాగే సుఖాంతం అవుతుంది.పాపం ఆ సీరియల్ రచయిత కి కధ సినిమాకి వాడుకున్నందుకు గానూ డబ్బు ముట్టిందో లేదో?
ఏదో ఏదో పాట బాగుంది కాని అది మణిశర్మ ది కాదు విద్యాసాగర్ ది
సినిమా బాగుంది. ఓ సారి భేషుగ్గా చూడవచ్చు.
ఈ సినిమా చూసిన తరువాత సమీక్ష రాద్ధామని కూర్చుంటే, రాయడానికి(నిజంగానే) నాకేమీ గుర్తుకురాలేదు. అంత forgettable సినిమా ఇది.
ఈ మద్యన కృష్ణవంశీ తీస్తున్న సినిమాలు చూస్తూ ఉంటే , ఇతనేనా గతంలో ” సింధూరం ” , ” అంత:పురం” లాంటి ఆణిముత్యాలని డైరెక్ట్ చెసిందీ ? అనే ప్రశ్న తలెత్తుతుంది … ఇలా ఉన్న ఒకరిద్దరు మంచి దర్శకులు కూడ మూస చట్రంలొ ఇరుక్కుపొతే , ఎలా బాగుపడుతుంది మన తెలుగు చలన చిత్ర పరిశ్రమ ?
telugu janalaki taste okati… thagaladaledani… “kamal hasan” lanti ollu publiclone gollumannaru..inka cheppala
[ఈ వ్యాఖ్యకు సమాధానమివ్వండి]
ఏమిటో, పెళ్ళైన తర్వాత కృష్ణ వంశీ టేస్టంతా మట్టిగొట్టుకుపోయినట్టుంది. అంతఃపురం తర్వాత ఒక్క మంచి సినిమా అయినా తీశాడా?
రాధిక గారు, మీరు చెప్పిన కథ స్వాతి మంత్లీలో అనుబంధ నవలగా వచ్చింది. పేరు కూడా ఏదో ఉండాలి. అసలు అదే కాదు, ఇదే కథాంశంతో ఇదివరలో ఏదో సినిమా కూడా వచ్చినట్టు గుర్తు. నేనైతే అసలు హాసిన దెబ్బకు ఇంకా కోలుకోలేదు. ఇప్పట్లో జెనీలియా సినిమా చూసే ధైర్యం లేదు.
@సుజాత!,
అవునండీ హరీష్, సంఘవి లతో ఇలాంటి సినిమా ఒకటి వచ్చింది. అందులో కూడా ఇలాంటి కథే….ఒహో నా పెళ్ళంట…అనుకుంటా…
ఈ సినిమాకి నా సిస్టర్స్ తొ వెల్లాను. సినిమా ఎ కొసానా నచ్చలేదు. నాకెందుకొ చాలా చెత్తగా అనిపించింది. ఎంత చెత్తగా అంటె సినిమా చూడకుండా సెల్ లొ గేమె ఆడాను. బహుసా జెనిలియా ఒవరాక్షన్ వల్లననుకుంటా.
వెంకట్, కరెక్టండి, ఓహో నా పెళ్ళంటే ఆ సినిమా!
@సుజాత!,
రామానాయుడిదే ‘ఒహో నా పెళ్లంట’ కూడా. ‘కూడా’ అనటానిక్కారణం – జంధ్యాల ‘అహ నా పెళ్లంట’ తీసిందీ రామానాయుడే కాబట్టి. ‘అహ నా’ స్థాయిలో ఆడలేదు ‘ఒహొ నా’. అందుకే కృష్ణవంశీ ఫ్రీమేక్కోట్టేసినట్లున్నాడు – ఎవరికి గుర్తుంటుందిలే అనుకొని.
enti mastaaru
meeku songs nachhaleda???
year ke best audio meeku nachhaleda????
kalikaalam
@swechasagar,
ఇక్కడంతా జనాలు అదో టైప్ లెండి.
అది సరే ఈ year బెస్ట్ అంటున్నారు. ఇంకా ఒక నెలైనా కాలేదే?
@శిద్దారెడ్డి వెంకట్,
ఆడియో గత సంవత్సరం విడుదలైంది కదా. ఆ సంవత్సరానికి బెస్ట్ ఏమో..
thokka laa vundhi cinema…ahuthi prasad boothulu,raghu babu silence,paruchuri navvu ive naaku ee cinema loo nachindhi.
cinema chala bagundi,evaru bagaledhani cheppindhi
Krishna vamsi garu hero oriented movies cheyyandi…but dont prefer Nitin & Tarun.
నేను హాల్ కి వెళ్లి సినిమా చూసి ఇంచుమించు అయిదేళ్లయింది . ఈ మధ్యన ఫ్రెండ్స్ అందరూ వేసిన ప్రోగ్రాం తో సినిమాకి వెళ్లాను. అదీ…ఈ శశిరేఖా పరిణయం లాంటి చెత్త సినిమా కి. టైం, మూడ్ .. రెండూ పాడయ్యాయి. వంకర చూపులు చూస్తూ , పిచ్చి చేష్టలు చేస్తూండే హీరోయిన్ ఓవర్ ఏక్షన్ చాల విసుగు తెప్పించింది. అది కాక, సినిమాలో వీలయినప్పుడల్లా అవసరమున్నా లేకున్నా బూతులు మాట్లాడడం.. హీరోయిన్ తో సహా. ఇంకా టీనేజ్ పిల్లలంతా కలిసి ఓవర్ నైట్ పికినిక్ కి వెళ్ళడం..తాగడం.. ఇదేనా బాధ్యత వున్న దర్శకులు సమాజానికి చూపించవలిసింది. పెళ్లి విషయం లో పిల్లల అభిప్రాయాలకి ప్రాధాన్యత ఇవ్వాలి. ఆ పాయింట్ మంచిదే. అయితే కృష్ణ వంశీ లాంటి దర్శకుడు దాన్ని చెప్పడానికి ఎంచుకున్న సరళి బాధ కలిగించింది….
ikkada chaala mandi antunnattu antha chandalanga ayithe emi ledu movie. ippudu vache chaala movies kante idi chaala nayamu. mottam family chooda vachu. emantaru…….
ఇప్పటికే నాలుగు సార్లు టీఈలో వచ్చింది. నాకంతగా నచ్చలేదు
నాకైతే సినిమా నచ్హలె