వనజ:సమీక్ష
పరిచయం
ఈ మధ్య కాలంలో ఇంత గొప్ప తెలుగు సినిమా నేను చూడలేదు. సినిమా చూసిన తరవాత పదే పదే గుర్తుకు వచ్చిన సినిమా “వనజ”. తెలుగులో ఇంత అద్భుతంగా సినిమా తియ్యగల దర్శక, నిర్మాలే కాకుండా, సినిమా తియ్యటంలోని అన్ని విషయాల్లో ప్రతిభ కనపరచిన సినిమా “వనజ”. అనుకోకుండా అంతర్జాలంలో కనిపించిన సినిమా “వనజ”. చూసిన తరవాత చాలా సేపు ఆలోచిస్తూ ఉండిపోయా! మళ్ళీ చూసా! మళ్ళీ మళ్ళీ చూసా!
నవతరంగం సినిమా మిత్రులకి వనజ గురించి తెలిసే ఉంటుంది. కానీ, నవతరంగంలో “వనజ” గురించి సమీక్షలు చదివినట్లు గుర్తు లేదు. అందుకే ఈ ప్రయత్నం.
2006 సంవత్సరంలో తీసి, 2007 సంవత్సరంలో విడుదల చేసిన సినిమా “వనజ”. రజనేష్ దోమలపల్లి రచించి, దర్శకత్వం వహించిన “వనజ” సినిమా అమెరికాలో, కొలంబియా విశ్వవిద్యాలయంలో పట్టభద్రుడు కావటానికి తీసిన సినిమా!
“వనజ” సినిమాకు వచ్చిన అవార్డులు చూస్తే చాలు, ఈ సినిమా ఎంతమందిని ఎన్ని రకాలుగా ఆకర్షించిందో!
మచ్చుకి:
- న్యూయార్క్ టైంస్ — పూర్తిగా ఆకట్టుకుంది. వనజ ఏ కాలానికైనా సరిపోయే సినిమా.
- న్యూస్వీక్ — శుభప్రదమైన రంగప్రవేశం. దోమలపల్లి తదుపరి చిత్రం కోసం ఎదురు చూడక తప్పదు.
- షికాగో సన్ టైంస్ — అందంగా గుండెలకు హత్తుకొనే భారతీయ చిత్రం. మహాద్భుతమైన నటవర్గం. విసుగు పుట్టించే సన్నివేశం ఒక్కటి కూడా లేని సినిమా.
- వెరైటీ — గుండె లోతుల్ని తాకే చిత్రం.
- లాస్ఎంజిలిస్ టైంస్ — పరలోకం నుంచి వచ్చిన సినిమాలా ఉంది. అయినా ఈ సినిమాలో వాస్తవికత కళ్లకు కట్టినట్టు చూపించారు. మొదటి సినిమాతోనే ఇంత సంచలనమా …
- బోష్టన్ గ్లోబ్ — దోమలపల్లి తన ప్రతిభను నిబెట్టుకోగలిగితే, చెప్పుకోదగ్గ సరికొత్త వ్యక్తి సినిమాలకి పరిచయం అయినట్టే. సత్యజిత్ రాయ్ మరియు డగ్లస్ సిర్క్ ల మేలుకలయిక.
- బోష్టన్ హెరాల్డ్ — భూక్య… క్లిష్టమైన పాత్రలో మహత్తరమైన నటన.
- ఫిలడెల్ఫియా ఎంక్వైరర్ — మిలమిలలాడే కళ్ళున్న వనజ. ఆమె ఆత్మ, నవ్వు – హిందూ మహాసముద్రం అంత పెద్దవి.
విచిత్రం. ఈ సినిమా భారతదేశంలో విడుదల కాలేదుట. మంచి తెలుగు సినిమాలు, ఆంధ్రాలో మన తెలుగువాళ్ళు చూసే అదృష్టం లేదా! వనజ పాత్రధారి “మమత భూక్య” తన 15వ ఏట అందించిన నటన అద్భుతం.
1991 సంవత్సరంలో ఆంధ్రాలో గర్జనపల్లిలో ఒక గిరిజన కుటుంబంలో పుట్టిన మమత, తన తల్లితండ్రులకున్న ఆరుగురు ఆడపిల్లల్లో ఆఖరమ్మాయి. తండ్రి ఫారెష్ట్ ఆఫీసరు. మమత ఎనిమిదో తరగతి చదువుతుండగా “వనజ”లో నటించే అవకాశం వచ్చింది. అంతకు ముందు నాట్యంలో కాని నటనలో కాని పరిచయం లేని మమత, ఒక్క ఏడాదిలో రెండూ నేర్చుకొని పరిణితి సాధించింది. 15 ఏళ్ళకే, తన మొదటి సినిమాలో తల్లి పాత్ర అత్యత్భుతంగా పోషించింది.
సినిమా కథ
దక్షిణ భారతదేశం (ఆంధ్రా)లో, సాంఘిక కట్టుబాట్లు బలంగా ఉన్న కాలంలో, జాలరి కుటుంబంలో పుట్టిన 15 ఏళ్ళ వయసున్న వనజ తన జీవితంలోని వడిదుడుకుల్ని అధిగమించే ప్రయత్నమే ఈ సినిమా. తండ్రి చేపలు పట్టి అమ్మి తెచ్చే డబ్బు నానాటికి తక్కువ అవుతుండటం వల్ల పెరిగే అప్పుల భారం తగ్గించడం కోసం, ఆ ఊర్లో రమా దేవి అన్న జమిందారిణి (ఊర్మిళ దమ్మన్నగారి) ఇంట్లో పనికి కుదురుతుంది వనజ.
అంతకు ముందు, ఒక ముసల్ది సోది చెపుతూ, వనజకు డాన్సరుగా ఉజ్వలమైన భవిష్యత్తు ఉందని చెపుతుంది. వనజకి ఉన్న తెలివి తేటలకి, ఉత్సాహానికి ముచ్చట పడి, పూర్వాశ్రమంలో గొప్ప నర్తకిగా పేరుపొందిన జమిందారిణి వనజకు పాట, కూచిపూడి నృత్యం నేర్పుతుంది. ఆ కాలంలోనే, 23 ఏళ్ళ వయసున్న జమిందారిణి కొడుకు శేఖర్ (కరణ్ సింగ్) ఆ ఊరి ప్రాంతీయ రాజకీయాల్లో చురుగ్గా పాల్గొనటానికి అమెరికా నుంచి తిరిగి వస్తాడు.
కొన్ని పరిస్థితుల ప్రభావం వల్ల, 15 ఏళ్ళ వయసున్న వనజను శేఖర్ లోబరుచుకొని బలాత్కరిస్తాడు. అందుకు ఫలితంగా వనజ గర్భవతి అయ్యిందన్న విషయం తెలిసిన జమిందారిణి, తన కోడుకుని కోప్పడి, వనజకు ఆబార్షన్ చేయిస్తానంటుంది. అందుకు ఒప్పుకోని వనజ జమిందారిణి ఇంటినుంచి పారిపోయి, ఒక స్నేహితురాలి ఆశ్రయంలో, కొడుక్కి జన్మ ఇస్తుంది. తరవాత, ఎలాగో బతిమాలి మళ్ళీ జమిందారిణి ఇంటికి తన కొడుకుతో సహా వచ్చి ఉంటుంది. జమిందారిణి ఆదేశం మేరకు, వనజ కొడుకు జమిందారిణి ఇంట్లో పిల్లవాడుగా పెరుగుతాడు. వనజకు మాత్రం తన కొడుకు మీద ఎటువంటి హక్కు ఉండదు. ఇది జరిగిన ఒకటి, రెండు నెలలకి వనజ తండ్రి చనిపోతాడు. వనజ తల్లి తన చిన్నప్పుడే చనిపోటం వల్ల, వనజ ఒంటరిదై పోతుంది. ఇలాంటి పరిస్థితుల్లో, తన జీవితానికి గమ్యం వెతుక్కుంటూ, అతి చిన్న వయస్సులో వనజ జమిందారిణి ఇంటినుండి ఒక్కత్తే బయటకు వచ్చేయటంతో సినిమా ముగుస్తుంది.
నటనా కౌశల్యం
ఈ సినిమాలో అందరూ ప్రతిభావంతంగా నటించారు. వనజ పాత్రధారి “మమత భుక్య” నటన అన్నిటికన్న మిన్న. అతి క్లిష్టమైన సన్నివేశాలని చాలా బాగా చేసింది. కొన్ని సన్నివేశాల్లో, మమత నటన చూసి మొత్తం యూనిట్ అంతా కళ్ళ నీళ్ళు పెట్టుకున్నారని ఒక ఇంటర్వ్యూలో మమత చెప్పింది. అలాగే, సినిమా ప్రివ్యూ చూపించిన తరవాత తనకి Standing Ovation ఇచ్చారని, అది తన జన్మలో ఎప్పుడూ మర్చిపోలేనని మమత, న్యూయార్క్ లో “వనజ” సినిమా విడుదలపై జరిగిన ఒక ఫంక్షన్లో చెప్పింది. ఈ సినిమా ఎందుకు ఇండియాలో విడుదల కాలేదో అని కూడా ఆశ్చర్య పడింది.
పైన చెప్పిన విమర్శల్లాగే, నాకూ ఈ సినిమా అంతా ఇంకేదో లోకంలో తీసారా అని అనిపించింది. నటీనటుల నటన ఏమీ కృత్రిమంగా లేకుండా, అతి సహజంగా ఉంది. సంభాషణలు చెప్పటం, అందుకు స్పందనగా పాత్రల మొహాల్లో కనపడే భావాలు, చాలా చక్కగా ఉన్నాయి. జమిందారిణిగా “రమా దేవి” నటన కూడా అత్యద్భుతం. వనజ తండ్రి పాత్రధారి, అలాగే జమిందారిణి ఇంట్లో వంట చేసే పాత్రధారి, శేఖర్ పాత్రధారి నటన – అన్నీ ఎంతో గొప్పగా ఉన్నాయి.
సాంకేతిక ప్రతిభ
ఈ సినిమాకి సంగీతం ఎంతో ప్రధానమైనది. కూచిపూడి నృత్యానికి తగ్గట్టు మంచి సంగీతం అందించారు. అలాగే, ఆంధ్రాలోని పల్లెటూరి వాతావరణాన్ని అతి చక్కగా చిత్రీకరించారు.
నా ఆలోచనలు
“తెలుగులో మంచి సినిమాలు రావట్లేదు” అన్న నా సణుగుడు, ఈ సినిమాతో సద్దుమణిగింది. “తెలుగులో మంచి సినిమాలు తియ్యగల ప్రతిభావంతులు ఉన్నారు” అనిపించింది. ఇలాంటి సినిమాలు వ్యాపార పరంగా విజయం సాధించగలవో లేవో నాకు తెలియదు. కానీ, సినీప్రియులు మాత్రం తప్పకుండా మెచ్చుకుంటారని నా దృఢ నమ్మకం. ఇప్పటి తెలుగు సినిమాల్లో మామూలుగా కనపడే హీరో-హీరోయిన్ల పిచ్చిగంతులు, వాటికి తగ్గట్టే ఉండే పాటలు, ఎక్కువ భాగం చెత్తగా ఉండే సంభాషణలు, ఏమాత్రం ఆకట్టుకోలేని నటీనటుల నటనలతో పోలిస్తే, “వనజ” సినిమా ఎక్కువమంది ఆదరించే ఒక చక్కని వినూత్న ప్రయోగం.
ఇంత చక్కని సినిమా అందించిన, దర్శక, నిర్మాతలు, నటీనటులు, సాంకేతిక వర్గం – అందరూ అభినందనీయులే!
తెలుగు సినిమాకు మళ్ళీ మంచి రోజులొచ్చినట్టేనా!
Filed Under: తెలుగు • భారతీయ సినిమా • సమీక్ష
ఈ సినిమా చూసే అదృష్టం ఇప్పట్లో మన తెలుగువారికి కలగకపోవచ్చు. కనీసం DVD అయినా రిలీజ్ చేసుంటే కొందరైనా చూసేవాళ్ళేమో!
తెలుగులో మంచి సినిమాలు తియ్యగల ప్రతిభావంతులు చాలామందే ఉన్నారు. కానీ మంచిరోజులు మాత్రం ఇప్పట్లో రావు, రాలేవు. మన సినీపరిశ్రమ నమూనా మరియూ మనుషులు ‘మార్పు’ కు కాస్త దూరం అనిపిస్తుంది.
gud analysis dear
it is disappointin greatly ..b caz no chance to get atleast cd or dvd na,,
very un happy ..let us hope …soon director may release dvds atleast.
My reaction to this film here
http://vinnakanna.blogspot.com/2007/10/blog-post.html
అలాగే వనజ దర్శకుడి తో ఇంటర్వ్య కూడా ఇక్కడ చదవండి
http://navatarangam.com/?p=314
DVD is already released. You can buy it from the following link
http://www.vanajathefilm.com/
ఈ సినిమలో కథ, కథనం, సినిమాటోగ్రఫీ, ఎడిటింగ్ అత్యున్నత స్థాయిలో ఉన్నాయి. నటీనటులు కూడా బాగా చేసినప్పటికీ డైలాగులు పేలవంగా ఒక్కోసారి out of the place గా వుండడమూ మరియు, డైలాగు డెలివరీ కృతిమంగా వుండడం లోపంగా కనిపించింది. చాలా చోట్ల ఈ కృతిమత్వం కనిపించినా తెలుగు వాళ్ళకే ఈ తేడా తెలుస్తుంది.నాకు తెలిసిన తెలుగు రాని స్నేహితులకి ఈ సినిమా చాలా బాగా నచ్చింది. ఓవరాల్ గా film language and grammar పరంగా ఎంతో ఉత్తమ ప్రమాణాలు కలిగిన సినిమా అయినప్పటికీ సంభాషణల్లో కృతిమత్వం దర్శకుడు దేశం విడిచి చాలా రోజులయిన నిజాన్ని అతని ఎన్నారైనెస్ ని తెలుపుతుంది. నిరాశ కలిగించకపోయినా అధ్బుతం అని అనిపించలేదు. మొదటి సినిమా కాబట్టి ఈ తప్పులన్నింటినీ క్షమించెయ్యొచ్చు. రాబోయే కాలంలో రజనీశ్ మరిన్ని ఉత్తమ తెలుగు సినిమాలతో మనకందిస్తారని ఆశిస్తున్నాను.
ఈ సినిమా గురించి నవతరంగంలో ఎవరు సమీక్షిస్తారా అని ఎ దురుచూస్తున్నా. లక్ష్మన్నగారు మంచి ప్రయత్నం. కానీ ఎం దుకో ఈ సినిమాలో చాలా విషయాలు నాకు అంతగా రుచించలేు. ముఖ్యంగా కారెక్టరైజేషన్లు … అసలు ఏ పాత్రకి ఒక నిర్దుష్టమైన భావాలు ఉండవు. ఏ సీన్కి ఆ సీన్ సెపరేట్గా అనిపించాయి. సినిమాని ముక్కలు ముక్కలుగా చేసి చూపిస్తే బానే ఉంటుంది. మెత్తంగా కలిపి చూసినప్పుడు ఇది క్లియర్ కట్గా కనిపిస్తుంది. ఇక ఈ సినిమాని తెలుగులో ఎందుకు రిలీజ్ చెయ్యలేదంటే కొన్ని చోట్ల పోయిన అతిపోకడలకు చాలామందికి ఇబ్బంది కలిగించే అవకాశం ఉంది. ఇది కేవల ఇంటెర్నేషనల్ సర్కిల్ కోసం తీసిన సినిమా అని నా అభిప్రాయం (ఎక్కువగా world cinema చూసి impress అయ్యి రాసుకున్న కధని నాకనిపించింది). అందుకే అక్కడ బాగా నడుస్తుండొచ్చు. మీరు చెప్పినట్టు ఇది నిజంగా మరో ప్రపంచాన్ని తలపించే సినిమానే. కానీ ఆ ప్రపంచాన్ని మన తెలుగువాళ్ళు ఐడెంటిఫై చేసుకోవడం చాలా కష్టం. సినిమాటొగ్రఫీ, సంగీతం,దర్శకత్వ ప్రతిభలకి ఏమాత్రం పేరుపెట్టలేకున్నప్పటికీ ఎంచుకున్న ప్లాటు పెద్ద అవరోధం అయ్యింది. ఇక నటీనటులు అందరూ ( ఒక్క వనజ పాత్రధారిని తప్ప) ప్రతీ సన్నివేశంలోను తమ డయిలాగు వచ్చినప్పుడు సడెన్గా నటించడం మొదలుపెడతారు. మిగతా పాత్రలు డైలాగ్స్ చెప్తున్నప్పుడు మనతో పాటు సినిమా చూస్తుంటారు. కొన్ని సీన్లలో వింత వింత ఎక్ష్ప్రెషన్స్ చూపిస్తారు అవెందుకో దర్శకుడు DVD వెర్షన్లో కూడా వివరించలేదు. కేవలం ఇంటెర్నేషనల్ ప్రేక్షకుల కోసమే తీసినప్పుడు మన సంస్కృతీ సంప్రదాయాలని రుచి చూపించకుండా కేవలం లొకేషన్స్ ఇక్కడివి తీసుకొని కధని ఎక్కడ్నుండో తీసుకొచ్చి కలిపి కుట్టేసినట్టనిపించింది. సినిమాలో అందరూ తెలంగాణలో మాట్లాడుతోంటే వనజ తండ్రేమో సముద్రంలో చేపలు పట్టడానికి రోజూ అటు ముంబాయో ఇటు వైజాగో వెళొస్తునటాడు. ఈ ఒక్క ఉదహరణ చాలనుకొంటా ఇది తెలుగువాళ్ళ కోశం తీసిన సినిమా కాదని. ఇదంతా నేను కేవలం ఇది ఇక్కడ ఎందుకు రిలీజ్ కాలేదు అనేదానికి సమాధానగా మాత్రమే చెప్తున్న. టార్గెట్ ప్రేక్షకులమైన మనలాంటి వాళ్ళు ఎలాగు రిలీజ్ అవ్వకపోయినా వెతికి పట్టుకొని చూస్తాం కాబట్టి పోయిందేమీ లేదు. ఈ సినిమా విషయంలో మెచ్చుకోవాల్సింది ఏంటంటే భారతదేశం(ఆంధ్రప్రదేశ్ ) బయట తెలుగు సినిమాకి గుర్తింపు రావడానికి కృషి చేసే ఒక మంచి దర్శకుడు పరిచయమయ్యాడు. మంచి కధలు ఎన్నుకుంటే ఇతను ఖచ్చితంగా తెలుగు సినిమా ఉనికిని నిలబెడతాడు. విజువల్స్ ఐతే మన తెలుగు సినిమా స్ధాయికి అందనంత ఎత్తులో ఉన్నాయి. నా రేటింగ్ 3.5/5
మిత్రుల స్పందనలు చదివాను. చాలా విషయాలు నే అనుకొన్నవే! సంభాషణలు మొదలైన విషయాలు నన్ను కొంచెం ఆలోచింప చేసిన మాట వాస్తవం. అయితే, నాకు మొత్తం మీద ఈ సినిమా నచ్చటానికి కారణాలు:
1. మొదటి ప్రయత్నంలో ఒక తెలుగు దర్శకుడు ఇంత బాగా తీయటం.
2. ఆంధ్ర దేశానికి దూరంగా నివసిస్తున్న వారిలో కొన్ని మార్పులు వస్తాయి. అవి సూక్ష్మమైన మార్పులు. ఆందువల్ల, తెలుగు నేలతో, ప్రజలతో పరిచయాలు తగ్గటం వల్ల వచ్చే మార్పులు, బహుశా ఈ సినిమాలో కూడా చోటు చేసుకొన్నాయేమో!
3. భాష, సినిమా లోకేషన్ నాకు నిజామాబాద్ పరిసర ప్రాంతాలుగా అనిపించాయి. సినిమా దర్శకునికి ఈ ప్రాంతాలతో పరిచయం ఉన్నట్టుంది.
4. వనజ సినిమాలో చూపినట్టు, మన దేశంలో ఒక 15 ఏళ్ళ వయసున్న అమ్మాయికి జీవితం మీద ఉన్న ధైర్యం నాకు ఎంతో నచ్చింది. నాకు తెలిసి, 15, 16 సంవత్సరాల వయస్సులో తల్లులయిన వ్యక్తులు జీవితంలో ఎన్నో అడ్డంకులను ఎదుర్కొని జీవితం గడపటం చూసాను. వనజ సినిమా నాకు ఆ వ్యక్తులను గుర్తుకు తెచ్చింది.
అందరిలాగే, నేనూ మరిన్ని సినిమాలు రజనేష్ దోమలపల్లి నుంచి వస్తాయని ఆశిస్తూ,
విష్ణుభొట్ల లక్ష్మన్న
@Laxmanna gaaru
I completely agree with the 4 points you mentioned in the previous comment. My intention is just to find some answers to the question ‘ Why this movie is not released in India’… I like the movie for the reasons you pointed out in ur essay…
Ayina ituvanti cinemalu manchi cinemalu ela avuthayi andi mari too much kakapothyey…athramaa gaa DVD koni mari choosa…dvd player x4x speed run chesi choosina peddaga miss ayyamu anna feel raadhu.
Inka cinemaki vasthey aa ardhaatharamga vadileyadamlo emi ardham neekaithey ardham kaaledhu….
antha pedda goppa cinema emi kaadhu..choodaka poina pedda ga poyedhi emi ledhu ani naa abhipraayam
శశాంక్ భలే చెప్పావు లే. నీ సెన్సిబిలిటీస్ కి జోహార్లు. ఏ ఊరు మనది?
నటన సంగతి సరే ఇంతకీ దర్శకుడు ఈ సినిమాతో ఎం చెప్పదలుచుకున్నాడో అర్థం కాలేదు, జమిందారీకి వంశాంకురాన్నిచ్చి ఎవరులేకుండా మళ్ళీ తన బతుకును భవిష్యత్తును వెతుకుతూ వెళ్ళిన వనజ ద్వారా ప్రేక్షకుడు నేర్చుకోవాల్సిందేమిటి..దీని గురించి ఎవరు చర్చించడంలేదు, నేను ఇంకా సినిమా సినిమా చూల్లేదు ఎవరైన ఆ విషయాన్నికూడా చర్చిస్తే బాగుంటుంది.
@అరవింద్
సినిమాలు కథలు/నవలలలాగే ఒక కథను చెప్తాయి. అంతే.
ఇందులో మెసేజ్ ఉండాలి అన్న అవసరం లేదు.వనజ అనే ఒకమ్మాయి జీవితంలో జరిగిన సంఘటనలు ఈ సినిమాలో పొందుపరిచాడు దర్శకుడు. దాన్నుంచి ఏదైనా ఎందుకు నేర్చుకోవాలనుకుంటున్నారు?
వెంకట్ పుణ్యమా అని ఈ సినిమాని ఓపిగ్గా, నా స్లో ఇంటర్ నెట్ తో కష్టపడి చూసా. బాగానే ఉందిగానీ, గొప్పగా మాత్రం లేదు.సాంకేతికపరంగా ముఖ్యంగా సినెమాటోగ్రఫీపరంగా మెచ్చుకోదగిందే అయినా, చాలా వెలితిగా అనిపించింది.
ఫామ్ కన్నా కంటెంట్ కు ప్రాధాన్యతిచ్చే నాలాంటి సగటు ప్రేక్షకుడికి బహుశా ఏమాత్రం నచ్చని సినిమాలా అనిపించింది. ఎందుకో తెలీదు ఈ సినిమా చూడగానే ‘గమ్యం’ గుర్తుకొచ్చింది. I prefrer Gamyam over Vanaja.
sagatu jeevi gaaru…maadi tirupati…intaki meedhi e ooroo……………………
My name is Shanta Rayaprolu. I Heard lot about this Movie VANAJA but could not get either DVD or LCD. My daughter is learning the classical dance here in USA and I really wanted her to see this movie. After reading the review Iam more eager to watch this movie. Now-a-days telugu movies are nothing but triangular love stories or factionist stories or movies with no purpose. Hope this movie will be the begenning of new era of purpose oriented movies. At the same time can some one direct me , where can I find this movie. Thank you.
శాంత గారూ,
మీరు DVD కొనాలంటే ఈ క్రింది లింకు చూడండి.
http://store.emergingpictures.com/CDA5240F87574D8387EBDE8FEC733210/store/store.asp?nProductID=22936