ఒక మంచి తమిళసినిమా ఏదన్నా ఉంటే చెప్పు చూస్తాను అని నా తమ్ముణ్ణి అడిగితే ఇది చూపించాడు. చూశాక దీని గురించి వీలైనంతమందికి చెప్పాలి అనిపించింది నాకు. బరువైన విషయాన్ని కూడా ఎక్కడా పట్టు సడలకుండా, ఎక్కడా మనకు మరీ భారంగా అనిపించకుండా, ఎక్కడా హాస్యం పాలు తగ్గకుండా, ఇన్ని చేస్తూ కూడా కథ నుండి సైడ్ ట్రాక్ అవ్వకుండా రెండు గంటలకి పైగా ప్రేక్షకుడిని కూర్చోబెట్టడం అంటే మాటలు కాదు. ఈ సినిమా తారాగణం: జ్యోతిక, మలయాళ నటుడు పృథ్వీరాజ్, ప్రకాశ్రాజ్, స్వర్ణమాల్య మరియు, అప్నా బ్రహ్మానందం. నిర్మాత ప్రకాశ్రాజ్. దర్శకుడు రాధామోహన్. సంగీతం విద్యాసాగర్.
కథ విషయానికొస్తే, ప్రకాశ్రాజ్, పృథ్వీరాజ్ ఇద్దరూ కీబోర్డ్ కళాకారులు. విద్యాసాగర్ జట్టులో వాళ్ళు సభ్యులు. వీళ్ళు ఒక అపార్ట్మెంట్ లో ఇల్లు అద్దెకి తీసుకుంటారు. వీళ్ళు బహ్మచారులని వీళ్ళ పొడ గిట్టదు ఆ అపార్ట్మెంట్ సెక్రెటరీ అయిన బ్రహ్మానందానికి. ఇంతలో, ఓ రోజు పృథ్వీరాజ్ రోడ్డుపై జ్యోతిక ధైర్యాన్నీ, ఆత్మవిశ్వాసాన్ని చూసి ప్రేమిస్తాడు. తరువాత తెలుస్తుంది, ఆమె తమ అపార్ట్మెంట్ లోనే ఉంటోందని, మూగ-చెవిటి అమ్మాయని. పృథ్వీరాజ్ ఆమెని పెళ్ళి చేసుకోవాలనుకుంటాడు. కానీ, ఆమె స్నేహితురాలైన స్వర్ణమాల్య ద్వారా ఆమెకి పెళ్ళి అంటే ఉన్న ద్వేషాన్ని గురించి తెలుసుకుని, మొదట స్నేహం మొదలుపెడతారు. కొన్ని మలుపుల తరువాత కథ సుఖాంతమౌతుంది – రెండు జంటలూ ఏకమవడంతో.
ఈ సినిమాలో చెప్పుకోదగ్గ విషయం ఏమిటీ అంటే మొదట – ఈ కథని తీయడానికి ప్రకాశ్రాజ్ తీసుకున్న చొరవ. దీన్ని తీయడానికి ఎంతమంది సిద్ధంగా ఉండేవారో ఊహించలేను కానీ…. సినిమా మొత్తం మీద ఒక్క ముక్క కూడా మాట్లాడని హీరోయిన్, రొమాంటిక్ సీన్లు లేని ప్రేమ, పెద్ద హీరోయిజం చూపని హీరో – ఈ మూడూ చాలు రెండడుగులు ముందుకేసిన వారిని మూడు అడుగులు వెనక్కి వేసేలా చేయడానికి. కథాపరంగా నాకు ఈ సినిమా చాలా నచ్చింది. సింగిల్ పాయింట్గా ఏదో ఒకటో రెండో పాత్రల చుట్టూ తిరగకుండా రకరకాల పాత్రలు తెరపైకి తీసుకొస్తూ, వాటి మధ్య బంధాలని అల్లడంలో ఈ కథ సఫలీకృతమైంది. సినిమా ఆద్యంతమూ ఓ వైపు కదిలించే కథలున్నా (స్వర్ణమాల్య, జ్యోతిక, ప్రొఫెసర్ల కథలు) ఎక్కడ కూడా ఇది పూర్తి సీరియస్ సినిమా అనిపించదు -కారణం, హాస్యం. ప్రకాశ్రాజ్ హాస్యం చాలా బాగుంది. బ్రహ్మానందం కి డబ్బింగ్ వినడం కాస్త కొత్తగా అనిపించింది, ఆ పాత్ర కూడా బాగా కుదిరింది. హీరో పాత్ర- ఇప్పటి సినిమాలకి కాస్త భిన్నమైన హీరో పాత్ర. సాఫ్ట్ హీరో తరహా అనమాట. వీటన్నింటినీ మించి, జ్యోతిక నటన బాగా ఆకట్టుకుంది నన్ను. ఇన్నాళ్ళలో ఏ సినిమాలోనూ నాకు జ్యోతిక ఇంతగా నచ్చలేదు, నటన పరంగా. ఇంకా కథనం – చాలా బాగుంది. ఆ డైలాగులు, సన్నివేశాలు – నాకు ప్రతీదీ నచ్చింది ఈ సినిమాలో. ముఖ్యంగా సంగీతం గురించి హీరో జ్యోతికని అడిగే సన్నివేశం, జ్యోతిక సైగలతో హీరో ఆమె గొంతుని సృష్టించుకునే ప్రయత్నం చేయడం, ప్రకాశ్రాజ్ స్వర్ణమాల్య ని మొదటి సారి కలిసిన సన్నివేశం, ఆమెని పెళ్ళి చేసుకుంటావా? అని అడిగే సన్నివేశం, జ్యోతిక ని పృథ్వీరాజ్ మొదటిసారి చూసే సన్నివేశం, ప్రకాశ్ రాజ్ హాస్యం -నాకు బాగా నచ్చాయి ఈ సినిమాలో. పాటలు కూడా బాగున్నాయి. నాకు పాటల్లో వాడే తమిళం అర్థంకాదు కానీ, ఈ పాటలు విన్నాక అది కూడా అర్థం చేసుకోవాలి అన్న కుతూహలం కలిగింది. మొత్తానికి ఓ మాట చెప్పాలంటే, ఈ సినిమా కొత్తగా ఉంటుంది, సరదాగా ఉంటుంది, కదిలించేలా ఉంటుంది, ఆలోచించేలా ఉంటుంది – “వలపూ వగపూ నవ్వూ ఏడుపు కలబోతేరా జీవితమూ..” అన్న వాక్యాల్లోని నిజాన్ని పునరుద్ఘాటించేలా ఉంటుంది.
తమిళం అర్థమయ్యేలాగుంటే, ఈ సినిమా తప్పక చూడండి. అర్థం కాకున్నా కూడా చూట్టానికి ప్రయత్నించండి.
మంచి సినిమాకి ప్రచారం ఇవ్వడం మంచి ప్రేక్షకులుగా మన బాధ్యత మరి – ఏమంటారు?
కె.మహేష్ కుమార్ says:
మంచి సినిమా. నేను కూడా ఈ సినిమాని బాగా enjoy చేసాను. ఈ సినిమా DVD with English subtitles దొరుకుతోంది అదీ కేవలం 70 రూపాయలకే. ఈ సారి దొరికితే చూడండి ఇంకా బాగా అర్థం చేసుకుని మరీ అనుభవించొచ్చు.
ఈ మధ్యకాలంలో తమిళ్ లో వచ్చిన సినిమాలు చాలా బాగుంటున్నాయి. మనకు కేవలం శివాజి, దశావతారం లాంటివి మాత్రమే తెలిసి ‘చెత్త’ అనుకుంటాం. కానీ they have very good films in offering these days. పోయిన సంవత్సరం వచ్చిన పడితివీరన్, కల్లూరి వంటి సినిమాలే కాక ముఖ్యంగా ప్రకాష్ రాజ్ నటించి నిర్మించిన చిత్రాలలో మంచి కథలూ, సున్నితమైన కథనాలతో పాటూ వినోదాన్ని పంచేవిగా కూడా ఉంటున్నాయి ‘గది నెం 305 లో దేవుడు’ కూడా చాలా మంచి చిత్రం.
శిద్దారెడ్డి వెంకట్ says:
మంచి సినిమా పరిచయం చేశారు.
మీరు వెల్లితెరై కూడా ట్రై చెయ్యండీ
ఇది కూడా ప్రకాశ రాజ్ సినిమానే.స్వంతంగా నిర్మించి నటించారు.
మన వాళ్ళు బ్యాన్ చేస్తే చేశారు తమిళంలో మంచి సినిమాలు నిర్మిస్తూ కొత్త వాళ్ళకి అవకాశాలు కల్పిస్తున్నారు
Venu says:
ఈ సినిమా గురించి మొదట నా ఫ్రెండ్ ద్వారా తెలిసింది. తను ఈ మూవీలోని ఒక సాంగ్ వీడియో చూపించారు. చాలా నచ్చింది. తరువాత డివిడి తెప్పించుకున్నాను కానీ ఇప్పటివరకు చూడలేక పోయాను. ఎందుకంటే ఈ డివిడి కి కాప్షన్స్ లేవు. భాష కంప్లీట్ గా అర్ధం కాకపోతే సినిమాని ఎంజాయ్ చెయ్యలేను. తమిళ్ కొంతవరకు అర్ధం అవుతుంది. ట్రై చేసి చూస్తాను.
lucky says:
Gap dorikite edo rasestunnaru comments lo!
gadi no 305 manchi chitramaa??
Dasavatharam chetta cinmana..??
K.mahesh kumar vere comments lo Dasavatharam ni tega mechukonnadu..
Tamil lo recent days manchi cinimalu (try cheyandi..)
Paruthi veeran
mirugam
Anjathey
veyil
Mozhi.. already u guyz know
కె.మహేష్ కుమార్ says:
@లక్కీగారూ,
“చెత్త అనుకుంటాం” అన్నానేగానీ దశావతారాన్ని చెత్త అనలేదని గ్రహించగలరు. నేను ఇప్పటివరకూ దశావతారం అస్సలు చూడలేదు. ఇక ‘గది నెం 305లో దేవుడు’ నేను చూశాను. అది మంచి సినిమా అనే నా అభిప్రాయం.
sasank says:
ante lucky gaaru,,,mahesh kumar gaari vuddesam..anukovadam veru anadam veru ani…ee saari aayanni kshamincheyandi……………..ee mozhi cinema baguntadhi..nenu half choosanu
జూన్ జూలైల (నవతరంగం)లో నా-తరంగం « sowmyawrites …. says:
[...] 1. తమిళ సినిమా Mozhi పై. [...]