ఈ సంవత్సరంలో ప్రేక్షకులు అత్యంత ఆసక్తిగా ఎదురుచూసిన సినిమాల్లో జోధా అక్బర్ ఒకటి. ఈ సినిమా గురించి చెప్పాలంటే ముందుగా జోధాబాయి-అక్బర్ కాంట్రవర్శీ గురించి చెప్పుకోవాలి. అసలు జోధాభాయ్ అనే ఆవిడ అసలు లేదు అదంతా కట్టుకథ అని కొంతమంది, కాదు ఆమె వుంది కానీ ఆమె అక్బర్ భార్య కాదు కోడలు అని కొంతమంది వాదన. ఈ గొడవంతా నాకెందుకని అశుతోష్ ముందుగా సబ్-టైటిల్ వేసి అక్బర్ కి ఒక రాజపుట్ వనితతో పెళ్ళయిన మాట నిజం కానీ ఆమె పేరు చాలా మంది చాలా రకాలుగా చెప్పుకుంటారు. అలా చెప్పుకున్న కథల్లో జోధాబాయ్ అక్బర్ భార్యపేరు అని చాలా మంది సామాన్య మానవుల అభిప్రాయం. వారి దృష్టికోణంలో చెప్పిన కథే ఇది అని చెప్పి కథను మొదలుపెడ్తాడు.
కథ అందరికీ తెలిసేవుంటుంది. అక్బర్ హిందూ వనిత అయిన జోధాభాయ్ ని కొన్ని కారణాల చేత పెళ్ళిచేసుకోవాల్సి వస్తుంది. ఈ పెళ్ళి మొదట్లో జోధాభాయ్ కి ఇష్టం వుండదు. కానీ అక్బర్ గురించి కొద్దికొద్దిగ తెలుసుకుని అతనితో ప్రేమలో పడ్తుంది. అంతే కథ.
సినిమా అప్పుడప్పుడూ చరిత్రకు ఒక దృశ్యకావ్యంలా నిలిచే అవకాశాలు చాలానే వున్నాయి. కానీ ఈ సినిమాలో అలాంటి చారిత్రక సత్యాలకోసం వెళ్తే మీరు అత్యంత నిరాశ చెందడం ఖాయం. ఒక్కోసారి రొటీన్ భారతీయ కుటుంబ కథాచిత్రం చూస్తున్నామా చారిత్రాత్మక సినిమా చూస్తున్నామా అని అనుమానం కలగక మానదు.
లాగాన్ కి ఆస్కార్ నామినేషన్ ఇచ్చిన దగ్గర్నుంచీ అశుతోష్ అన్నీ అస్కార్ కి ఆస్కారముండే సినిమాలు తీయాలని అనిపిస్తుందో ఏమో కానీ ఈ సినిమా కూడా చాలా ఖర్చు పెట్టి అంతర్జాతీయ స్థాయిలో నిర్మించే ప్రయత్నం చేసాడు. మొదట్లో వచ్చే కొన్ని యుధ్ధ సన్నివేశాలు మళ్ళీ టి.విలో రామాయణం, మహాభారతం ముఖ్యంగా టిప్పుసుల్తాన్ చూసిన రోజులను గుర్తుకు తెచ్చాయి.
ఈ సినిమాకి పెద్ద సమస్య-నిడివి. నేను 7:45 కి హాల్లోకి వెళ్ళి 11:45 కి బయటపడ్డాను. పోనీ మూడున్నర గంటలపాటు ప్రేక్షకుల ఆసక్తిని తెరపై నిలపగలిగాడా అంటే అనుమానమే. అసలే కథ లేదు. దాంతో నత్త నడక సాగుతున్న కథనానికి మథ్యలో పాటలు పెద్ద స్పీడ్ బ్రేకర్స్ లాగా.
అలా అని సినిమా అసలే బాగోలేదని కాదు.కొన్ని సన్నివేశాలు నిజంగానే చాలా బావున్నాయి.చివర్లో ఫైటింగ్ సీన్, అక్బర-జోధాల మధ్య కత్తి సాము, వారిద్దరి మధ్యా ప్రేమాయణం లాంటివి బాగా రూపొందించారు.
ప్రొడక్షన్ డిజైనింగ్ చాలా బావుంది. బాగా పరిశోధన చేసినట్టు తెలుస్తుంది. కెమెరా వర్క్ కొన్ని చోట్ల డిసప్పాయింటింగా వుంది. నేను చూసిన థియేటర్ సమస్యో ఏమో గానీ దాదాపు 90% సీన్లలో తల భాగం కట్ అయిపోయేలా వుంది షాట్ కంపోజిషన్. మిగిలిన చోట్ల సినిమాటోగ్రఫీ బావుంది.ఇలాంటి సినిమాల్లో యాక్షన్ సన్నివేశాలు ప్రత్యేకం కాబట్టి వాటి గురించీ చెప్పుకోవాలి. హాలీవుడ్ సినిమాల లెవల్లో భారీగా చూపించడానికి ప్రయత్నం చేసినా ఈ యుధ్ధం సీన్లు అంతగా ఏమీ ఆకటుకోలేదు. కానీ గుంపు మధ్య జరిగే పోరాటాలకంటే ఇద్దరి మధ్య జరిగే పోరాట సన్నివేశాలను బాగానే కొరియోగ్రాఫ్ చేసారనిపించింది.
ఇందాక చెప్పినట్టు ఇది ఒక కుటుంబ కథా చిత్రం. అలాగే ప్రేమ కథా చిత్రం కూడా. అప్పుడప్పుడు మాత్రమే ఈ కోవలోనుంచి దారి మళ్ళి చారిత్రక సినిమాగా అనిపిస్తుంది. సినిమా చివర్లో హీరో విలన్ ఫైట్ చేసుకుని ఎవరు గెలిస్తే వాళ్ళదే రాజ్యం అనడం ఏదైనా కాల్పనిక కథలకు బావుంటుందేమో గానీ ఇలా అక్బర్ చరిత్రనూ తిరగరాయడం కొంచెం విపరీతమే. అదే నిజమని నమ్మిన వాళ్ళకు తీరని మోసం చేసినట్టే కదా.అలాగే సినిమా చివర్లో అక్బర్ ప్రజలతో జోధాభాయ్ నాభార్యఆవిడను ఎవరన్న పల్లెత్తి మాటన్నరో ఖబడ్దార్ అనడం కొంచెం చీప్ గా వుంది.
మొత్తానికి జోధా అక్బర్ కొన్ని విధాలా డిసప్పాయింట్మెంటే. కానీ హృతిక్ రోషన్, రాజ మురాద్, సొనూ సూద్ బాగా నటించారు. ఐశ్వర్యా రాయ్ కూడా బాగానే చేసింది. హృతిక్ ఐశ్వర్యా మధ్య రొమాన్స్ బావుంది. ఓవరాల్ గా యావరేజ్ సినిమా.
వెంకట్ నవతరంగం 
అతిథి 
మహేశ్ కుమార్ K 
జోశ్యుల సూర్యప్రకాశ్ 
సౌమ్య V B
రాజేంద్ర says:
సినిమా చరిత్ర ఈ రెండింటినీ కలిపినప్పుడు వాస్తవాలు అనేవి చాలావరకూ కనుమరుగవుతుంటాయి.ఈ జబ్బు మన భారతీయ చారిత్రక సినిమాలకే కాక హాలీవుడ్ లో కూడా ఉంది.ఇక మన తెలుగు సినిమాల విషయం చెప్పక్కర్లేదు.జోధాఅక్బర్ గురించి మీ సమీక్ష ఇంకా రాసుంటే బాగుండేది అనిపించింది.ఈరోజు దిహిందూలో సంగీతాదేవి డండూ ఒక పరిశీలానత్మక వ్యాసం రాసారు చూడండి.
http://www.hindu.com/fr/2008/02/15/stories/2008021550580100.htm
రాకేశ్వర రావు says:
@ వేంకట గారు,
కష్టపడి తీసిన సినిమాకి పుటుక్కున బలే వ్రాసారు సమీక్ష . పోనీలే కనీసం యావరేజీ గానేనా వుంది.
@ రాజేంద్ర గారు,
మీరు అలాంటి ఆసక్తి కరమైన లంకెలను. టాపా గా వేసి, కొంత excerpt తో లంకెల వర్గంలో వేయవచ్చు.
వెంకట్ says:
నాకు కుల్భూషన్ కర్భంధా నటన కూడా నచ్చింది. ఈయన మన సత్యనారాయణ లాగా పాత్రలో భలే దూరిపోతాడు. సుహాసినీ మూలే ఎందుకో అన్నింటికీ ఒక చిరునవ్వు మాత్రమే చిందించింది. మహం అంగా పాత్ర పోషించింది ఎవరో సినిమా చూసేటప్పుడు తెలియలేదు.ఇలా అరుణ్ అనే ఇప్పుడే చూసా… అది మంచి పవర్ఫుల్ పాత్ర..కానీ ఈమె చాలా వీక్ గా పోషించింది.
వెంకట్ says:
@రాకేశ్
సినిమా గురించి ఏ విధమైన అంచనాలు లేకుండానే చూసాను. కానీ as a whole అంతగా నచ్చలేదు. కాస్ట్యూమ్స్, సెట్ డిజైనింగ్ అలా ఇండివిడ్యుయల్ గా బావున్నాయి. కానీ అశోకా కంటే చాలా రెట్లు మేలు.వీలయితే చూడండి. మీ అభిప్రాయం తెలుపండి.
రానారె says:
వెంకట్ గారూ,
Thanks for the review. అంతర్జాలంలో కొత్తసినిమా సమీక్షల విషయంలో ప్రస్తుతానికి నేను నమ్మేది కేవలం నవతరంగాన్నే. మిగతా సాలెగూళ్లన్నీ ఆయా చిత్రాలకు బాకాలుగానో బాకులుగానో మారి సమీక్షల పేరుతో ఉన్నదీలేనిదీ రాస్తున్నాయి. పక్షపాతం లేకుండా ఇలాగే Consistentగా సమీక్షలు రాస్తూ, మీ నవతరంగాన్ని నమ్మదగిన సాలెగూడుగా చిరకాలం నిలుపుతారని ఆశిస్తున్నాను.
వెంకట్ says:
రానారె,
మీరు హానెస్ట్ హిందీ సినిమా సమీక్షల కోసం ఈ సైటు చూడొచ్చు.
http://withoutgivingthemovieaway.com/main/reviews/jodhaa-akbar-review/
నాగరాజు పప్పు says:
మీ సమీక్ష చూసి నేనూ ఇప్పుడే ఈ సినిమా చూసొచ్చా. మూడోతరగతిలో అశోకుడి పాఠంలో ‘అశోకుడు చెట్లు నాటించెను, బావులు తవ్వించెనూ” అని అశోకుడి చరిత్రని ఎలా చదువుకొన్నామో, ఈ సినిమా చూసింతర్వాత, అక్బరు చరిత్రని “అక్బరు భార్యని ఎంతగానో ప్రేమించెను, జోధ్భాయ్ – అక్బరుకి దాల్, రోటి, పాలక్ పన్నీర్ వంటి శుద్ద శాఖాహార వంటకాలు స్వయంగా వండి తినిపెంచెను, తలనొప్పి వస్తే జండూబామ్ పట్టించెను, అక్బరుకి సిక్స్ పాక్ ఆబ్స్ ఉండెను” అని నేర్చుకొన్నా.
అద్సరేగానీ, పెళ్ళాం పక్కలోకి రాకపోతే మక్కెలిరగదన్నే చంఘీజ్ఖాన్ వంశంలో పుట్టిన చక్రవర్తి మరీ అలా బేలగా కాళ్ళా వేళ్ళా పడుంటాడా? అదీగాక, ఆయనేం రఘువంశంలో పుట్టిన ఏకపత్నీవ్రతుడేం కాదే..
అక్బరు కారెక్టరులో ఒక్కపిసరు రాజసంగాని, ఆయన చుట్టూవున్నవాళ్ళలో మనమో చక్రవర్తి సన్నిధిలో ఉన్నాం, ఒళ్ళు దగ్గరపెట్టుకోకపోతే పుచ్చెలెగిరిపోతాయ్ అన్న ఎరికగాని అస్సలు లేవు.
అంతఃపుర కాంతలు మరీ చీరలుతుక్కొని, ఆరుబయట ఆరపెట్టేలెవెలుకి మారిపోవటం కొంచెం చిత్రంగా ఉంది. ఈయనగారేమో, ఉదయం లేవంగానే – గుమ్మం ముందే, ఆడాళ్ళు చూస్తుండగానే, ఎదురింటి రోమియోగారు డాబామీద బస్కీలు తీసినట్టు, బట్టలూడదీసుకొని వ్యాయామం చేస్తాడు. ఇవేవేం అస్సలు బాగాలేవు.
అప్పటి కాలం నాటి సంగీత నృత్యాలు ఎలా ఉండేవో చాలా సమాచారమే ఉంది కదా – మరి డాన్సులన్నీ ఇప్పటి రాక్-పాప్ స్టయిల్లో ఉండటం ఏమో బాలేదు.
చిస్తీ సూఫీలుందరూ, మెవ్లవీ డాన్సులు చెయ్యటం చూస్తే – అశుతోష్ ఎంత “రీసెర్చి” చేసాడో తెలుస్తోంది. రిసెర్చి సంగతి అటుంచితే, అక్బరు కాలంనాటికే జపనీస్ కల్చర్డ్ ముత్యాలు, స్వరోస్కీ క్రిస్టల్సు ఉండేవా ఏంటీ కొంపదీసి?
సినిమా అంతా అక్బరు అగ్రాలో ఉన్నట్టు చూపించారు కదా – మరి కొన్ని సెట్లు ఫతీపూరు సిక్రీ కోట డిజైను కాపీకొట్టారేంటీ?
మీరన్నట్టు, అక్బరు-జోధ్భాయ్ల కత్తియుద్ధం కొరియోగ్రాఫీ బావుంది, కానీ ఈ మధ్యకాలంలో ఇలాటి వాటికి గోల్డ్ స్టాండర్డు మాత్రం, మాస్క్ ఆఫ్ జోరో సినిమాలో కాథరీన్ జీటా జోన్స్-అంథోనీ బాండ్రియాస్లదే.
మొత్తం మీద చెత్త సినిమా.
వెంకట్ says:
మొత్తానకి ఎవరో ఒకరు ధైర్యంగా అనేసారు “చెత్త” అని. నేనూ చాలా రోజుల్నుంచి ఆపుకొని వున్నా…:-) అశుతోష్ ని ఏమైనా అంటే జనాలు నాపై దాడి చేస్తారేమోనని. నా దృష్టిలో అశుతోష్ బెస్ట్ ఫిల్మ్ “పెహలా నషా”
బాడిడబుల్ నుంచి కాపీ కొట్టినా బాగా కొట్టాడు….
p. mary madiga says:
barateya chitrala repots tdf net dwara barateyulaku
munduganea infome chestunnaduku very thanks
sunita chowdhary says:
Aa rojullo entha religious tolerance undho, choodandi. Even if it’s fiction, it was wonderfully dramatised.
రాజేంద్ర కుమార్ దేవరపల్లి says:
నాకు ఈ సినిమా ఎందుకు నచ్చిందో త్వరలొ రాయబోతున్నానోచ్
శిద్దారెడ్డి వెంకట్ says:
@రాజేంద్ర
వైయిటింగు