“విశ్వనాథ్ గారు సినిమాలు తీయడం ఎందుకు మానుకున్నారంటే వారు తీసిన సినిమాలకి వ్యాపర పరంగా లాభసాటి లేదు. మంచి సినిమాలు రావడం లేదూ అని బాధ పడేకన్న ఎవరైనా ఒక చిన్న మంచి ప్రయత్నం చేస్తే దానికి మీరు చేయూత నివ్వండి. సినిమాకి వెళ్ళి చూడండి. బాగోలేదని ఎవరో చెప్పారని చూడ్డం మానేస్తే చిన్న సినిమాలు తీసేవాళ్ళుండరు. ఎవరైనా మంచి ప్రయత్నం చేస్తే మీవంతు సహకారం అందిచండి. వారికి మరింత ప్రోత్సాహం ఇవ్వండి…” చాల కాలం క్రితం అమెరికాకి విచ్చేసినప్పుడు ఓ చిన్న సందర్భంలో సిరివెన్నెల సీతారామ శాస్త్రి గారన్న వాక్యాలవి. కె. విశ్వనాథ్ గారెందుకు సినిమాలు తీయడంలేదని ఎవరో అడిగిన ప్రశ్నకి ఎంతో ఆవేశంతో పై మాటలన్నారు. అందులో ఆవేశం కన్నా ఆవేదనుంది. వాస్తవముంది.
నిన్ననే “ష్ – ఇది చాలా మంచి వూరు” సినిమా చూసాక పై వాక్యాలే గుర్తుకొచ్చాయి. ఈ సినిమాకి దర్శకత్వం వహించిన హరిచరణ్ ప్రసాదు నాకు మంచి మిత్రుడు. సినిమా అంటే పరితపించేవాడు. అందునా మంచి తెలుగు సినిమాకోసం ప్రతీ క్షణమూ ఆశపడేవాడు. మరో మిత్రుడి ద్వారా నాకు “వనజ” ప్రివ్యూ కెళ్ళినప్పుడు పరిచయం అయ్యారు.. నాకు సినిమాలంటే ఆసక్తుందనీ, నేనూ సినిమాలకి సంబంధించిన కోర్సు చేసానని చెప్పగానే, ఎంతో సంతోషించీ, మనం విడిగా కలిసి మాట్లాడుకోవాలంటూ తన సెల్ నంబరు నాకిచ్చి, నాదీ ఆయన తీసుకున్నారు. అప్పుడే తెలిసింది ఆయనే కమ్లి సినిమా నిర్మాతనీ. ఆ సందర్భంలోనే తన రెండవ ప్రయత్నంగా మరో థ్రిల్లర్ సినిమా తీస్తున్నాననీ చెప్పారు. సినిమాకొచ్చిన హాడావిడిలో అక్కడంత సేపు మాట్లాడడం కుదర్లేదు. మర్నాడు కాల్ చేద్దాములే అనుకున్నాను కానే చేయడానికి సంకోచించాను. ఎందుకంటే గతంలో ఇలాగే కొంత మంది పేరొందిన దర్శకుల్ని కలిసినప్పుడు నాకు కొన్ని చేదు అనుభవాలెదురయ్యాయి.
ప్రత్యక్షంగా కలిసినప్పుడు ఎంతో ఆసక్తి గా మాట్లాడిన దర్శకులూ, నిర్మాతలూ తరువాత సంప్రదించే ప్రయత్నం చేస్తే మొహం చాటేసారు. ఎంతో ఉత్సాహంతో ఫోన్ చేస్తే కనీసం జవాబు కూడా ఇవ్వలేదు. ఈమెయిలు చేస్తే పత్తా లేదు. అందుకని హరిచరణ్ణి కాల్ చేయడానికి ఎందుకో ముందడుగు వేయలేదు. కానీ ఆ రోజు రాత్రి ఆయనే కాల్ చేసి దాదాపు రెండు గంటల సేపు మాట్లాడారు. ఎంతో కాలం నుండీ పరిచయమున్న వ్యక్తిలా పలకరించారు. అదే సందర్భంలో ఆయన “ష్” సినిమా స్క్రిప్టు గురించి చెప్పారు. నేనేదయినా చేయగలిగితే తప్పక తీసుకుంటానని చెప్పారు. స్క్రిప్టు పంపుతానని చదివి అందులో ఏమైనా మార్పులవసరముంటే చెప్పమన్నారు. సరే అన్నాను కానీ, స్క్రిప్టు పంపుతారన్న నమ్మకం నాకు లేదు. ఎందుకంటే సినిమా వాళ్ళు, వాళ్ళ ప్రోజక్టులన్నీ గుంభనగానే ఉంచుకుంటారు. ఫోన్ సంభాషణ ముగిసిన అరగంట తరువాత ఈమెయిల్ చూస్తే ఆయన స్క్రిప్టు పంపారు. మాట్లాడిన కొద్ది సేపటికే మయిలు పంపేసరికి ఆశ్చర్యం కలిగింది. చదివి నాకు తోచినవి చెప్పాను. నచ్చినవి తీసుకున్నారు. కొన్ని చోట్ల విమర్శిస్తే, ఎందుకు బాగాలేదో నేను సమంజసంగా చెప్పే వరకూ నన్ను వదిలిపెట్ట లేదు. నే చెప్పిందంతా విని ఆయన ఎందుకలా రాసారో చెప్పారు. ఇదంతా ఎందుకు చెబుతున్నానంటే సాధారణంగా సినిమా దర్శకులు విమర్శలు స్వీకరించరు. పైగా వాళ్ళ స్క్రిప్టు పట్టుమని రెండురోజులు కూడా కాని ఓ కొత్త వ్యక్తి చేతిలో చచ్చినా పెట్టరు. ఇదే విషయం నేను హరి చరణ్ తో అంటే “స్నేహమూ, వ్యాపారమూ నమ్మకం మీదే నడుస్తాయి. మీరూ నాలాగే సినిమా అంటే పరితపిస్తారు. అది నాకు మీ మాటల్లో కనిపించింది. నన్ను మీరు నమ్మాలంటే నేను ముందు మిమ్మల్ని నమ్మాలి. ఆ నమ్మకంతోనే మీకు స్క్రిప్టు ఇచ్చానని” చెప్పారు. ఆశ్చర్యం వేసింది. ఆనందం కలిగింది. నాకు తోచిన సలహాలు చెప్పాను. అప్పటికే స్క్రిప్టు వర్కు తొంభై శాతం అయిపోయింది. నేను అంతగా సహాయ పడలేకపోయాను. ముందుగా సినిమాకి “అలజడి” అని పేరు పెట్టుకున్నారు. స్క్రిప్టు చదివాక ఆ పేరు అంతగా నప్పలేదనిపించింది నాకు. థ్రిల్లర్ గా అనిపించాలంటే కొత్తగా పేరుంటే బాగుంటుందనిపించింది. ఆ సినిమాలో ఓ చిన్న పాప కి చనిపోయిన వారితో మాట్లాడే శక్తుంటుంది. అది ఆ చిన్నమ్మాయి తండ్రి ( హీరో ) మెల్లగా గుర్తిస్తాడు. ఆ పిల్ల అర్థరాత్రి తనలో తనే మాట్లాడుకుంటూ ఉంటుంది. ఓ రాత్రి అలా సంభాషిస్తుంటే “అప్పూ” అని తండ్రరుస్తాడు. ఆ పాప “ష్..” అని గొడవ చేయద్దంటుంది. ఇది చూసాక “ష్” పేరు బాగుంటుందని చెప్పాను. హరిచరణ్ కి బాగా నచ్చింది. ఆ తరువాత ఆయన సినిమా తీయడానికి ఇండియా వెళిపోయారు. ఓ నెల్లాళ్ళ తరువాత నాకో ఈమెయిల్ చేసారు. అది “ష్” సినిమా పేరు అని నిర్ధారించామనీ, క్రెడిట్స్ లో నా పేరు వేస్తానని చెప్పారు. నాకు ఆనందంతో పాటు ఆశ్చర్యం కలిగింది. సాధారణంగా సినిమా దర్శకులు ఇతరుల చెప్పిన సలహాలూ, హాస్య సంభాషణలూ వారి సృజనే అన్నట్లు చెబుతారు. అలాంటిది కేవలం సినిమా టైటిల్ చెప్పినందుకే నాకు క్రెడిట్ ఇవ్వాలని అనుకున్న హరిచరణ్ లాంటి వ్యక్తులుంటారా అనిపించింది. ఇదంతా ఎందుకు చెబుతున్నానంటే సినిమా తీయడంలో నిష్టే కాదు, నిబద్ధతా, నిజాయితీ కూడా వుండాలి. అవి హరిచరణ్ లో నాకు కనిపించాయి. నిన్న సినిమా చూస్తే అందులో నా పేరు కూడా కృతజ్ఞతలతో అంటూ వేస్తే హరిచరణ్ లాంటి మంచి దర్శకుడు నా మిత్రుడని చెప్పుకోడానికి సంతోషం వేసింది. చిన్న చిన్న వాటికి కూడా ఎంతో విలువ నిచ్చే మంచి దర్శకుడు కనిపించాడు. హాలీ వుడ్ లో సినిమా తీసే ముందు అందులో ఉన్న ముఖ్య నటులకీ, సాంకేతిక వర్గానికీ స్క్రిప్టు ప్రతి ఖచ్చితంగా ఇస్తారు. అదే బాటలో హరిచరణ్ కూడా నడిచారని ఆ సినిమాకి పనిచేసిన వాళ్ళు చెబితే తెలుగు సినిమాకి మంచి రోజులొచ్చాయని ఆనందించాను. ఓ మంచి దర్శకుడు దొరికాడని సంబర పడ్డాను.
“ష్” సినిమా అందరూ తప్పకుండా చూడండి. స్క్రిప్టు ఎలా వుందో అందులో ఒక్కటీ తు.చ తప్పకుండా తెరకెక్కించాడు దర్శకుడు. అలాగే సినిమాలో ఎక్కడా అనవసర సంభాషణలు కానీ, సన్నివేశాలు కానీ కనిపించవు. కథ చక చకా సాగిపోతుంది. అలాగే కథలో ఇమడని హాస్య పాత్రలూ లేవు. ఓ సీరియస్ సినిమా ఎలా వుండాలో అలాగే ఉంటుంది. సినిమాలో మొత్తం రెండు పాటలున్నాయి. “ఎవరో ఎవరో” పాటలో మంచి మెలడీ కనిపిస్తుంది. నటీ నటుల వరకూ వస్తే షఫీ చాలా నిరాశ పరిచాడు. షఫీ నటన గురించి ఎంతో అనుకొని సినిమాకి వెళితే ఉన్న ఉత్సాహం గాలి తీసేసాడనిపించింది. కానీ హీరోయిన్ గా వేసిన మిధున అనే అమ్మాయి ఈ సినిమాకి సర్ప్రైజ్ పాకేజ్. మొత్తం సినిమానీ తన భుజాలమీద మోసింది. ఉన్నంత సేపూ చాలా బాగా నటించింది. మొదటి సినిమా అయినా దర్శకుడు నటీ నటుల నుంచి మంచి నటన్ని రాబట్టుకున్నాడు. కథలో అక్కడక్కడ చిన్న చిన్న లోపాలు దొర్లినా మొత్తం సినిమాలో అవి కనిపించవు. ఎంతో ఉత్కంఠతో సినిమా నడుస్తుంది. సంగీతం కొన్ని చోట్ల బాగున్నా చాలా సందర్భాల్లో రిపిటీషన్ గా వినిపించింది. అతి తక్కువ బడ్జట్లో ఓ పద్ధతి ప్రకారం ఈ సినిమా తీసిన హరిచరణ్ ప్రసాద్ అభినందనీయుడు. “ష్” చూసాక అతని దర్శకత్వంలో మరిన్ని మంచి సినిమాలొస్తాయన్న ఆశకంటే నమ్మకమే ఎక్కువగా కలుగుతుంది. “ష్” సినిమా కుటుంబ సమేతంగా చూడదగ్గ సినిమా! ఆశ్లీల సంభాషణలూ, సన్నివేశాలు ఉండవు. వెకిలి హాస్యమూ, జుగుప్సా కరమైన శృంగారమూ ఇలాంటివి అస్సలుండవు. హాయిగా అందరూ చూడచ్చు.
మంచి సినిమాలు రావాలంటే ఎంతో తపనతో చిన్న సినిమాలు తీసే దర్శకుల్ని మనమందరం ప్రోత్సహించాలి. అది స్పూర్తిగా తీసుకొని వాళ్ళు మరిన్ని మంచి సినిమాలు తీస్తారు. అతి తక్కువ బడ్జట్లో ఓ పద్ధతి ప్రకారం ఈ సినిమా తీసిన హరిచరణ్ ప్రసాద్ అభినందనీయుడు. “ష్” చూసాక అతని దర్శకత్వంలో మరిన్ని మంచి సినిమాలొస్తాయన్న ఆశకంటే నమ్మకమే ఎక్కువగా కలుగుతుంది. సినిమా చూసాక మీరూ నాతో తప్పకుండా ఏకీభవిస్తారు.
–సాయి బ్రహ్మానందం గోర్తి
వెంకట్ నవతరంగం 
అతిథి 
మహేశ్ కుమార్ K 
జోశ్యుల సూర్యప్రకాశ్ 
సౌమ్య V B
కె.మహేష్ కుమార్ says:
ఐతే ఈ సినిమా చూసెయ్యాలి!
raghu says:
మన తెలుగు సినిమా industryకి ఇంకో మంచి దర్శకుడు దొరికినందుకు చాలా సంతోషంగావుంది.
అలాగే మన నవతరంగం పాఠకులకు మూవీ script post చేసే అవకాశం ఉంటే చేయండి.
Hari Charana Prasad says:
బ్రహ్మానందం’గా’ ఉంది. మనం (నవతరంగం)అందరం కలసి ఆడుతూ పాడుతూ బ్రహ్మాండమైన సినిమా తియ్యాలని ఉంది.
శంకర్ says:
@ హరి చరణ్ ప్రసాద్ గారు
.
గతంలో confessions of a filmmakerకి చేసినట్టు online రిలీజ్ చేస్తే మాలాంటి వారికి కూడా చూసే అవకాశం కలుగుతుందని మనవి
రాజేంద్ర కుమార్ దేవరపల్లి says:
@Hari Charana Prasad గారు,నేను మీకొక మెయిల్ పంపవచ్చా??నవతరంగం తరపున??
chandramouli says:
@హరి చరణ్ ప్రసాద్ గారు
ముందుగా నవతరంగంకు స్వాగతం…
మీసినిమా సక్సెస్ అవ్వాలని మనసారా ఆకాంక్షిస్తున్నాం….
@సాయిగారు
హరిచరణ్ గారిని సంప్రదించి స్క్రిప్ట్ నవతరంగంలో కాని ప్రకామ్యలో కాని ప్రచురించ గలరు ….
Sai Brahmanandam says:
@chandramouli,
సినిమా రిలీజయ్యి వారం కూడా కాలేదు. కొంత కాలం ఆగండి. హరిగారిని సంప్రదించి స్క్రిప్టు ప్రకామ్యలో భద్రపరుచుదాం.
చందు says:
ప్రయోగాత్మక చిత్రాన్ని తీసిన హరి చరణ్ గారికి అభినందనలు. కోట్లకు కోట్లు బడ్జెట్ పెడుతున్న ఈ కాలంలో “తక్కువ బడ్జెట్” అన్న మాట చూసి ఆనందమేసింది. సినిమా బడ్జెట్ ఎలా ప్లాన్ చేసుకోవాలో, ఎలాంటి విధానాన్ని అనుసరించాలో తెలుసుకోవాలని ఆసక్తిగా ఉంది.
అబ్రకదబ్ర says:
ఇంతకు ముందు రెండు మూడు సినిమాల్లో (ఛత్రపతి, ఢీ) షఫీని చిన్న పాత్రల్లోనే తట్టుకోలేకపోయాను. ఇక ప్రధాన పాత్రలో అంటే ..
సినిమా గురించిన మీ సమీక్ష (?) ఆసక్తికరంగా ఉంది. నవతరంగంలోనే ఈ సినిమా గురించి మరో సమీక్షా వచ్చినట్లుంది. అమెరికాలో ఇంకా విడుదలైనట్లు లేదు. వచ్చాక, షఫీ భయం పక్కనబెట్టి మరీ చూస్తా
Sai Brahmanandam says:
@అబ్రకదబ్ర,
This was released in US last week.
SAN JOSE, CA
(IMC6, San Jose, 1433 The Alameda, San Jose, CA 95135 (www.imc6.com) (408) 293-5034)
saif ali gorey says:
చెకొవ్ అన్నట్లు…నమ్మకమే… మనిషి . మనిషే..నమ్మకం.
ప్రతిది ఈ విశ్వంలొ నమ్మకం మీద అధారపడివుంది… అలా నమ్మకాన్ని నమ్మే… హరి చరణ్ ప్రసాద్ గారి వ్యక్తిత్వాన్ని సాయి బ్రహ్మానందం గోర్తి గారు చాల చక్కగ చేప్పారు.
ఇప్పుడు మన పరిశ్రమ కు కావల్సింది… క్రియేటివిటీ, డబ్బు తో… పాటు.వ్యక్తిత్వం .. ఉన్న హరి చరణ్ ప్రసాద్ లాంటి వారు.
dilse…
all da best to all unit and team of Sri HARI CHARAN PRASAD.
THX..
చండీదాస్ says:
ష్.. సినిమా రిలీజయ్యాక నవతరంగం చాలా కొత్త పుంతలు తొక్కుతోంది.ఇక్కడ అడుగు పెడితే అంతా సినిమా దేవాలయం లా ఉంది(భజన్లూ అవీ వినిపిస్తున్నాయి లెండి).బాబూ జోస్యులవాళ్ళబ్బాయీ… మౌనమేలనోయీ?
Sai Brahmanandam says:
@చండీదాస్,
I wrote it exactly whatever I felt like about him as well as the movie. No superlatives !
రాజేంద్ర కుమార్ దేవరపల్లి says:
@చండీదాస్ గారు,సినిమా నిజంగా బాగుంటే బాగుందని చెప్పటం తప్పుకాదని నా ఉద్దేశం.అంతమాత్రాన భజన్లూ అవీ వినిపిస్తున్నాయి అంటే ఎలాసార్? మీరు చూసుంటే,చూడబోతుంటే మీ అభిప్రాయమూ రాస్తే మేమందరమూ చదివి ఆనందిస్తాము కదా
చండీదాస్ says:
@రాజేంద్ర కుమార్ దేవరపల్లిగారూ,
మీరింతగా కసురుకున్నాక తప్పుతుందా.నోరు పారేసుకున్నా గదా.
ఈ రోజు ఫస్ట్ షోకే వెళ్తా.మన నవతరంగులూ, సరంగులూ ఎవరయినా వస్తున్నారా?
హనుమంత రావు says:
హరిచరణ్ గారూ,
)
ఒక మంచి చిత్రాన్ని రూపొందించినందుకు అభినందనలు.
ఈ చిత్ర నిర్మాణం లో మీరు ఎదుర్కొన్న సవాళ్ళు, ఇబ్బందులు, స్పూర్తిని కలిగించిన విషయాలు, నిరుత్సాహ పరచిన అంశాలు, లాంటి వివరాలతో ఒక వ్యాసాన్ని రాయగలరా?ఇక్కడ ఉన్న సినీ అభిమానులకు ఓ గైడ్ లా ఉపయోగపడొచ్చు.
ఇకపొతే, ఇప్పట్లో ఈ సినిమాని చూసే అవకాశం నాకైతే లేదు. ఈ చిత్ర డివిడి హక్కులు ఎవరికైనా ఇచ్చివుంటే వాటి వివరాలు ఇస్తే, మార్కెట్ లోకి రాగానే కొనుక్కొనే ప్రయత్నం చేస్తాను.ఒక మంచి తెలుగు సినిమా చూసి చాల కాలం ఐందండీ…….
Hari Charana Prasad says:
ఔను నేను కూడా జోస్యుల రివ్వు గురించి చూస్తున్నాను.
జోస్యులకు ఇది అపూర్వ చిత్ర తరఫున ఆహ్వానం.
madhu says:
ఈ మధ్య కాలం లో వస్తున్న సినిమాలు బాగుండటం లేదు అని, యువత పై పిల్లల పై తప్పు ప్రభావాన్ని చూపిస్తున్నాయి అని మనం విమర్సిస్తుంటాం…కాని ఇలాంటి ఒక మంచి చిత్రం చేసిన వాళ్ళని, సినిమా చూసి ప్రోత్త్సహించే విషయానికి వచ్చినప్పుడు మాత్రం ‘చిన్న సినిమా’ అని,ఎక్కువ హంగు ఆర్భాటాలు లేవని వాటిని చూసే ప్రయత్నం కూడా చెయ్యము….ఇది ఎంత వరకు సరి ఐనదో మనం అందరం మన మనస్సాక్షి ని ప్రశ్నించుకోవాలి…మనం ఆల్రెడీ పేరు ప్రక్యాతలు ఉన్న వారు తీసే సినిమాలే చూడాలనుకుంటే మనం చాలా మంచి సినిమాలు మిస్ అయినట్టే….
నేను ఈ సినిమా చూసాను….చాలా బాగుంది….పాటల చిత్రీకరణ దీనికి హైలైట్…
మీరు అందరు కూడా ఈ సినిమా చుడండి…చూసి, ఒక మంచి చిత్రాన్ని తీయాలని తపన పడే వ్యక్తిత్వం ఉన్న దర్శక,నిర్మాత ని అభినందించండి
venkat B says:
b caz of ur review .
i decided to watch dis movie andi..
thanks
venkat B says:
chala great andi..
hollywood taraha lo..script andhariki mundhey ivvadam…subha parinamam..
Nijamga story lo vishayam undali gani…
సూర్యప్రకాష్ జోశ్యుల says:
‘జోస్యులకు ఇది అపూర్వ చిత్ర తరఫున ఆహ్వానం!’ అని వెటకారంగా అన్నా…పొరపాటున అభిమానంగా ఆహ్వానించినా…ష్..ఎలాగో చూస్తాను(మన మిత్రలు వర్క్ చేసారు కాబట్టి)…అయితే ఇప్పుడే చూడాలంటే ఎక్కడో(నాకు దూరం)ధియోటర్ ఉంది…అందులోనూ నెలాఖురాయే…
-సూర్య ప్రకాష్ జోశ్యుల
Venkat says:
మీ వ్యాసం చదివాక ష్ సినిమా చూడాలనే కోరిక బల పడింది. వెంటనే యూఎస్ షెడ్యూల్స్ వెతికా. ఒక్క సాన్ హోసే లొ మాత్రమే ప్రదర్శించబడుతోంది. రెండు వేల మైళ్ళు.. వెళ్ళలేను. ఆడ్ లాబ్స్ వాళ్ళ పంపిణీ లోపమా లేక.. మంచి సినిమా చూడని మన దౌర్బాగ్యమా.. ఇక డివిడి గురించి ఎదురు చూడాల్సిందే..
చండీదాస్ says:
@Venkat, మీరింతగా ఫీలయిపోవాల్సిన సినిమా ఏం కాదు. ఖంగారు పడకండి. అసలెప్పటికీ చూడకపోయినా నష్టం లేదు.
చండీదాస్ says:
రాజేంద్ర గారూ, ఇప్పుడే సినిమా చూసొచ్చా.
సెకండాఫ్ లో ఓ సీనొస్తుంది. హీరో ఇల్లు. ఇంటికీ, కాంపౌండ్ వాల్ కీ మధ్య హీరో పిచ్చి ఆవేశంతో ఓ గుంట తవ్వుతుంటాడు. అతని భార్య నిద్ర లేచి అక్కడకు వస్తుంది. భర్త చేస్తున్న పని చూసి ఆమె షాకయి పోయికేకలు వెయ్యాలి.ఇది సీన్ కంటెంట్.
కెమేరాకీ, హీరో తవ్వుతున్న గుంటకీ మధ్యన ఉన్న తలుపులోంచి హీరోయిన్ ఎంటరవుతుంది.నిజానికి ఆమె అక్కడే షాకయి డైలాగ్ చెప్పాలి.అలా చెబితే ఆమె మొహం కెమేరాలో కనబడదు.కాబట్టి గుంటదగ్గరకు నడుచుకుంటూ వెళ్ళి,కెమేరాలో మొహం కనబడేట్టుగా ఇటు తిరిగి నిలబడి, అప్పుడు షాకయిపోయి, డైలాగ్ చెబుతుంది.మూడు నిముషాల ఈ సీన్ లో కెమేరా ఒకే చోట పాతి పెట్టినట్టుగా ఉంటుంది.సినిమా మొత్తం ఇంతే,టీవీ సీరియల్స్ నయం.స్మాల్ బడ్జెట్ సినిమాకి నిర్వచనం ఇదా?
ఈ సినిమా రేంజ్ ఇది.
అస్పష్టమైన కధా కధనాలు,గొణుగుడులాంటి లాంటి డైలాగులనే శబ్దాలు,కాంపౌండర్ లా కనబడుతూ, డాక్టర్ లా నటిస్తున్న సినీ నటుణ్ననుకునే డ్రామా నటుడూ,చచ్చిపోయిన అమ్మాయి అస్తిపంజరం చూపించి,మరుక్షణంలో ఫ్లాష్ బ్యాక్ లో ఆ అమ్మాయి వొళ్ళు కనబడే చవకబారు ఐటం సాంగు – టోటల్ గా రెండు గంటల చిరాకు.ఇదే గనక మంచి సినిమా అయితే మెంటల్ కృష్ణ ఆస్కార్ రేంజ్ సినిమా అవుతుంది.
దర్శకుడు వ్యక్తిగతంగా మంచి, గొప్ప లక్షణాలున్నవాడు కావచ్చు.అంత మాత్రాన ఆయన తీసిన సినిమాకి లేని గొప్పతనాన్ని ఆపాదించడం సరికాదు.
చెప్పుకోడానికి ఇంకా చాలా చిత్రాలున్నాయి గానీ, ఇంతకు మించి మాట్లాడుకుంటే టైము వేస్టే!
మళ్ళీ మొదటి కొస్తే, ఇలా పోస్టర్లేసి, మైకులు పెట్టే సంస్కృతి మనక్కూడా అవసరమా?
@ హరి చరణ్ గారూ,మిమ్మల్ని డిసప్పాయింట్ చెయ్యడానికి ఇది రాయలేదు.సరయిన పధ్ధతిలో హోం వర్క్ చేసుకుంటే మీ నెక్స్ట్ సినిమాతో నా లాంటి వాళ్ల నోళ్లు మూయించవచ్చు.గుడ్ లక్.
candi raani says:
చండీద్సాస్
మీ కామెంటుతో బ్యాలెన్స్ అయిపోయింది నవతరగం. ఇక నుంచీ మళ్ళి ఇటు రావొచ్చు. అయ్యా చిన్న సినిమాలన్నీ మంచి సినిమా లు కావు కాబోవు. ష్ లో చానా తప్పులున్నాయి.
హరి గారూ
మీ నెస్ట్ పిక్చర్ బాగా తీయండీ.
మీరు కావాలంటే మన ప్రకామ్యుల సహాయం తీసుకోండి.
చండీదాస్ says:
క్యాండీ రాణీ,
నా బాధ చ్చాలా బాగా అర్ధం చేసుకున్నారు.ధన్యవాదాలు.
చండీదాస్
Hari Charana Prasad says:
@చండిదాస్,క్యాండిరాణి,
తప్పకుండా ఇంకా బాగ తీయొచ్చు అని నేను నమ్ముతున్నాను. మీరు విపులంగా వివరిస్తూ, నవతరంగంలొ వ్రాస్త, ఎలా ఎఫ్ఫెక్టివ్ తీసుండొచ్చో కూడా వ్రాస్తే నాకు (మనందరికి) ఉపయోగకరంగ ఉంటుంది. అపూర్వ చిత్ర నెక్స్ట్ ప్రొజెక్ట్ కొరకు నవతరంగం ద్వార మంచి టీం ను తయారు చెయాలన్నది నా ప్రయత్నం.
మీరు పాఇంట్ ఔట్ చేసిన సీన్ కరెక్టే. టెక్నికల్ ఫౌల్ట్. కాని సీన్ లొ అన్యాయం జరగలేదు అని నా అభిప్రాయం. మంచి టీం వల్ల ఇలాంటివి జరగకుండా జాగ్రత్త పడవచ్చు.
కాని ‘ష్’ ను ‘మెంటల్ క్రిష్ణా’ తొ పొల్చడం …..
shree says:
@Hari Charana Prasad,
సరి కాదు
pandu says:
@చండి దాస్
మీరు చెప్పిన సీన్ టెక్నికల్ ఫాల్ట్ అవునో కాదో నాకు తెలియదు,కానీ ఒక మామూలు మనిషి ఎమోషన్స్ ని మాత్రమే ద్రుష్టి లో పెట్టుకుని ఒకటి చెప్పగలను.తన భర్త ఏదో విచిత్రమైన పని చేస్తున్నాడని తెలిసిన భార్య చుసిన వెంటనే కోపం వచ్చి, డోర్ దగ్గరే నిలబడి అరవదు కదా…తన భర్త దగ్గర కి వచ్చి ముందు ఎం జరిగిందో కనుక్కువటానికి ప్రయత్నిస్తుంది,అప్పటికి ఫలితం లేకపోతే కోపం తెచుకుంటుంది…నాకు తెలిసి అదే ఆ సీన్ లో జరిగినది కూడా….
మొరోవేర్ మీరు చెప్పాలనుకున్నది కొంచం సున్నితంగా చెప్తే అది ఎవరిని నిరుత్సాహ పరిచదు అని నాకు అనిపించింది.
చండీ దాస్ says:
నిజమేనండీ హార్ష్ గానే రాశాను.హరిచరణ్ గారూ, మిమ్మల్ని నొప్పిస్తే మన్నించండి.కానీ తప్పులు మాత్రం రాయలేదని ఖచ్చితంగా తెలుసు.మీకు సినిమాపై ఉన్న ప్యాషన్ ని కథ తయారీలోనూ, ఎగ్జిక్యూషన్ లోనూ కూడా చూపితే తప్పకుండా మీరు చక్కని చిత్రాలు తీయొచ్చు.అలాగే తక్కువ ఖర్చుతో సినిమాలు తీయాలనే నియమం పెట్టుకోకండి.అదేం పెద్ద క్వాలిఫికేషన్ కాదు.నా మిత్రుడొకాయన పది నెలల్లో పదమూడు సినిమాలు తీశాడు.రెండు రోజుల షూటింగ్, పది లక్షలలోపు ఖర్చు.సుమన్,రామిరెడ్డి, అలీ లాంటి క్యాస్టింగ్ తో.ఒకటి తప్ప ఏదీ రిలీజ్ కాలేదు.ఆ విషయం ఆయనే జోకులేసి మరీ చెబుతుంటాడు.ప్రేక్షకులకు అందని సినిమా కు అర్థం ఏముందండీ.
మీరు విపులంగా వివరించమన్నారు.ఒకట్రొండు విషయాలు చెబుతా.
1.కథ ప్రధాన పాత్ర చుట్టూ తిరుగుతూ, అతడు చేసే చర్యల వల్ల ముందుకు నడుస్తుంది.అలాంటి ప్రధాన పాత్రతో ప్రేక్షకుడు ఐడెంటిఫై చేసుకోవాలి,పాత్ర భావోద్వేగాలతొ పాటు తనూ ప్రయాణం చెయ్యాలి.అలా – ఎలా చెయ్యాలో, ఎందుకు చెయ్యలో Michael Hague రాసిన Writing Screenplays that Sell లో స్పష్టంగా ఉంది. చదవండి.మీరు షఫీ పాత్రనుగానీ,సీతపాత్రనుగాని స్పష్టంగా ఎస్టబ్లిష్ చెయ్యలేదు.ఆ పాత్రలకీ ప్రేక్షకుడి మనొభావాలకూ లంకె కుదరలేదు.అసలా ప్రయత్నమే చెయ్యలేదు.అందుకే కధలో లీనం కాలేక,లోపాలు లెక్కించడం.కొన్ని పాత్రలయితే ఎవరో కూడా అర్ధం కాదు.శివకృష్ణకూ,రాళ్లపల్లికీ కొడుకులున్నారని ఓ సీన్ లో సూచించారు గానీ,కీలకమయిన ఆ ఇద్దరి పాత్రల్లో స్పష్టత లేదు.
2.కధలో రెండు ప్రధానమయిన మలుపులు ఉండాలి.వాటినే ప్లాట్ పాయింట్స్ అంటారు.త్రీ యాక్ట్ స్ట్రక్చర్ గురించీ, ప్లాట్ పాయింట్స్ గురించీ మీరు Sid Field రాసిన Screen play లో చదవొచ్చు.మీ కధలోనూ ఇవి ఉన్నాయిగానీ ఎక్కడుండాలో అక్కడ లేవు.కరెంట్ బాక్స్సాఫీస్ టాప్ 10 లో ఉన్న Gran Torino, Mall Cop, Yes Man సినిమాల్లోనూ ఇవి తు.చ. తప్పకుండా పాటించారు.గమనించండి.
3. మరో ప్రధాన లోపం – సీన్లలో స్పష్టతలేదు.ఈ సీన్ లో ఏం చెప్పబోతున్నాం అన్నది ముందుగా నిర్ధారించుకొని,వీలయినంత ఎఫెక్టివ్ గా చెబితే, మనకు కావాల్సిన ఎమోషన్ ప్రేక్షకుడిలో కలిగించగలం.making Good Scripts Great,Advanced Screen Writing అనే రెండు పుస్తకాలు ఫాలో అవండి.రచయిత్రి Linda Segar.
4.ష్..లో షాట్ డివిజన్ పూర్ గా ఉంది.పాత్రలు కెమేరా ముందుకు వచ్చి డైలాగులు చెప్పివెళ్లే పధ్ధతి కనబడింది.Setting Up Your Shots అనే పుస్తకం చాలా ఉపయోగపడుతుంది.
సినిమా తీయడానికి డబ్బు, కోరిక ఉండాలి.మెప్పించేలా తీయడానికి Blood,Sweat & Tears కూడా కావాలి.
Goodluck Once again
చండీ దాస్
pappu says:
ముందుగా హరి చరణ్ కి అభినందనలు.
సాయి గొర్తి కి కూడా అభినందనలు ఇంత చక్కటి విశ్లేషణకు.
చండీదాస్ గారి విశ్లేషణ వల్ల హరి చరణ్ కి తన మేధస్సుకు పదును పెట్టుకునే సూచన,తదుపరి చిత్రం లో నిరూపించుకునే అవకాశం రెండూ దొరికాయి.
ఇంత మంది సహచరుల చేయూత హరిచరణ్ కి తదుపరి చిత్రంలో తనని తాను పూర్తిగా నిరూపించుకోగల విశ్వాసాన్ని ఖచ్చితంగా ఇస్తుందని నమ్ముతున్నాను.
ఇకపోతే హరిచరణ్ కి చిన్న సూచన:
“స్నేహమూ, వ్యాపారమూ నమ్మకం మీదే నడుస్తాయి. మీరూ నాలాగే సినిమా అంటే పరితపిస్తారు. అది నాకు మీ మాటల్లో కనిపించింది. నన్ను మీరు నమ్మాలంటే నేను ముందు మిమ్మల్ని నమ్మాలి. ఆ నమ్మకంతోనే మీకు స్క్రిప్టు ఇచ్చానని” చెప్పారు
మీరు నమ్మడంలో తప్పులేదు కానీ అది మిమ్మల్ని మోసం చెయ్యడానికి(సాయిగారికి-హరిచరణ్ కి మధ్య జరిగిన విషయానికి సంబంధించదు)అవతల వారికి చక్కటి అవకాశం కాబట్టి-ఇది సినిమా లోకంలోని వ్యవహారానికి మాత్రమే అని మనవి ఎందుకంటే అక్కడ పూర్తిగా వ్యాపార సంబంధాలే ఉంటాయి కాబట్టి కొంచం జాగ్రత్తగా వ్యవహరించమని సూచన.
విష్ యూ ఆల్ ది బెస్ట్ హరిచరణ్…