దశావతారం సినిమా గురించి ఇటీవలే ఓ టపా రాసాను. కానీ, ఆ సినిమా లో కమల్ పోషించిన పది పాత్రల గురించీ రాయాలనుకుని, అది పెద్దదైపోయిందని ఆపేశాను. ఆ టపా కొనసాగింపు ఈ టపా. మొదటి భాగం ఇక్కడ.
1. గోవిందరాజు పాత్ర: సైంటిస్టు గోవిందరాజు పాత్ర – కమల్ కమల్ లా ఉన్న మూడు పాత్రల్లో ఇది ఒకటి. (మిగితా రెండు నంబి, బలరామ నాడార్.) ది టిపికల్ కమల్ హాసన్ ని ఇక్కడ చూడొచ్చు. పాత్ర పరంగా బానే ఉంది. పాపం ప్రధాన పాత్రే అయినా పాటలేదు. 
ఈ పాత్ర పరంగా ఒకే సందేహం. గో.రా. పేరు ఎందుకు వాడుకున్నారు? అన్నది. అది తమిళ వర్షన్ చూసిన వాళ్ళ కథనం విన్నాక అర్థమైంది – అక్కడ వేరే పేరు వాడుకున్నారు కనుక, తెలుగులో గో.రా. ను తేవలసి వచ్చింది అని. కానీ, అలా చూసినా కూడా నాకు ఆ బిట్ అనవసరం అనిపించింది. ఈ పాత్ర పరంగా కమల్ పర్వాలేదనిపించాడు నాకు. ది టిపికల్ కమల్ అయినా కూడా, వయసు తెలుస్తోంది కనుక, పూర్తి స్థాయిలో ఆకట్టుకోలేకపోయాడు.
2. రంగరాజన్ నంబి పాత్ర: ఇది చూస్తూ ఉంటే, నిజంగా ఆ నంబి ఉండి ఉంటే ఇలాగే ఉండేవాడేమో అనిపించింది. అంత బాగా కుదిరాడు కమల్ ఈ పాత్రకి. ఎక్కువ డైలాగులూ గట్రా లేవు గానీ, ఉండి ఉంటే బాగుండేది. అసలీ పాత్రే పెట్టి పెద్ద కథ ఒకటి నడిపించి ఉండాల్సింది. (అప్పుడు పది పాత్రల కాన్సెప్ట్ వర్కవుట్ అయ్యేది కాదు, కమల్ దుగ్ధ తీరేదీ కాదు అనుకోండి… అది వేరే విషయం.) ఈ పాత్ర ఆహార్యం విషయంలోగానీ, తెరపై చూపే విషయంలో గానీ చాలా శ్రద్ధ తీసుకున్నారు. అసలు సినిమాలో ఈ భాగం తీసినట్లు ఇంకే భాగమూ తీయలేదేమో.
3. బుష్ పాత్ర: బుష్ పాత్రకి కమల్ బాగా సరిపోయాడు. బుష్ కదలికల్నీ, కవళికల్నీ ఎంత చదివాడో ఆ పాత్ర పోషణలోనే తెలుస్తోంది. ఇంతకీ నాదో సందేహం. ఇలా బుష్ ని ఓ ఐటెం లాగా చూపిస్తే, ఆయనూరుకుంటాడా? అని. ఈ పాత్ర మేకప్ కూడా బుష్ లాగానే ఉంది. ఎటొచ్చీ, కమల్ మాదిరిగా లేదు…అదీ సమస్య. 
అయితే, ఇక్కడో లాజిక్ ఉంది. కమల్ లా ఉంటే, అమెరికన్ లా ఎలా ఉంటారు? అందుకని, అమెరికన్ లాగా అనిపించడానికి పడ్డ కష్టమన్నమాట ఇది
4. ఫ్లెచర్ పాత్ర: నాకు బాగా నచ్చిన పాత్రల్లో ఇదొకటి. విలనీ ని అద్భుతంగా చూపించారు ఈ పాత్రలో. ఈ పాత్ర శరీరాకృతి దగ్గర్నుండి, ప్రవర్తనా, భాషా, ముఖ్యంగా మేకప్ – ఎక్కడ కూడా నాకు కమల్ లాగా అనిపించలేదు. ఈ వాక్యాన్ని చెప్పడం లో వ్యంగ్యం మాత్రం లేదు సుమండీ. అంతగా, పూర్తి వేరే మనిషిగా తన్ను తాను ఆవిష్కరించుకున్నాడు కమల్. ఫ్లెచర్ అనగానే ఫ్లెచర్ గుర్తుకొస్తాడు కానీ కమల్ కాదు. అంతగా కమల్ ఆ పాత్రలో ఒదిగిపోయాడు.
5. జపాన్ మనిషి పాత్ర: ఏ కాస్త కూడా కమల్ అనిపించని పాత్రల్లో ఇదొకటి. కానీ, ఈ పాత్రకోసం కమల్ జాపనీస్ లో కూడా డైలాగులు చెప్పుకున్నాడంటే అర్థమౌతున్నది అతను తీసుకున్న శ్రద్ధ. ఎక్కడా ఇదో భారతీయుడు పోషించినట్లు తెలియలేదు. నిజం జాపనీయుడే నటించినట్లు అనిపించింది. ఇలా అసలు నటిస్తున్నది ఎవరో కూడా అర్థం కానంత బాగా నటించడం మరి మరొకరికి సాధ్యం కాదు. అసలు ఇది మంచి విషయమో,కాదో కూడా తెలీడం లేదు నాకు. ఓ పక్క ఇంకో ప్రశ్నే లేకుండా అర్థమవుతోంది కమల్ లోని నటనా ప్రతిభ – చూసేవారికి చూస్తున్నది తననా? ఇంకోరినా? అన్న అనుమానం కలిగించేంతగా తన్ను తాను మారుస్తూ వైవిధ్యం కలిగిస్తున్నాడు కనుక. ఓ పక్క -ఇలా చేయడం వల్ల అతని ప్రతిభ గురించి మళ్ళీ మళ్ళీ అతనే చెప్పడం తప్ప జరిగేదేమిటి? అని అనుమానం. ఈ కథ ఇంకోరెవరో రాసి, ఇంకోరెవరో స్క్రీన్ప్లే చేసి ఉండాల్సిందేమో…అప్పుడు ఇది ఇలా మేగాలోమేనియా లా అనిపించేది కాదేమో.
6. బలరామ నాడార్ పాత్ర: బలరామ నాడార్ – పేరు తలుచుకుంటే ఇప్పుడు కూడా నవ్వు ఆగడం లేదు నాకు నిజానికి. అంత బాగా హాస్యం పండించాడు కమల్ ఈ సినిమాలో. అసలు ఈ పాత్రతోనే పూర్తి స్థాయి హాస్య సినిమా తీస్తే చూడాలనిపించింది నాకు. ఈ పాత్ర కనబడే విధానం “ఇంద్రుడు-చంద్రుడు” లో మేయర్ పాత్రకి దగ్గరగా అనిపించడం యాదృచ్ఛికమో లేక మరొకటో మరి నాకు తెలీదు. “సైంటిఫిక్ టెర్రరిస్టా? టెరిఫిక్ సైంటిస్టా?” అన్న వాక్యం ఎన్ని సార్లు గుర్తు తెచ్చుకున్నానో లెక్కలేదు. ఇంతకీ, దీనికి ప్రధానంగా మనం తలుచుకోవలసినది సంభాషణల రచయితనైనా కూడా, తెరపై హాస్యాన్ని విజయవంతంగా పండించిన కమల్ ని తలుచుకోకుంటే ఎలా?
7. బామ్మ కృష్ణవేణి పాత్ర: కృష్ణవేణి పాత్రలో కొంతవరకు మేకప్ కృత్రిమంగా అనిపించినా కూడా, కమల్ నటన నాకు చాలా నచ్చింది. ఈ పాత్ర ద్వారా పండించిన హాస్యం కూడా నచ్చింది. చిత్రంలోని మిగితా పాత్రలకీ, ఈ పాత్రలకీ చాలా తేడా ఉంది. నా ఉద్దేశ్యంలో, కమల్ ఈ పాత్ర పోషించడం వేరు, మిగితా తొమ్మిదింటినీ పోషించడం వేరు. ఎందుకంటే, ఒక మగ మనిషి, ఆడ పాత్రను, అదీ ముసలి పాత్రను పోషించడం వివిధ మగ పాత్రల్ని పోషించడం కంటే కష్టం. అయినప్పటికీ, కమల్ ఈ విషయంలో విజయం సాధించాడనే చెప్పాలి.
8. పాప్ సింగర్ అవతార్ సింగ్ పాత్ర: అవతార్ సింగ్ – పంజాబీ గెటప్ బానే కుదిరింది. పంజాబీలాగ మాట్లాడటం కూడా చాలా చోట్ల బానే కుదిరింది. కాకుంటే, ఆ “ఓ ఓ సనమ్” పాటలో నృత్యాలలో మరింత పంజాబీతనం చూపించి ఉంటే ఇంకా బాగుండేది. ఇదివరలో చెప్పినట్లు, ఏ పాత్ర ప్రత్యేకత దానిది. పాప్ సింగర్ భార్యగా జయప్రద కనిపించడం నాకు pleasant surprise. చాలారోజులకి జయప్రదనీ, స్క్రీన్ పై వీళ్ళిద్దర్నీ కలిసి చూడటం బాగుంది.
9. పొడుగు మనిషి కనీఫుల్లా పాత్ర: ఈ పాత్ర మేకప్ అన్నింటికంటే ప్లాస్టిక్ మేకప్. మనిషి అంతెత్తుకి ఎలా కనిపించాడో కానీ, ఐడియా బానే ఉంది. కానీ, మేకప్ విషయంలో – అంత ప్లాస్టిక్ గా చేయాల్సిన అవసరం ఏముంది? ప్లెచర్, జపాన్ మనిషి – వీళ్ళంతా అంటే, విదేశీయుల్లా కనబడాలి కనుక మేకప్ అంతగా మార్చారు. ఇది భారతీయ మొహం ఐనప్పుడు, ఎందుకంత కృత్రిమంగా మేకప్ వేయడం? నాడార్, అవతార్,గోవిందరాజు,నంబి – ఇన్నింటిలో కమల్ లా కనబడ్డ కమల్ ఈ పాత్రలో మాత్రం ఎందుకు కనబడలేదు? ఆ నాలుగూ కాక మిగితా పాత్రల్లో కమల్ మేకప్ విషయంలో అంత కష్టపడ్డం లో అర్థం ఉంది. ఈ మనిషి మేకప్, ఆ గొంతుక – అలా ఎందుకు పెట్టారో అర్థం కాలేదు. కాకుంటే, హాస్యం పరంగా ఈ పాత్ర కూడా బానే ఉంది.
10. దళిత నాయకుడు విన్సెంట్ పుణ్యకోటి పాత్ర: కమల్ పూర్తిగా పుణ్యకోటిగా మారిపోయాడు. ఆ నడక, ఆ చూపూ, ఆ నవ్వూ – అన్నీ పుణ్యకోటికి ప్రత్యేకం. ముఖ్యంగా ఆ నడక. అసలు కమల్ హాసనే ఇది చేసాడు అంటే నాకు ఇప్పటికీ ఆశ్చర్యంగానే ఉంది. సగం పాత్రల గురించి అలాగే ఆశ్చర్యపోయాననుకోండి, అది వేరే విషయం. అసలు ఒక్కో పాత్రా ఒక పూర్తి స్థాయి పాత్రగా ఎదగగలదు, సరైన కథ రాస్తే. కమల్ అన్ని పాత్రల్నీ అవలీలగా పోషించగలడని కొత్తగా ఈ సినిమా చెప్పేదేం లేకపోయినా కొత్తగా చెప్పింది. ఇంతటి ప్రతిభని జీర్ణించుకోడం కూడా కష్టమేమో ఒక్కోసారి. అందుకే ఏమో దీన్ని చాలామంది ఒప్పుకోలేకపోవడం.
ఈ సినిమా గురించి మధ్యలో కొంత నెగిటివ్ గా ఆలోచించినా కూడా, మళ్ళీ ఇప్పుడు దశావతారం appreciation మూడ్ లోకి వచ్చేసా ఈ వ్యాసం చివరికి వచ్చేసరికి. మొత్తానికి నాకైతే “ది మేకింగ్ ఆఫ్ దశావతారం” అని కమల్ ఓ పుస్తకం రాస్తే అది తరువాతి తరాలకి ఉపయోగపడుతుందేమో అన్పిస్తోంది. పాత్రల్ని ఎలా సృష్టించారు? పాత్రల రూపాలు, మేనరిజమ్స్ విషయంలో ఎలాంటి విషయాల్ని పరిగణలోకి తీసుకున్నారు, కొందరు కమల్ హాసన్లు ఒకే సారి కనబడ్డప్పుడు, కలబడ్డప్పుడు – ఎలా తీసారు ఆ దృశ్యాలని.. ఇలాంటి విషయాలను వివరిస్తూ. మొదటి టపాతో పోలిస్తే ఇది కాస్త విమర్శలాగా అనిపించవచ్చు కానీ, I still like the film. కమల్ లో నార్సిసిజం ఎక్కువై ఉండొచ్చు.. లోకనాయకుణ్ణని ఫీలవుతూ ఉండవచ్చు. అదంతా దశావతారంలో బాగా చూపించుకుని ఉండొచ్చు కానీ, despite all that, it was a great effort for an Indian film. ఈ సందర్భంగానే ఈ మధ్య చదివిన ఓ ఫార్వర్డ్ లోని ఓ వాక్యం సారాంశం – “కమల్ ఈ సినిమాలో మీ దేవుడు, మీ దేవుడు అనడం ఆస్తికులకి ఇబ్బంది కలిగించి ఉండవచ్చు గానీ, మీ కమలే కదా అన్నది… పోనిద్దురూ…”. అలాగే… కమల్ మేగాలోమేనియా లో ఉండొచ్చు…కమల్ కి తనమీద అతి విశ్వాసం ఉండొచ్చు… కానీ, మన కమలే కదా.. ఎవర్నన్నా ఇష్టపడితే వాళ్ళ తప్పొప్పుల్తో సహా స్వీకరించమూ? ఇదీ అలాగే… after all, nobody is perfect
వెంకట్ నవతరంగం 
అతిథి 
మహేశ్ కుమార్ K 
జోశ్యుల సూర్యప్రకాశ్ 
సౌమ్య V B
anveshi says:
హ్యాట్సాఫ్ సౌమ్య గారూ,
మీ ఏంగిల్ లో మేము చూడలేకపోయాము
మీ రివ్యూ చదివాక మరో సారి సినిమా చూడాలనిపిస్తుంది.
చూస్తాను.
కె.మహేష్ కుమార్ says:
మంచి వివేకమున్న అనాలిసిస్. ఇంతవరకూ నిరాశ చెందిన ప్రేక్షకుల సమీక్షలు చదివాను. ఇప్పుడొక అభిమాని చాలాశ్రద్దగా సినిమాని చూసి, రాసిన విశ్లేషణని చదువుతున్నాను. రెండూ బాగున్నాయి. మొత్తానికి నేను సినిమా చూసేనాటికి, నాకొక బ్యాలన్స్డ్ పెర్స్పెక్టివ్ వస్తుందన్నమాట! ధన్యవాదాలు.
శంకర్ says:
ఈ సినిమాలో ఐదు క్యారెక్టర్లు నంబి,గో.రా., ఫ్లెచర్,నాడార్, విన్సెంట్ మాత్రమే ఉంచి పంచావతారం తీసుంటే సరిపోయేదేమో అనిపించింది నాకు. దశావతారాల్ని పూర్తి చెసే విషయంలో మిగతా ఐదు క్యారెక్టర్లు అనవశరంగా ఇరికించారు. ఇవి లేకుండా కేవలం ఆ ఐదు పాత్రల మీదే పూర్తిగా కాన్సంట్రేషన్ పెట్టుంటే ఒక క్లాసిక్గా మిగిలిపోయేదేమో.అంత బాగా నచ్చయి అవి. ఓ పక్క అద్భుతమైనవి మరోపక్క ఇలా బలహీనమైనవి(పాత్రలు) ఒకేసారి తెరను పంచుకోవడం వల్ల ప్రేక్షకులకి చాలా ఇబ్బంది కలుగుతుందని ఎందుకు గమనించలేదో కమల్. ఈ అనవశరపు పాత్రల గురించి సినిమాలో ఏమన్నా చెప్పుకోదగినది ఉందంటే అది మీరు ఇక్కడ వ్యాసంలో చెప్పినవే. ఈ పాత్రలలోని లోటుపాట్లను రాయాల్సొస్తే ఒక్క టపా ఖచ్చితంగా సరిపోదు. ఆ పని కూడా మీరే పూర్తి చేస్తే చదివి ఆనందిస్తాం. అన్నట్టు నేను ఈ సినిమాను తమిళ్లో sub titlesతో చూసా. నాడార్ పాత్ర తెలుగులో చెప్పే డైలాగ్స్ సూపర్. తెలుగులో ఎలా ఉన్నాయో చూడాలి.
nageswra rao says:
Dasavataram bagundi…meerannatluga 5 patralatone cheste bagundedi…VINCENT the best character! asalu adi kamal ani Balu gontubatti matrame gurtu pattagalam!Nambi 2nd best…Migata patralanni kamal ani telisipotondi! BAMMA character weekest…adi kamal cheyakunda vundalsindi! How ever kamal is kamal ! It’s great to see such graphics (Sunami & Vigraham ocean effect) on indian screen…Hats off to kamal.
నవీన్ గార్ల says:
ఇది చదువుతూంటే ఎన్నో యేళ్ళ క్రింతం ఓ సినీ పత్రికలో చదివిన విషయం గుర్తొచ్చొంది:
ఎవరో తెలుగు సినీ ప్రముఖుణ్ణి (NTR?) అడిగారంట, “ఏంటండి…మారు వేషం అంటున్నారు, చిన్న గడ్డం మాత్రం పెట్టారేం…ప్రేక్షకులు తేలిగ్గా గుర్తుపట్టెయ్యరూ” అని అంటే, దానికి జవాబు, “గుర్తుపట్టనికాడికి NTRరే కావాల్నా, ఎవరైనా సరిపోతుంది కదా” అన్నారంట.
శిద్దారెడ్డి వెంకట్ says:
@నవీన్
ఇది బాపు గారు చక్రపాణి గారి సెన్స్ ఆఫ్ హ్యూమర్ గురించి చెప్తూ,” యస్వీరంగారావు వేషం అదిపోయింది. అసలు గుర్తుపట్టలేరు” అని ఎవరో అంటే అందుకు చక్రపాణి “గుర్తుపట్టలేకపోతే అందుకు అంత డబ్బుపోసి ఆయన్నెందుకు పెట్టుకోవడం” అన్నారట!
krishna says:
movie keka
krishna says:
నిజంగా కేక
శ్రీ says:
సౌమ్య గారూ,బాగా రాసారు.మీరు కుడా నా లాగే పాత్రలని విడకొట్టి విశ్లేషించడం ఆనందాన్ని కలిగించింది.
venkat Balusupati says:
sowmya garu..
It is thought provoking review …your ‘point of view’ is very nice.
venkat
aswin budaraju says:
యహూ !!! నాకు బా నచ్చింది, నేను అనుకున్నట్టే రాశారు, మొదట అన్నిటికన్నా బలరామ్ నాడల్ ఇంద్రుడు చంద్రుడు లోని విషయం నాకూ కనిపించింది, కానీ గోవిందరాజు పాత్రలో వయసు అంతగా కనపడ నివ్వలేదండీ… కుర్రవాని లానే ఉన్నడు కమల్
అబ్రకదబ్ర says:
అన్ని పాత్రలని ఒకే సారి తెరమీద కనిపించేటట్లు స్క్రీన్-ప్లే రాసుకుని, దాన్ని చిత్రీకరించటం మాటలు కాదు. ఆ పని విజయవంతంగా చేసినందుకు దర్శకుడికి కూడా అభినందనలు తెలియజెయ్యాలి (ఎంత కమల్ అన్నీ తనే అయ్యి విశ్వరూపం ప్రదర్సించినా, కె.ఎస్.రవికుమార్ ఘనతనీ తక్కువగా అంచనా వెయ్యలేం). ఎడిటర్కి కూడా ఆ ఖ్యాతిలో భాగం దక్కుతుంది. దేవిశ్రీ ప్రసాద్ నేపధ్య సంగీతం కూడా ఆశ్చర్యపరిచే రీతిలో ఇచ్చాడు. బ్లూ-స్క్రీన్ చాలా ఎక్కువగా వాడి ఉంటారు ఈ సినిమాలో. ఎక్కడా ఆ ఛాయలు కనిపించకపోవటం భారతీయ చిత్రాలలో సాంకేతికంగా గొప్ప విషయమే. ఎటొచ్చీ, ఎంతో ప్రచారం చేసిన హిమేష్ రేషమ్మియా సంగీతం మాత్రం తేలిపోయింది. అది కూడా దేవిశ్రీకే ఇస్తే ఇంకా బాగా చేసుండేవాడేమో. పాటలన్నీ తన పాత హిందీ సినిమాల్లోంచే తీసుకుని కాస్త మార్చి ఇక్కడ పెట్టాడు (ఉదా: ‘లోక నాయకుడా’ అనే పాట స్వరాలు ‘why does it happen in love’ అంటూ ఏదో హిందీ సినిమాలో హిమేషే స్వరపరచిన పాటవి)
kamala says:
chaala bagundandi mee review
rayraj says:
ఐ థింక్..ఏ ఆర్ రెహ్మాన్ ని పెట్టుకునే బడ్జట్ ధైర్యం చేయలేక,సంగీతం మంచిగా ఉంటే చాలు,మరీ అంత పెద్ద పేరొద్దని, మరీ అంత తక్కువ కాకుండా దేవీశ్రీని దగ్గర పెట్టుకొని, పాన్ ఇండియా అప్పీల్ కోసం హిమేష్ రేషమ్యా “పేరు” మార్కెట్ చేసారు అని నా అనుమానం; నిజానికి, “రాయిని మాత్రం”, “ముకుందా ముకుందా”, వాడు చేశాడు అంటే నేను నమ్మలేను; బహుశా, ఒ ఒ సనమ్, లోకనాయకుడా నే వాడు చేసుంటాడు అని నా అనుమానం; ఇక ఆ “లోకనాయకుడా”అనే పాట ..అదీ ఓ తెలివే..ఉత్త దురద కాదు..మాస్ ఫ్యాన్ ఫాలోయింగ్ ఎలా ఉంచుకోవాలో తెలిస్తే అది అర్ధం ఔతుంది. గుడ్ రివ్యూ..పాత్రల్లోని ఇంటలెక్ట్యుయాలిటీని ఇంకా కొంచెం రాసుకోవచ్చు; ఐనా ఎంతని రాస్తం; చూసి అలా తెలుస్తుంటే ఆనందం అనుభవించాలి గాని.ఇంతకీ ఈ సినిమా కమర్షిల్ సక్సస్ అనే అన్నారా…నష్టం అన్నారా..దట్స్ ది క్రూషియల్ థింగ్ ఐ వాంటు నో…కెన్ సమ్ వన్ హెల్ప్ మి!? ప్రాజెక్ట్ మొత్తం సాచివేతగా జరిగి కాస్తా బడ్జట్ ఎక్కువకూడా ఐపోయినట్టు విన్నాను; కుడ్ దిస్ మూవీ రికవర్ ఆల్ దట్ ఎట్ లీస్ట్ ఇఫ్ ఇట్స్ నాట్ ఎ కమర్షియల్ సక్సస్!
sadguna says:
kikk cinema bagane undi chudochu chala jokes unnayi second half sutti ga undi kani sure 100 days cinema mottam navvutune untam. ravi teja look chala bagundi iliyana kuda navvadaniki aite chudochu story aite emo teleedu