అందరికి నమస్కారం. నవతరంగం చదవడం ఈ మధ్యనే మొదలు పెట్టాను. పాత సంచికలతో సహా చదువుతున్నాను. ఎనభయ్యో దశకంలో విడుదలై ఎన్నో అవార్డులు, ప్రేక్షకుల రివార్డులు గెలుచుకున్న ‘సితార’ సినిమా గురించి కొన్ని విషయాలు చెప్పాలని ఈ ప్రయత్నం.
‘మంచు పల్లకి’ సినిమా ద్వారా తెలుగు తెరకి దర్శకుడిగా పరిచయమైన వంశీ రెండో సినిమా ఇది. భానుప్రియ ఈ సినిమా ద్వారానే నాయికగా పరిచయమైంది. వంశీ తానె రాసుకున్న ‘మహల్ లో కోకిల’ అనే నవలను కొద్దిపాటి మార్పులతో రూపొందించిన ‘సితార’ సినిమా 1984 లో విడుదలై ప్రాంతీయ ఉత్తమ చిత్రం గా కేంద్ర ప్రభుత్వ అవార్డు ను అందుకుంది. ‘వెన్నెల్లో గోదారి అందం’ పాటకు గాను గాయని ఎస్ జానకి కి జాతీయ అవార్డు లభించింది.
సితార సినిమా షూటింగ్ స్టిల్-Picture Courtesy:Vamsy.Net
కథ విషయానికి వస్తే, ఫ్రీలాన్స్ photographer తిలక్ (శుభలేఖ సుధాకర్) రైలు లో ప్రయాణం చేస్తూ, టికెట్ లేకుండా ప్రయాణిస్తున్నఓ అమ్మాయి (భానుప్రియ) కి సహాయం చేయడం కోసం టికెట్ కలెక్టర్ కి ఆమెని తన భార్య సితార గా పరిచయం చేస్తాడు. ఆమెకి ఎవరు లేరని తెలుసుకుని తన ఇంట్లో ఆశ్రయం ఇవ్వడంతో పాటు ఆమె మోడలింగ్ అవకాశాలు ఇస్తాడు. తన గతాన్ని గురించి అడగరడనే కండిషన్ పై అతనితో కలిసి పని చేస్తుంటుంది సితార. ఆమెకు సినిమా అవకాశాలు రావడంతో తక్కువ కాలంలోనే టాప్ హీరోయిన్ గా మారుతుంది. డబ్బు, కీర్తి ప్రతిష్టలు సంపాదించినా, తన గతాన్ని తల్చుకుని బాధపడే సితార కి ఆ బాధని తనతో పంచుకోమని సలహా ఇస్తాడు తిలక్.
గోదావరి తీరంలోని ఓ పల్లెటూళ్ళో ‘రాజుగారు’ గా పిలవబడే చందర్ (శరత్ బాబు) చెల్లెలు కోకిల. పాడుబడ్డ భవంతిలో ఆ అన్నచెల్లెల్లు మాత్రమే ఉంటూ ఉంటారు. ఆస్తులు పాయినా, పరువు కి ప్రాణం ఇచ్చే చందర్, ఓ కోర్ట్ కేసు గెలవడం ద్వార ఆస్తులు తిరిగి సంపాదించాలని ప్రయత్నిస్తూ ఉంటాడు. రాణివాసం లో ఉండే కోకిలకి బయటి ప్రపంచం తెలీదు. చిన్నప్పుడు నేర్చుకున్న సంగీతం, నాట్యాలతో కాలక్షేపం చేస్తూ ఉంటుంది. కోర్ట్ కేసు నిమిత్తం చందర్ ఓ పది రోజులు కోట విడిచి వెళ్తాడు. అదే సమయంలో ఊళ్లోకి వచ్చిన పగటి వేషగాళ్ళ నృత్యాలను కోటలోంచి రహస్యమ్గా చూస్తూ ఉంటుంది కోకిల. ఆ బృందం లో రాజు (సుమన్) ని ఇష్టపడుతుంది. రాజుతో ఆమె పరిచయం ఊరి జాతరకి రహస్యం గా అతనితో కలిసి వెళ్ళడం వరకు వస్తుంది. కోర్ట్ కేసు ఓడిపోవడం తో కోటకి తిరిగి వచ్చిన చందర్ కి కోకిల ప్రేమ కథ తెలియడంతో రాజుని చంపించి, తను ఆత్మహత్య చేసుకుంటాడు.
తన పుట్టు పూర్వోత్తరాలు రహస్యంగా ఉంచమని కోకిలనుంచి మాట తీసుకుంటాడు చందర్. తిలక్ కి సితార తన గతాన్ని చెప్పడం విన్న తిలక్ స్నేహితుడైన ఓ జర్నలిస్టు (ఏడిద శ్రీరామ్) ఆమె కథని ఓ పుస్తకం గా ప్రచురిస్తాడు. తన గతం అందరికి తెలియడానికి తిలక్ కారణమని నమ్మిన సితార అతన్ని ద్వేషిస్తుంది. ఐతే ఆ పుస్తకం కారణంగా రాజు బ్రతికే ఉన్నదని తిలక్ కి తెలుస్తుంది. జర్నలిస్టు సహాయం తో ఆటను రాజు ని వెతికి, ఆత్మహత్య చేసుకోబోతున్న సితార తో కలిపి ఆమెని రక్షించడం తో సినిమా ముగుస్తుంది.
వంశీ దర్శకత్వ ప్రతిభతో పటు, ఇళయరాజా సంగీతం, భానుప్రియ నటన ఈ సినిమా ని ఓ మాస్టర్ పీస్ గా మలచాయి. సితార/కోకిల గా భానుప్రియ అసమాన నటనని ప్రదర్శించింది. పాడుబడిన కోటలో ఒంటరితనంతో బాధపడే కోకిలగా, తన గతం అందరికి తెలిసాక ఆమె ప్రదర్శించే నటన ఎన్న దగినది. ఇళయరాజా సంగీతంలో పాటలన్నీ ఈనాటికీ వినబడుతూనే ఉంటాయి.
‘కిన్నెరసాని వచిందమ్మవెన్నెల పైటేసి’ పాటను మొదట ‘సాగర సంగమం’ సినిమా కోసం రికార్డు చేసారు. ఆ సినిమా లో ఉపయోగించలేక పాదంతో అదే సంస్థ నిర్మించిన ‘సితార’ లో ఆ పాటను ఉపయోగించారు. ఈ సినిమా లో నాకు ఇష్టమైన పాట ‘కు కు కు.’ ఈ పాట చిత్రీకరణ లో చివరి నిమిషం లో మార్పులు చేసారట వంశీ. ఇందుకు కారణం పాటలో నర్తించే జూనియర్ ఆర్టిస్ట్ లు కొంచం వయసు మళ్ళిన వాళ్ళు కావడమే. షూటింగ్ ఆపటం ఇష్టం లేక, వారి ముఖాలు చూపకుండా కేవలం చేతులు మాత్రం చూపుతూ పాటని చిత్రీకరించారు. ఈ పాటలో వచ్చే ‘నువ్వేలే రాజ్యం ఉంది ఈ నలుగు దిక్కులలో’ అనే బిట్ నాకు చాలా నచ్చుతుంది.ఇక ‘వెన్నెల్లో గోదారి అందం’ పాట గురించి ఎంత చెప్పినా తక్కువే.
అంతవరకు సాఫీ గా సాగిన కథ, క్లైమాక్స్ కి వచేసరికి బాగా వేగం అందుకుంటుంది. క్లైమాక్స్ కొంచం సాగదీసినట్టు ఉంటుంది. ఐతే, వంశీ ఇతర సినిమాలతో పోలిస్తే ఈ సినిమా abrupt ending అనిపించదు. నవలలను సినిమాలుగా తీసినప్పుడు, ఎన్ని జాగ్రత్తలూ తీసుకున్నప్పటికీ నవల పాఠకులకి సినిమా పట్ల అసంతృప్తి కలగడం సహజం. ‘సితార’ ను ఇందుకు మినహింపుగా చెప్పొచు. నవల రచయితే సినిమా దర్శకుడు కావడం ఇక్కడి సౌలభ్యం. ‘మహల్ లో కోకిల’ (ఇటీవలే పునర్ ముద్రణ పొందింది) ని ‘సితార’ గా మార్చడం లో వంశీ చాలా జాగ్రత్తలు తీసుకున్నాడు. కొన్ని పాత్రలను తగ్గించడం తో మెలోడ్రామా ను కూడా కొంతవరకు తగ్గించాడు. కథనం, ముగింపులో ఉన్నా వ్యత్యాసాల కారణంగా నవల, సినిమా వేటికవే భిన్నంగా కనబడతాయి. ఈ సినిమా తీసేనాటికి దర్శకుడి వయసు పాతికేళ్ళ లోపే అంటే ఆశ్చర్యం కలుగుతుంది.
గోదావరి పట్ల వంశీ కి ఉన్నమక్కువ టైటిల్స్ నుంచి చాలా చోట్ల కనిపిస్తుంది. అలాగే పాటల చిత్రీకరణ లో వంశీ మార్కు ను చూడవచ్చు. ‘కోకిల’ ని పంజరంలో చిలుక లా చూపే symbolic షాట్స్, చందర్ అసహాయతను చూపే సన్నివేసాలు, సిని తార గతం పట్ల జనానికి ఉండే ఆసక్తిని చూపించే షాట్స్.. ఇలా ఎన్నో. గడిచిన పాతికేళ్ళలో కేవలం 22 సినిమాలు (కొన్ని మంచివి, మరి కొన్ని చెత్తవి) మాత్రమే తీసిన వంశీకి, తనకంటూ చాలమంది అభిమానులు ఉన్నారు.
- మురళి
వెంకట్ నవతరంగం 
అతిథి 
మహేశ్ కుమార్ K 
జోశ్యుల సూర్యప్రకాశ్ 
సౌమ్య V B
shree says:
Nice information…!!
శిద్దారెడ్డి వెంకట్ says:
మురళి గారూ,
నవతరంగానికి స్వాగతం.
మీ సమీక్ష బావుంది. వీలు చూసుకుని వంశీ సినిమాలన్నింటినీ విశ్లేషించి నవతరంగంలో చేర్చే ప్రయత్నం చేయండి.
murali says:
వెంకట్ గారికి, ధన్యవాదాలు. ఒక ప్రేక్షకుడిగా నా స్పందన ను నవతరంగం తో పంచుకోవాలని ఈ ప్రయత్నం చేశాను. వంశీ సినిమాలతో పాటు, నాకు నచ్చిన ఇతర సినిమాల గురించి వీలు వెంబడి రాస్తాను.
K మహేశ్ కుమార్ says:
మంచి పరిచయం, సమీక్ష. నవతరంగానికి స్వాగతం.
మనతెలుగు సినిమాలో, తెలుగున్నదర్శకుల కోవలోకిచెందే చాలాకొద్దిమంది దర్శకుల్లో వంశీ ఒకరు.
Falling Angel says:
నేను కూడా వంశీ అభిమానినే. This is the last Vamsy movie I’ve seen (I backtracked).
Although movie disappointed me, music still haunts me. Hats-off to Vamsy-Iliayaraaja combo.
నవతరంగం సభ్యులెవరైనా వంశీ-ఇళయరాజాల కాంబినేషన్ గురించి రాస్తారని ఎదురుచూస్తున్నాను.
శంకర్ says:
మురళీ గారూ నవతరంగానికి స్వాగతం,
మంచి సినిమాతో పరిచయమయ్యారు. నాకు చాలా ఇష్టమైన సినిమా. బాపు,విశ్వనాధ్ల తర్వాత తెలుగుతనం నిండిన సినిమాలు తీసేది వంశీనే. రాజేంద్ర ప్రసాద్లో ఒక అద్భుతమైన కమేడియన్ ఉన్నాడని పసిగట్టుండకపోతే మన తెలుగు సినిమాకు రాజెంద్రుడు కేవలం నాలుగు సినిమాల విలన్గా మిగిలిపోయేవాడేమో.
గతంలో ఆంధ్రజ్యోతిలో నా పెయిల్యూర్ స్టోరీ అని సెలబ్రిటీస్ రాసేవారు. వంశీ ఈ సినిమా గురించి చెపుతూ ఇది మళయాల సినిమా రీమేక్ అని చెప్పినట్టు గుర్తు. ఆ తర్వాత నవల రాసాడనుకుంటా.. మొదటి సినిమా మంచు పల్లకి సొంత కధ పెయిలైనా రెండో సినిమాగా దర్శకునిగా సక్సెస్ చూసా అని చెప్తాడు. ఆంధ్రజ్యోతితో సంబంధాలు ఉన్నవాళ్ళెవరైనా ఆ వ్యాసం సేకరిస్తే బావుంటుంది. చాలా ఇంఫర్మేషన్ ఉంటుంది.
శిద్దారెడ్డి వెంకట్ says:
మంచు పల్లకే రీమేక్ అనుకుంటా….తమిళ సినిమా….
murali says:
శంకర్ గారికి ధన్యవాదాలు. నాకు తెలిసి ‘మంచు పల్లకి’ తమిళ్ సినిమాకి రీమేక్. అదే పేరుతొ వంశీ ఓ నవల రాసారు కానీ కథలు వేరువేరు. ఆంధ్రజ్యోతి వ్యాసం కోసం నేను ప్రయత్నిస్తాను.
సుజాత!(మనసులో మాట) says:
రాసిన మహల్లో కోకిల నవల చదువుతుంటే “అసలిది సినిమా గా ఎలా తీస్తారు?’ అనిపిస్తుంది. సినిమా చూశాక “ఇంత బాగా తీయొచ్చా” అనిపిస్తుంది. అదే వంశీ గొప్పతనం. గోదావరిని వంశీ ప్రేమించినంతగా ఇంకెవరూ ప్రేమించలేరేమో! వంశీ తీసిన పరమ చెత్త సినిమాల్లో కూదా గోదావరిని చూపించకుండా ఉండడు.(ఉదా:దొంగరాముడు అండ్ పార్టీ, కొంచెం టచ్ లో ఉంటే చెప్తాను, అనుమానాస్పదం వగైరాలు). హీరోయిన్ కి పావలా కాసంత నల్ల బొట్టు పెట్టడం కూడా వంశీ ప్రత్యేకతే!
సితార కు భానుప్రియ కళ్ళే పెద్ద ఎస్సెట్!”ఇంత పెద్ద కళ్ళుంటాయా” అని ఆంధ్రా అంతా తెల్లబోయింది.
వంశీ కథల్లో ఒక “తడి” ఉంటుంది. కానీ కొన్ని చెత్త సినిమాలు కూడా ఎందుకు తీస్తాడో అర్థం కాదు.
రిషి says:
మురళి మీ సమీక్ష చాలా బాగుంది. వీలుంటే ‘అన్వేషణ ‘ సమీక్షించగలరేమో చూడండి.
తెలుగు చిత్రసీమలో ఎటువంటి ఫార్ములాలు,ఈక్వేషన్లూ లేకుండా సినిమా తీయగల అతికొద్ది దర్శకులలో వంశీ ఒకరు. మన సమాజంలో కనిపించే అతి సామాన్యుల జీవితాల్లో జరిగే హాస్యాన్ని పట్టుకోగల్గడం కేవలం వంశీకి మాత్రమే సాధ్యం.
Sree says:
నేను నవల చదవలేదు కానీ, సినిమా చూసాను చాలా సార్లు. వంశీ సినిమాలు అంతే నాకు చాలా ఇష్టం! అన్నింటిలొకీ “కనకమాలక్ష్మి రికార్డింగ్ డాన్స్ గ్రూప్” అంటే చాలా ఇష్టం.
సితార సినిమాలో భానుప్రియ ఉండే కోట వెంకటగిరిలో రాజా గారిది. రాజా గారి అప్పులు చాలా వరకు ఆ ఇంట్లోని “టేకు” త్తెర్చిందని అంటుంటారు.
మంజుల says:
This is what I love about Vamsi. His characters are very believable. They are nice and they are sleazy. That is how most people are. He made films that are natural. I wonder why Vamsi is not considered among the best.
K మహేశ్ కుమార్ says:
@మంజుల: వంశీని ఉత్తమ దర్శకుల కోవనుంచీ ఎవరూ తీసెయ్యలేరు. తెలుగు సంస్కృతిలోని పార్శ్వాలను తెరపైకి అనువదించిన ఆధునిక దర్శకులలో విశ్వనాద్, బాపు, జంధ్యాలతోపాటూ వంశీ ఎప్పుడూ ఉన్నాడు, ఉంటాడు. కాకపోతే, ఈ ప్రతిభావంతుడికి తగిన గౌరవం అటు ఇండస్ట్రీగానీ ఇటు ప్రభుత్వంగానీ ఇవ్వకపోవడం మన దురదృష్టం. తెలుగు ప్రేక్షకులు మాత్రం ఇతడిని ఎప్పటికీ ఉత్తమ తెలుగు దర్శకుల్లో ఒకరిగా గుర్తుపెట్టుకుంటారు,అభిమానిస్తారు.
మురళి says:
@రిషి : ధన్యవాదాలు. తప్పక ప్రయత్నిస్తాను
@sree: వీలయితే నవల చదవండి.
@మంజుల: మహేష్ కుమార్ గారి అభిప్రాయంతో ఏకీభవిస్తాను.
అబ్రకదబ్ర says:
సితార తర్వాత వంశీ తీసిన మరో మంచి చిత్రం – ఆలాపన.
sharma says:
నేను కూడా… వంశీ సినిమాలంటే నాతొ పాటు పక్కవాడి చెవి కూడా కోసెస్తాను
అంతిష్టం మరి! శ్రీ కనకమహాలక్ష్మి రికార్డింగ్ డాన్స్ ట్రూప్ కూడా చాలా బాగుంటుంది. ఆ ఒక్క సినిమానె కాదు, వంశీ సినిమాలలొ పాత్రలు మనచుట్టూ ఉన్నవే అనిపిస్తాయి. కానీ చాలా చెత్త సినిమాలు కూడా తీసాడు ఎందుకో మరి!! ఇన్నింగ్స్ లొ హిట్ అనిపించుకున్న ఔను వాళ్ళిద్దరు ఇస్టపడ్డారు కూడ ఎవరేజ్ గానె ఉంటుంది.
శిద్దారెడ్డి వెంకట్ says:
ఈ సినిమా ని త్వరలో రీమేక్ చేయబోతున్నారట…http://thatstelugu.oneindia.in/movies/spotnews/2008/11/touch-of-new-trend-to-vamsi-sitara-041108.html
ఎంతవరకూ నిజమో….
Bhaskar Ramaraju says:
>>కోర్ట్ కేసు వోదిపోడం తో కోటకి తిరిగి వచ్చిన చందర్ కి కోకిల ప్రేమ కథ తెలియడంతో రాజుని చంపించి, తను ఆత్మహత్య చేసుకుంటాడు. తన పుట్టు పూర్వోత్తరాలు రహస్యంగా ఉంచమని కోకిలనుంచి మాట తీసుకుంటాడు చందర్.
ఈ రెండు వాక్యాలు నాకు కొంచెం కన్ఫ్యూజన్ ని కలిగించినై.
ఐతే మంచి రివ్యూ. నాకు నచ్చిన దర్శకులలో వంశీ ఒకడు.
మురళి says:
@Bhaskar Ramaraju గారు: చందర్ జమీందారీ హోదా లేనిదే బ్రతకలేడు. ఆస్తి మొత్తం కోర్ట్ కేసు లో ఉంటుంది. తీర్పు వచ్చే సమయానికే చెల్లెలు కోకిల పగటివేషగాడైన రాజు తో ప్రేమలో పడిందని తెలుస్తుంది. తన మనుషులతో రాజు ని చంపమని చెబుతాడు. ఐతే వాళ్లు పొరబడి రాజు బదులు మరొకడిని చంపుతారు. ఆ తరువాత దీపపు సెమ్మెతొ పొడుచుకుని చందర్ ఆత్మహత్య చేసుకుంటాడు. పోయే ముందు కోకిల తో కోట విడిచి వెల్లిపోమ్మనీ, తన పుట్టుపూర్వోత్తరాలు ఎవరికీ చెప్పొద్దని మాట తీసుకుంటాడు. సమీక్ష నచ్చినందుకు ధన్యవాదాలు. వీలయితే సినిమా చూడండి. మిమ్మల్ని నిరాశ పరచదు.