మనమెన్నో సినిమాలు చూస్తుంటాం, కానీ అందులో ఎన్ని సినిమాలు మన జీవితకాలం గుర్తుంచుకునేలా చేస్తాయి? నిన్న రాత్రి నేను చూసిన ఈ పది నిమిషాల లఘు చిత్రం మాత్రం నాకు మరో జీవితకాలం గుర్తుంచుకునే అనుభూతిని మిగిల్చింది. మనసున్న ప్రతి మనిషి మనసును కదిలించగలిగే ఈ పది నిమిషాల సినిమా పేరు కూడా పదినిమిషాలే (10 minutes).Bosnia-Herzegovina దేశానికి చెందిన Ahmed Imamovic దర్శకత్వం వహించిన ఈ సినిమా 2002 లో యూరొప్ ‍లో కెల్లా అత్యుత్తమ లఘు చిత్రం గా కూడా ఎన్నుకోబడింది. ఈ సినిమా గురించి మరిన్ని విషయాలు తెలుసుకోవాలంటే ముందు ఈ సినిమా చూసి ఆ తర్వాత చదవండి.

పైనున్న సినిమా చూసి మీరిది చదువుతున్నట్టయితే ఇప్పటికే మీకర్థమయ్యుండాలి ఇది ఒక పవర్‍ఫుల్ సినిమా అని! 1990 లలో బోస్నియా లో జరిగిన యుధ్ధం నేపధ్యంలో నడిచే ఈ సినిమా ఒక దేశానికి, ఒక ప్రాంతానికి సంబంధించి మాత్రమే కాదని నా అభిప్రాయం. యుధ్ధం ఎవరికైనా భయంకరమైన అనుభవాలనే మిగులుస్తాయని చెప్పడానికి ఈ సినిమా ఒక మంచి ఉదాహరణ. సినిమా మొదలయ్యేది ఇటలీ లో అయినప్పటికీ కథ మాత్రం బోస్నియాలో జరుగుతుంది. మొదటి రెండున్నర నిమషం ఈ సినిమాకి సంబంధం లేనట్టు అనిపించినా యుధ్ధం జరుగుతున్న ఒ ప్రాంతం మరియు యుధ్దం జరగని ప్రాంతాలలో పదినిమిషాల యొక్క విలువను contrasting గా చూపించడానికి దర్శకుడు ఎన్నుకున్న ఈ ప్రక్రియ నిజంగా ఎంతో బావుంది.

ఇప్పటికే సినిమా చూసేసి వుంటే కథ గురించి మీకు మళ్ళీ చెప్పక్కర్లేదనుకుంటా! కానీ మొదటి సీన్లో పదినిమిషాల్లో ఫోటోలు ముద్రించగల సాంకేతికత మనం పొందుపర్చుకున్నాము కానీ యుధ్ధాల పేరుతో పదినిమషాల్లో జీవితాలు, జీవితాంతం సంపాదించుకున్న ఆస్తులు, రాబోయే జీవితం గురించిన కలలు కళ్ళముందే కరిగి కన్నీరై రక్తంలో కలిసి ప్రవహిస్తుంటే ఆపే వారెవరు? అని ఈ సినిమా ప్రశ్నిస్తుంది.

ఈ సినిమా కథాపరంగా అధ్భుతంగా వున్నప్పటికీ ఈ సినిమాలోని కొన్ని సాంకేతిక అంశాలు మరో ఎత్తుకి తీసుకెళ్తాయి. మీరు గమనించారో లేదో కానీ రెండో సీను మొదలయ్యి సినిమా అయ్యే వరకూ ఒక్క కట్ కూడా లేకుండా ఆ సీనును చిత్రీకరించడం ఎంత కష్టమో అలోచించండి. అసలు కెమెరా ఎక్కడ పెట్టారు? ఎలా ఆ ఇంట్లోనుంచి, వీధిలోకి కట్ లేకుండా ఆ పిల్లాడిని వెంబడిస్తూ మనమే అతని వెనక నడుస్తున్నామా అన్నట్టుగా ఆ సీను చిత్రీకరించడం అంత సులువు కాదు. కావాలంటే మరో సారి చూడండి.2:30 సమయం నుండి సినిమా చివరిదాకా కట్ లేకుండా ఒకే extended take లో వచ్చిన సీన్లు, నాకు తెలిసి , ప్రపంచ సినీ చరిత్రలో చాలా అరుదు.